Read Northern Rengma Naga 1 PITOR 4 Bible Online

1 PITOR 4 - Northern Rengma Naga bible

1 PITOR 4

¹Khrista na asajjü wi ketizen sa ntsa sa kesa tsüti nthu la ma meshen nu nthu satezü yalo, kepaghenanye thowa na asajjü wi ketizen sa khe kesami nsa laden.

²Tsalina khili nten na nthu ayyi ha wi kahang wi asajjü kenen wi nyela Anyiza kemeshen wi nhangthu yishü.

³Nthu na matsü kesiela kheni Anyiza nkechüthu kekuli tsüti saghodha. Nthu kahang na nkemejüghe kekuli, asajjü kenen, adikina, akhang sa nu dsajjü deja nu kesa mvu sa, nu atsikezhü nankiqanan kekinyi wi ben wa.

⁴Anyiza nkechüthu na nthu khili tsü kheni ti ghameme kahang wi mathu ngweghela kesalina mathu amansa nu nthu kimenni ben.

⁵Isala mathu wala kahang nu keshü jühkaghaten le kiden sen kebenwa Anyiza tu wi mathu ketanla mathu cüki khiden.

⁶Tsü ghena Jühtheü Kemehaiwa pi, anyi tsüdi ghankenan ti mathu sajjü wina ghan-nan kesathu, keshü la sansi cü; mathu ya aghamulen kahang wi Anyiza ti hangya thsüle kesalina tsü pi mathu sansi cüdha.

⁷Pala tsüdila asakhenwa tetsakidha. Nthu kekhie saben yale kesalina kekheneng nu meghe-metsa meyathu yishü.

⁸Tsüdi miwi la leben tsentsa wi khokho ketizenli yalo, kepaghenanye ketizenwa tsüna kesami kejon teshi cüden.

⁹Leben nkaghajüh nkhila khokho jjen wi ssikeyali tenlo.

¹⁰Kesüsü tsüdila Anyiza juthu kepapa tsü noncca kemehaiwa sa, ma Anyiza wi mukeya aju tsü sen nu nyu kepathu ghena kemehaiwa nsathu yishü.

¹¹Anyi thowa na nyu sansi ten khe Anyiza ketsijüh pi sansi thsülo; thowa na nyu kekuli sa ten khe ma ya Anyiza pi ma kecü kezü sen nu nyu kekuli sa, isanu anyankethang nu kekhang na anuphan nu anuphanla ma ji sa ketenwa Jisu Khrista wina pala tsüdi wi la keseng pi Anyiza kecüwa salo. Amen.

¹²Hi ketizen ipvüshangthu, nthu na ghankenan kedhu wi ketizen kesa tsüna khenighani nthu miwi sa nketen ti nu amansa nsala.

¹³Tsüti kesawa nyela nthu la Khrista ketizen kesa wi saghuya kesa ghena anonghe yalo, isanu ma nyankethang pi ccücakechi wi nthu nonghe cencuyale kesalina.

¹⁴Keujüla Khrista ghena nyu nthu kimenni lethu, nthu na kemihhi ntsa, kepaghenanye anyankethang Ghamu, Anyiza Ghamu tsüna nthu miwi ben.

¹⁵Nthu kesütanla nyu kepathi, kaghanfü, ayen kepakhhi, nu nyu ketan-kagha kekuli nyi kesü sa nu ketizen nsala.

¹⁶Isala nthu na Khristanyi kesa ghena ketizen sa lethu njüghela, isani nthu Khrista nyan kepvü ghena keseng pi Anyiza cülo.

¹⁷Ajühkekaghaten matsü na ghodha, nu Anyiza nyithu jühkaghaten tegüden. Keujüla ithu jühkaghaten tegü lethu, asakhen wi Anyiza wi kegho Jühtheü Kemehaiwa n-nondila kesathu tsü khatila saben nu?

¹⁸ Ntsawajüh na khiben, “Ketsatan nyi hangshayale kesa na dhu lethu, Anyiza nkechü kesami nyithu tsü khati saben nu?”

¹⁹Tsalina Anyiza kemeshen wina ketizen sa ketenthu mathu kekuli kemehai kesa wina mathu ketanla mathu pi mathu Sahangkechiwa, jühtsentsa kesenwa dhenchi thsülo.