Read Northern Rengma Naga 1 PITOR 3 Bible Online

1 PITOR 3 - Northern Rengma Naga bible

1 PITOR 3

¹ Tsü makesü nthu awubvüthu, nthu wubathu jühkinalo, isanu keujüla mathu pahan na Anyiza jüh nkina lela nthu yencüki kemehai na mathu nnepi nondiya thsüaben. Nthu na ajüh kesüla nkhila mehai,

²kepaghenanye mathu na nthu yencüki kemetha nu kenyuwakü tsü muyaben.

³ Nthu lissen kepvü yen wi, nyelela suna men kedhu sen, nyelela athsümeni kemehai pvü nu nthu amei tsikemehai sale nsala.

⁴Tsüti kesawa nye, nthu tsikemehai tsüna nthu leben non wi keshhugho, jüwa nketen tsikemehai na ccatssü nu ccen kesa ghamu, tsüna Anyiza tu wi ma men keben ntsawa.

⁵Kepaghenanye kheni nza kemethathu na mathu kenondi pi Anyiza miwi chi nu mathu wubathu jüh kekina tsü pi mathu tsikemehai sa.

⁶Sarah la Abraham jühkina, nu ma pi ma pvüwa isa ci. Nthu na mangla nmessila kemehaiwa saten lethu, nthu na khili ma ngathu sayadha.

⁷ Tsü makesü nthu awubathu, nthu wubvüthu na nthu miwi kekhang zengki kesa mehaitsü chü nu mathu ssinu hanglo. Mathu kinyikülo, kepaghenanye mathu la nthu gweghe Anyiza ju khukechi kahang tsü muyaden. mangla nthu kekhi wi ketan-kagha nsa thsüle kesalina hati salo.

⁸Asakhenwa: Nthu tsüdila aleben kesü nu kemeshen kesü salo; cünyunyi ti ketizenli nu khokho tu wi ccatssü nu satemeni tenlo.

⁹Nkemehai pi nkemehai ndhila nyelela kishenkecü pi kishenkecü kuti nsala; tsüti kesawa nye, sawegü pi cülo, kepaghenanye Anyiza na nthu ci keya wi kesawegü pi nthu cüle khishi theng.

¹⁰Ntsawajüh na khiden, “Anyi thowa na kahang tsü nen nu matsü kemehai tsü muya mvuten khe, amili pi ajüh nkemehai nkhila nu apang wi milikemesa khi yishü.

¹¹Ma nkemehai wina kheneng wa kemehaiwa sa wa nsathu yishü; ma leben tsüdi pi keccawa tsü jügü nu bha thsülo.

¹²Kepaghenanye Apvüwa na ketsatanthu ghang benden, nu mathu kekhie kina benden; isala ma nkemehai kesathu tsü shunden.”

¹³Nthu na kemehaiwa sa lethu, thowa na nthu miwi nkemehaiwa saya mehai nu?

¹⁴ Isala keujüla nthu na ketsatanwa ghena ketizen sa lethu, nthu kemihhi ntsa! Thola nmessila nu leben ketizen nsala.

¹⁵ Isala nthu leben wi Khrista messikü nu ma pi Apvüwa sala kinyikülo. Kenondi nthu wi keben tsü khati kesa khe nyu na keü lethu, keshüthangla khiya kemehai kiden sen benlo,

¹⁶isala ccatssü nu kinyikü wina salo. Nthu kemeshen methasi benlo, isanu nthu Khrista senkeniethu yencüki kemehai tsü pi nkemehai le khi pi nthu kimenni ketenthu yala mathu kekhi tsü ghena kejüghe yaya thsüle kesalina.

¹⁷Kepaghenanye nkemehaiwa kesa ghena ketizen kesa miwi kemehaiwa kesa ghena ketizen kesa tsüna keujüla Anyiza kemeshen lethu, tsüwa mehai.

¹⁸Kepaghenanye Khrista na kesamithu ghena kutitan anuphan ghena shüdha, nthu ssinu Anyiza wi ghole kesalina ketsatan nyi kesü na kesami nyithu mithon sa. Asajjü wi ma pi shü thsü lela aghamulen wi sa pi hangya thsüa,

¹⁹nu ma aghamulen kahang wi wala atssüzü sa keben aghamuthu sansi.

²⁰Hathu ha Noah na ma hunjjen cü keben jüwi Anyiza na leben tisie pi hie lela ma jüh nkinala kesa ghamuthu tsü. Ahunjjen non wi anyi kezeng meshu tazen ketan atssü wina hangshaya,

²¹atssü tsü jjügi khili nthu hangshaya keben baptaiz kesawa tsü. Tsüna asajjü wi nkemetha bhu temetha kesa tsü nye, isala kemeshen kemehai wina Anyiza wi khishi kechiwa tsü. Tsüna Jisu Khrista hangneng-keshagha wina nthu hangsha yaben,

²²ma tang wi wa Anyiza kwen ajewa wi ben nu tangnyilothu nu tang kekhang kesenthu nu kekhangthu tsüdi miwi kadi saben.