Read Northern Rengma Naga PENDHENYI 11 Bible Online

PENDHENYI 11 - Northern Rengma Naga bible

PENDHENYI 11

¹Jeftha na Gilead süpahi kempvüza ntsa kesü, ma keqheza menkedsa nza kesü tsa. Ma ba Gilead na

²ma wubvü wina atsa kepathu la ben, nu mathu na qhai keshagha wi Jeftha jügüshi pi bvü thsüa. Mathu na ma wi khi, “No ithu ba keben mangla ghongya nben, kepaghenanye no nza kepa tsa kesü.”

³Tsalina Jeftha na ma cünyuthu wina bvü wa Tob yyi wi hang. Ma ciwi ketesü nyi akhang kesü saghuya nu mathu na ma nieden.

⁴Matsü pahan seng wi Ammon nyithu na Israel ssinu aghisa.

⁵Hati kesa wi Gilead wi accülikesathu na wa Tob yyi wi Jeftha ssi neng gho.

⁶Mathu na ma wi khi, “Ghola ithu ssinu Ammon nyi ssisalo.”

⁷Isala Jeftha na mathu luneng, “Nthu na hi nanmeghü ntsa sa nu iba jjen wina hi jügüshi pi bvü thsüa. Mangkesa na nthu khili ketizenkesa tsü wi hi bhagho ben nu?”

⁸Mathu na Jeftha wi khi, “Ithu na no wi kheneng ghoben, kepaghenanye ithu na no ithu ssi wa Ammon nyithu ssikaghashen nu no pi Gilead wi anyithu tsüdi ccüliwa sa thsü mvu benle.”

⁹Jeftha na mathu wi keü, “Nthu na hi ssineng whala Ammon nyithu ssisa thsü, nu Apvüwa na khangkeya pi hi cü lethu, hi nthu miwi kekhang kesenwa sa thsü ben ma?”

¹⁰Mathu na luneng, “Anlo, ithu na no kekhi ti saben; Apvüwa na ithu chüzawa saben.”

¹¹Tsalina Jeftha na Gilead wi ccülikesathu gweghe wa, nu anyithu na ma pi mathu miwi kekhang kesenwa nu ccüliwa sa thsüa. Jeftha na Mizpah wi Apvüwa tuwi na ma jüh tsü khishichi.

¹²Tsaseng wi Jeftha na nyilothu kesun pi Ammon nyi kadimiwa wi chi nu khi, “No mangkesa ghena ithu ssinu kitagha ben nu? No mangkesa na ithu yyi nka ben nu? ”

¹³Ammon nyi kadimiwa na Jeftha nyilothu wi khineng, “Israel nyithu na Ejipt wina keshhugho wi mathu na iyyi Arnon Ghaku na wa Jabbok Ghaku nu Jordan Ghaku kecu nkaya cüle. Nthu na khili kemehaiwa wina tsü khuneng pi cü nsathu yishü.”

¹⁴Jeftha na nyilothu kesun pi Ammon nyi kadimiwa wi chi neng

¹⁵nu hati khi thsü: “Jeftha na ha khiben: Israel na Moab nyelela Ammon nyithu yyi nkaya nsale.

¹⁶Hati sale: Israel nyithu na Ejipt teshi nu keshhugho wi mathu na ayyikeshü tsü pvüdhi sen Aqaba yyitssükevü nu Kadesh wi ghoya.

¹⁷ Ciwi mathu na nyilothu kesun pi Edom kadimiwa wi mathu ya ma yyi pvüdhi waya thsülo keü thsü. Isala Edom kadimiwa na mathu ya tsüti nsa thsü mvula. Mathu na Moab kadimiwa wi la keü, isala ma la mathu ya ma yyi npvüdhi wa thsü mvula. Tsalina Israel nyithu na Kadesh wi ngan wa.

¹⁸ Tsaseng wi mathu na ayyikeshüwa tsü pvüdhi sen Edom nu Moab yyi tsü vü sen nu Moab na nishuwa Arnon Ghaku khhaka witsü ghoya. Mathu na ciwi kemnanpen saben, isala mathu na Arnon tsü npvüdhi kepaghenanye tsüna Moab ggü saben.

¹⁹Tsaseng wi Israel nyithu na nyilothu kesun pi Amor nyi Heshbon wi kadimiwa Sihon wi chi, nu ma diyyiwa tsü pvüdhi sen nu mathu yyi wi wale kesalina ma wi keü.

²⁰Isala Sihon na Israel nyithu ya tsüti nsa thsü mvula. Ma süpahizi maben ssigho Jahaz wi mnan nu Israel nyithu ssikaghashen.

