Read Northern Rengma Naga PENDHENYI 10 Bible Online

PENDHENYI 10 - Northern Rengma Naga bible

PENDHENYI 10

¹Abimelek keshü seng wi Dodo tsawa Pua tsa Tola na Israel hangsha cüle gho. Ma Issakhar mizza nyi nu ma Efraim yyishiphon diyyiwa wi Shamir wi hang.

²Ma amapi ngwe nu kecheng Israel ccüliwa sa. Isanu ma shü nu pi Shamir wi vhüa.

³Tola seng wi Jair na Gilead wina gho. Ma amapi ngwe nu keni Israel ccüliwa sa.

⁴Ma tsathu changha na gada ssiden. Mathu na Gilead yyi wi anyunutithu changha ben, tsüthu tsü nansü kecu wi la pi Jair nyuthu le khiden.

⁵Jair na shü nu pi Kamon wi vhüa.

⁶Israel nyithu na kheneng Baal, Astart, nu Siriya, Sidon, Moab, Ammon, nu Filistia cenpvüthu kinyi wa nu sami pi Apvüwa shun. Mathu na Apvüwa teshi nu ma nkinyila.

⁷Tsalina Apvüwa na Israel nyithu miwi aghepvü, nu Filistin nu Ammon nyithu na mathu chaya thsüa.

⁸Amapi tagha nu tazen mathu na Gilead wi Jordan Ghaku na nishuwa Amor diyyiwa wi hang keben Israel nyithu tsüdila metenmesha nu pasha sa.

⁹Ammon nyithu na Jordan Ghaku lela pvüdhi sengho Judah, Benjamin, nu Efraim mizzathu ssisa. Israel na ketizensa ntsa sa.

¹⁰Tsaseng wi Israel nyithu na magha nu Apvüwa wi khi, “Ithu na no ithu Nyiza lela teshi theng nu Baal kinyi wa kesalina sami pi no shundha le!”

¹¹Apvüwa na mathu wi ha khineng, “Kheni tsü wi Ejipt, Amor, Ammon, Filistin

¹²Sidon, Amalek nu Moan nyithu na nthu metenmesha, nu nthu na hi wi maghala qai. Hi mathu kwen wina nthu hangsha ncü kwe?

¹³Isala tsü miwi nthu na hi teshi theng nu acenpvü kepathu kinyi wa, tsalina hi nthu kekasha nengya ntendhale.

¹⁴Wala nthu na kessiya kesa cenpvüthu wi kekiqa khieyalo. Nthu na ketizensa keben wi mathu ya nthu kekashaya thsülo.”

¹⁵Isala Israel nyithu na Apvüwa wi khi, “Ithu na samidha le! Katsüha lela no kenenwa sayalo, isala tizenthu nansü ithu hangsha cülo.”

¹⁶Tsalina mathu na asang cenpvüthu tsü teshi nu Apvüwa kinyi wa; nu Israel na ketizensa kebenwa tsü ghena Apvüwa na ma leben nccala.

¹⁷Tsaseng wi Ammon nyi süpahizi na aghikesa ghena kidenya nu Gilead wi kemnanpen saben. Israel nyithu na gho saghuya nu Gilead yyi Mizpah wi kemnanpen sa.

¹⁸Ciwi anyithu nu Israel mizza wi accülikesathu na khokho wi keü, “Thowa na ithu ssinu Ammon nyithu ssikaghashen ten nu? Thowa na tsüti sa khe ma Gilead wi anyi tsüdi ccüliwa saben.”