Read Northern Rengma Naga PENDHENYI 18 Bible Online

PENDHENYI 18 - Northern Rengma Naga bible

PENDHENYI 18

¹Tsü tsüwi Israel wi kadimi nmi. Tsü kecu wi Dan mizza na mathu kahang pen ayyi bhaden, kepaghenanye mathu na Israel mizzathu jawi mathu shei ayyi npi muya.

²Tsalina Dan nyithu na mathu mizza tsüdi jawi kesaqo nyi meshu manga kessiya nu Zorah nu Eshtoal nyuti keni wina kesun pi ayyi wahhai sa wa thsü nu khi, “Wala ayyi tsü hhainanlo.” Mathu na gho Efraim yyishiphon diyyiwa cukeya wi Mika jjen wi ben.

³Mathu na ciwi keben wi Levi nyi pvüzawa tsü jühkekhi hhai chüya nu mathu na ma wi wa keü, “Thowa na no ssigho nu no hewi mangwa saben nu?”

⁴Ma luneng, “Mika na athün pi hi cü nu hi ma keqhaikediwa sabenle.”

⁵Mathu na ma wi khi, “No nchala, Anyiza wi ithu na kijünyi wa keten ha haicenya benla nye khe keü nanlo.”

⁶Keqhaikediwa na khineng, “Mangla nthu leben ketizen nsala. Apvüwa na kijünyi kewa wi ha nthu ssiden.”

⁷Tsalina ma manga na apen tsü teshi nu Laish nyuti wi wa. Mathu ciwi anyithu na Sidon nyithu ti yazishu hang keben muya. Mathu na anyi ccatssü, ceen, thola ssinu kicennali nmi, nu mathu nsenthu keyishü tsüdila ben. Mathu na Sidon nyithu ssinu temeja wi hangden, nu anyi kepathu ssinu mangla sa nten.

⁸Meshu manga tsüna Zorah nu Eshtoal wi kegho neng wi mathu nyithu na mathu wi keü, “Nthu na ciwi mangwa muya nu?”

⁹Mathu khineng, “Shaghalo! Ithu na wala Laish ssikaghashen na; kepaghenanye ikhang na ayyi tsüna mehai ntsawa muyadhale. Hewi mangla nsala nben lalo! Shishi wa ayyiwa tsü yayalo!

¹⁰Nthu na wa tsü cukeya wi anyithu na nyu kemeshensa nkemi muyaben. Diyyiwa tsüna di ntsa; ciwi anyithu na nsenthu keyishü tsüdila ben, nu Anyiza na ayyi tsü pi nthu cüdhale.”

¹¹Tsalina Dan mizza nyi meza tugho na aghisale kesalina Zorah nu Eshtoal teshi nu wa.

¹²Mathu na wa Judah wi Kiriath Jearim na niduwa kemnanpen sa. Tsalina khili kecu apen tsüpi Dan Kemnanpen le khiden.

¹³Mathu ciwi na Efraim yyishiphon diyyiwa wi Mika jjen wi ghoya.

¹⁴Tsaseng wi meshu manga diyyiwa Laish kevü wi hhainan kewathu na mathu pvüshangthu wi keü, “Ajjen hathu kesü wi achan pi atsizhü nu rükatssü pi meju ketheng na keben tsü nthu na chüben ma? Ciwi atsikezhü kepathu nu adepfü kewhengthsü la ben. Khili ithu na khati nsathu yishü le meshen ben nu?”

¹⁵Mathu na Mika jjen wi Levi nyi pvüzawa na hang keben witsü du nu ma cüki keü.

¹⁶Tsü tsüwi Dan nyi süpahi meza tugho aghisale kebenthu tsüna kaghapeng jenka wi nganben.

¹⁷Wahhaithu manga tsüna meshonqhe ajjen wi du nu achan pi atsikezhü nu rükatssü pi meju ketheng, atsikezhü kepathu, nu adepfü kewhengthsü tsü khuya, tsü tsüwi keqhaikediwa na anyi aghighe kidenpvü keten meza tugho tsü gweghe kaghapeng jenka wi nganben.

¹⁸Anyithu na Mika jjen wi du kemetha tsanqaithu tsü khuya nan keqhaikediwa na mathu wi keü, “Nthu na ha mangwa saben nu?”

¹⁹Mathu na ma wi kiza, “Ceen benlo. Ajüh kesüla nkhila. Ithu gweghe ghala ithu kesansiwa nu keqhaikediwa salo. No Israel mizza maben ghena nyela atheghi kesü ghena ketan keqhaikediwa saten kwe?”

²⁰Hawa ha keqhaikediwa tsü sapi anonghe ntsa sa thsü kesalina ma kemetha tsanqaithu tsü khuya nu anyithu gweghe wa.

²¹Mathu na khapegheya nu mathu tsangathu, asahangthu, nu atsanqaithu pi atuwa sala wa thsüa.

²²Mathu na alenkesie kewa seng wi Mika na ma jenphonthu cighu pi aghisale saya. Mathu na wa Dan nyithu jügüya

²³nu mathu wi jishachi. Dan nyithu na khapeghe nu Mika wi keü, “Mangwa jjügi ghena no anyitenti hati ssiten nu?”

²⁴Mika na khineng, “Nthu na ‘Mangwa jjügi ghena nu’ khi keben tsü ma jjügi mangwa? Nthu na hi keqhaikediwa nu hi sa ketheng acenpvüthu khuya nu bvüa. Hewi ighena mangwa ben nu?”

²⁵Dan nyithu na ma wi khi, “No mangla nkhila kesawa nghena mehaile; nyelethu, anyi hathu na aghepvü nu no ssikaghashen ben. No nu ntheghi mabenla shüaben.”

²⁶Tsaseng wi Dan nyithu na wa. Mika na anyi tsüthu na ma ghena khang mtsü kesa muya kesalina khapeghe sen ajjen wi wha neng.

²⁷Dan nyithu na keqhaikediwa nu Mika na kesa atsanqaithu tsü khukeya seng wi mathu na wa Bethrehob yyiketijü wi anyithu na ccatssü, nu anyuti ceen kesawa Laish tsü ssikaghashen. Mathu na ciwi kahangthu pathi nu anyuti tsü mecang. Ciwi thola mathu hangsha meya, kepaghenanye Laish na Sidon ssi temeja nu mathu na anyi kepathu ssinu mangla sa nten. Dan nyithu na anyuti tsü sapfüneng nu ciwi hang wa.

²⁹Mathu na Laish nyan tsü kemili pi mathu baqhai Jakob tsawa Dan cia.

³⁰Dan nyithu na atsikezhü pieki nu kinyi, nu Mosa tsawa Gershon tsa Jonathan pi mathu keqhaikediwa sa thsü, nu anyithu ghan sen kushiyyi wi npi kewa chu ma shicüthu pi mathu keqhaikediwa sa thsü.

³¹Shilo wi Nithsüjjen wi Anyiza kinyi keben chu Mika ji atsikezhü tsü la ciwi ben.