²¹Isala Apvüwa Israel Nyizawa na Sihon nu ma süpahizi miwi khangkeya pi Israel nyithu cüa. Tsalina Israel nyithu na diyyiwa ciwi hang keben Amor nyithu yyi tsüdila yaya.

²²Mathu na Amor nyithu yyi tsüdi, acülawa Arnon na wa aghawa Jabbok kecu nu nishuwa ayyikeshüwa tsüna wa niduwa Jordan kecu nkaya.

²³Tsalina tsüna Apvüwa Israel Nyizawa tsü ghena le, ma ma nyithu Israel ghena Amor nyithu jügüshi cüle.

²⁴No tsü khuyaneng le saben kwe? Ncenpvü Khemosh na mangwa pi no cü khe tsü pi theng yalo. Tsüti ithu la Apvüwa ithu Nyiza na pi ithu kecü tsüdi pi theng yaden.

²⁵ No kemeshen no Moab kadimi Balak tsawa Zippor miwi mehaiki le saben kwe? Ma Israel ssinu kitagha nyelela ithu ssinu aghisa kwe?

²⁶Amapi meza kecheng ha Israel na Heshbon nu Aroer, nu tsüthu kevü wi anyunutithu, nu Arnon Ghaku ghüsa wi anyunutithu tsüdi wi ben wadha. No mangkesa na tsü tsüwi tsüthu khuneng meyala nu?

²⁷Nyele, hi ntuwi mangla nsazzile. Isala no hi ssinu aghikesa ha sazzi benle. Apvüwa na pendhewa saben. Ma Israel nyithu nu Ammon nyithu jüwi kekivvü hawa ha südhe cüben.”

²⁸Isala Ammon kadimiwa na Jeftha wina kesun kechi ketsijühwa tsü nkinala.

²⁹Tsaseng wi Apvüwa ghamu na Jeftha miwi dugho. Ma Gilead nu Manasseh pvüdhiwa nu Gilead yyi Mizpah wi ghoya, nu ciwi na Ammon wi wa.

³⁰Jeftha na Apvüwa wi kishen: “Keujüla no Ammon nyithu miwi khangkeya pi hi cü lethu,

³¹hi khangya nu ijjen wi kewhaneng wi mangwa na atuwa shhugho hi metuya khe tsüna Apvüwa jile, nu hi tsü pi ahhansha sala mecang pi no cüaben.”

³²Tsalina Jeftha na aghaku pvüdhi wa Ammon nyithu ssisa, nu Apvüwa na khangkeya pi ma cüa.

³³Ma Aroer na wa Minnith kecu nu wala Abel Keramim kecu wi anyunutithu ngwe yasa. Ciwi anyi kejon pathia nu Ammon nyithu na Israel nchala.

³⁴Jeftha na ma jjen Mizpah wi kewhaneng wi ma nga na tamborin kihhe sen nashü shhugho ma metu. Ma nga na nzawa tsü ketan.

³⁵ Ma ma nga mukeya wi ahathanala ma thsümeni mezüqhe nu khi, “Oh inga! No ileben pachadha le! Mangkesa na no hi sapi ketizen nsathu keyishü sadha nu? Hi Apvüwa tuwi kekishen kesü satheng nu hi tsü bhegheya nbendha le!”

³⁶Nzawa na luneng, “Iba, no Apvüwa wi njüh khuchidha. Hi pi njüh khishiketheng ti sayalo, Apvüwa na nmiwi nghinyi Ammon nyithu jukhiyadha.”

³⁷Isala ma ma ba wi khie, “Hi kekhie kesü ha sa cülo. Hi pvünyimetha wi nshüthu keyishü ghena ipvüshangthu ssi wa ayikha wi keqoe nu anongü yathsüle kesalina matsü asha keni pi hi cülo.”

³⁸Ma ma nga wi “No waya mehaile” kiza nu ma kesun pi asha keni ghena wa thsüa. Nzawa nu ma pvüshangthu na gweghe ayikha wi wa nu qai, kepaghenanye ma n-nu nwa nu ashicü nmila shüa tendha.

³⁹Asha keni seng wi ma ma ba wi kheneng gho. Ma ba na ma pi Apvüwa wi ajüh khishiketheng ti sa. Nu ma pvünyimetha kesü sa keben wi shüa. Ha wina Israel nyi kahang yenwa tsü sa keshhugho.

⁴⁰tsüna Israel nyi nzathu na amapi kaghapenla wala Gilead wi Jeftha ngawa kemeshen ghanan mejü saden.