Read Northern Rengma Naga 1 PITOR 5 Bible Online

1 PITOR 5 - Northern Rengma Naga bible

1 PITOR 5

¹Hi keshenpfü nyi kesü, ajüh pi nthu jawi kemehu keshenpfüthu kizaben. Hi Khrista ketizen kesa chüza kesü, nu nkhe wi anyankethang pi ccüca keten wi ishei la ben. Hi nthu wi khiben,

² Anyiza na nthu ya sa thsü mvu keben ti nsa mvu nsala nu anonghethi sala Anyiza pi nthu dhenchi ketheng anenithu tsü noncca kemehai sayalo. Nthu thün ghena ketan nyela nthu leben wi keshhugho sa mvuthi kesa sen nu kekuli salo.

³Pi nthu dhenchi kethengthu miwi kekhang senle nsala, isala anenithu ghena tsütsonca kemehai salo.

⁴Isanu Anenikehie Kediwa na kegho wi nthu na jüwa nketen anyankethang khangkeya liwen tsü muyaden.

⁵ Tsü makesü nthu anyi pvünyithu la keqhaithu jüh nkinathu yishü. Nthu tsüdila khokho tu wi ccatssü kesa yen tsü pvü yalo; kepaghenanye Ntsawajüh na khiben, “Anyiza na kekapvüwa tsü shunden, isala nanketizen pi ccatssü keten nyi cüden.”

⁶ Tsalina Anyiza na matsü wina nthu zankiya thsüle kesalina nthu satemeni pi ma kwen kekhang wi chiyalo.

⁷Nthu khhi kekiyan tsüdi pi ma dhenchilo, kepaghenanye ma nthu cüki meshen benden.

⁸Meghe-metsa nu kiden-kesha benlo! Nthu ghinyiwa, atsaghang na ssensitemi ti ghamo sen nu anyi pahan ghandsale cüshuden.

⁹Nthu kenondi wi zükeqhe nu ma kaghanineng benya, kepaghenanye ayyi wi nthu pvüshang kenondithu tsüdila ha makesü ketizen saben kesa nthu na chüben.

¹⁰Isala nthu na matsü keu ketizen kesa seng wi Anyiza tsüdi nanketizenwa, ma nthu ci pi Khrista gweghe anuphan nyankethang wi chi keyawa na ma ketanla nthu sa pi cencu nu kekhang, kezü, nu keyazi pi nthu cüben.

¹¹Ma ya anuphan nu anuphanla kekhangwa salo! Amen.

¹²Hi icünyuwa Sila kekiqa sen nu lesü melute ha zhü pi nthu cüben. Hi nthu kechü-kenong nu hawa ha Anyiza nanketizen atsentsa le kesa khiben. Ciwi tsü zükeqhe ben yalo.

¹³Anyiza na nthu gweghe kessiya kesa Babilon wi kemehu na nthu shalom saben, nu itsawa Mark la nthu shalom saben.

¹⁴Khristanyi ketizenli kekimangli wi khokho shalom salo. Kecca yala nthu Khrista wi kebenthu tsüdi ssiben keyawa salo.