Read Northern Rengma Naga PENDHENYI 12 Bible Online

PENDHENYI 12 - Northern Rengma Naga bible

PENDHENYI 12

¹Efraim nyithu na aghikesa ghena kidenya; mathu na Jordan Ghaku pvüdhi sen Zafon wi wa nu Jeftha wi kiza, “No mangkesa na ithu ci sen nu gweghe nwala aggü pvüdhi wa Ammon nyithu ssikaghashen ten nu? Ithu na nthu pi nthu jjen wwala mecang tendha.”

²Isala Jeftha na mathu wi kiza, “Hi nu inyithu na Ammon nyithu ssinu kitagha ntsa sadha. Hi nthu cichi lela nthu na mathu kwen wi hi kekashaya nkesale.

³Nthu na hi kiqa nkeben mukeya wi hi kahang khuchi nu aggü pvüdhi wa mathu ssisa, nu Apvüwa na mathu miwi khangkeya pi hi cüle. Tsalina nthu mangkesa na khili gho hi ssisale saben nu?”

⁴Tsaseng wi Jeftha na Gilead wi anyithu tsüdi saghuya, nu Efraim nyithu ssisa nu mathu chaya. (Efraim nyithu na khitheng, “No Gilead nyithu, Efraim nu Manasseh wi kebenthu nthu na Efraim teshi nu bvü kesathu.”)

⁵Efraim nyithu ya nbvü thsüle kesalina Gilead nyithu na Jordan kepvüdhi penthu tsü nkaya. Efraim nyithu kesü le kesü lela gho “Hi ya pvüdhi wa thsülo” khie lethu, Gilead nyi na ma wi keü, “No Efraim nyi kesü kwe?” Keujüla ma “Nyele” khithu,

⁶mathu na ma ya “Shibboleth” khi nanlo kiza. Isala ma mehai tsü khi meyala “Sibboleth” khi lethu, mathu na ma ghanya nu ciwi Jordan kepvüdhi pen kesü wi ma pathiden. Tsü tsü wi Efraim nyithu hazar jügha nu keni pathia.

⁷Jeftha na amapi tugho Israel ccüliwa sa. Tsaseng wi Jeftha na shü nu pi ma nyutiwa Gilead wi vhüa.

⁸Jeftha seng wi Bethlehem wina keghowa Ibzan na Israel ccüliwa sa.

⁹Ma atsa changha nu anga changha na ben. Ma ma ngathu pi hashonthu wi n-nuwa thsüa, nu hashon ghalathu changha yapi ma tsathu wubvü sa thsüa. Ibzan na amapi tagü Israel ccüliwa sa;

¹⁰tsaseng wi ma shü nu pi Bethlehem wi vhüa.

¹¹Ibzan seng wi Zebulun nyiwa Elon na amapi tagha Israel ccüliwa sa.

¹²Ma shü nu pi Zebulun yyi wi Aijalon wi vhüa.

¹³Elon seng wi Pirathon wina keghowa Hillel tsa Abdon na Israel ccüliwa sa.

¹⁴Ma atsa jügha nu atsa tsathu changha na gadathu achentagü ssiketen na ben. Abdon na amapi tazen Israel ccüliwa sa,

¹⁵nu ma shü nu pi Amalek nyithu yyishiphon diyyiwa Efraim yyi wi Pirathon wi vhüa.