Read Northern Rengma Naga 1 JOHAN 3 Bible Online

1 JOHAN 3 - Northern Rengma Naga bible

1 JOHAN 3

¹ Ae, Abawa na khatila ithu tizen chidha nu! Ma ketizen na di ntsa kesalina ithu pi Anyiza tsangathu le ciyadha — nu ntsakhiwa ithu na tsüti saben. Tsalina ayyiwa na ithu nchü, ma jjügi tsüna Anyiza nchü.

²Hi ketizenthu, ithu na khili Anyiza tsangathu sayadha lela nkhe wi ithu na khati saben khe npi chüya. Isala ithu na Khrista kegho wi ma ti saben kesa ithu na chüben, kepaghenanye ithu na ma khati kesa khe ma muyaben.

³Kesü le kesü lela kenondi ha ma wi kebenwa Khrista na metha kesa tsüti ma satemetha benden.

⁴Anyi thowa na kesami sa khe ma Anyiza yenwa tsü pakhhi ben; kepaghenanye kesami tsüna ayen kepakhhiwa.

⁵ Khrista na kesamithu tsü sen bvüale kesalina gho, nu ma wi kesami nmi kesa tsü nthu na chüben.

⁶Tsalina anyi kesü le kesü lela Khrista wi hang ketenwa kesami sa meyacha; isala thowa na kesami saten khe khiela ma npi muya nyelela npi chüya.

⁷Itsangathu, anyi thola ya nthu nmechu thsüla! Thowa na ketsatan kuli ten khe Khrista na tsatan kesa tsüti ma la tsatan.

⁸Thowa na kesami saben ten khe ma Atsaghang ji, kepaghenanye Atsaghang na aghatsan wina samidha. Anyiza Tsawa hang kegho ma jjügi Atsaghang na kuli ketheng tsü yasa cüle kesa ghena.

⁹Thowa na Anyiza wina pvüghaya khe ma sami ben nten, kepaghenanye Anyiza yencükiwa tsüna ma wi ben; nu Anyiza wina pvüghaya kesalina sami ben nten.

¹⁰Ha wina Anyiza tsangathu nu Atsaghang tsangathu chü kepapa sa yaben: anyi thowa na ketsatan kuli nten nyelela ma cünyuwa tizen nten khe ma Anyiza tsanga nye.

¹¹ Nthu aghatsan wina zakeya ketsijüh na ha: ithu khokho ketizenli meyathu yishü.

¹² 12 Ithu na Kain ti sa yishü; ma Atsaghang ji sa nu ma cünyuwa Abel pathia. Ma mangkesa na ma cünyuwa pathi nu? Kepaghenanye ma kekulithu tsüna sazzi, isala ma cünyuwa kekulithu na meshon.

¹³Tsalina icünyuthu, keujüla ayyi nyithu na nthu nanmeghü lela nthu aman nsala.

¹⁴ Ithu na ithu cünyuthu tizen keten ghena keshü wina kahang wi shhugho yadha kesa chüben. Thowa na nyu tizen nten khe khili la keshü wi ben.

¹⁵Thowa na ma cünyuwa nanmeghü ten khe ma nyu kepathi nyi, nu nyu pathi ketenwa miwi anuphan kahang nmi kesa nthu na chüben.

¹⁶Ithu na ha wi ha ketizen tsü chüya: Khrista na ithu ghena ma kahangli khuchi. Tsalina ithu la ithu cünyuthu ghena ithu kahangli khuchi jiketsü le!

¹⁷Keujüla keban kesü na ma cünyuwa kahhatu mu lela ma cünyuwa tsü ntizenchila lethu, ma khati nu ma Anyiza tizenten le khiya mehai nu?

¹⁸Itsangathu, ithu ketizenwa tsü apang nu ajüh wi ketan sa yishü, isala kekuli nu atsentsawa wi sa nalo.

¹⁹Tsalina ha wina ithu atsentsawa wi ben le kesa chüyaben; nu hati nu ithu na Anyiza tu wi kempvüza sa yaben.

²⁰Keujüla ithu kechükeza na ithu meshensa ben lethu, Anyiza na ithu kechükeza miwi dikiben, nu ma pala tsüdila chüben.

²¹Tsalina ipvüshangthu, keujüla ithu kechükeza tsüna ithu nmeshensa lethu, ithu na Anyiza tu wi kempvüza ben.

²²Ithu na ma wi mangwa khie khe muyaben, kepaghenanye ithu na ma ayenkhukechi tsü nie nu ma kenen saden.

²³ Ma ayenkhukechiwa tsüna ha: Khrista na ithu kekiza ti, ithu ma Tsawa Jisu Khrista tsü nondi nu khokho ketizenli tenlo.

²⁴Anyi thowa na Anyiza yenkhukechi tsü nie ten khe ma Anyiza wi hang den nu Anyiza na ma wi hang den. Nu Anyiza na Aghamu pi ithu kecü tsü ghena Anyiza na ithu wi hangben kesa chüben.