Read Northern Rengma Naga PENDHENYI 2 Bible Online

PENDHENYI 2 - Northern Rengma Naga bible

PENDHENYI 2

¹Apvüwa nyilowa na Gilgal wina Bokhim wi wa Israel nyithu kiza, “Hi Egipt wina nthu ssi shhugho, nu nthu ssi wa hi nthu bamyithu wi khishiketheng yyiwa wi chicü. Hi khi, ‘Hi khie wila nthu ssinu cenkethenjüh tsü pakhhi nben.

² Nthu na ayyi hewi kahangthu ssinu cenkethenjüh sayishü. Nthu na mathu kekinyipen tsü yasa nsathu yishü.’ Isala nthu na hi mangwa le nthu kiza khe tsü nsa. Nthu na hi nsa lalo kekhiwa tsü sadha le!

³Tsalina hi khili nthu kizaden, nthu na atujügüwa lela hi anyi hathu ha jügüshi nten. Mathu na nthu ghinyithu, nu mathu cenpvüthu kekinyi wi nthu yasa ben.”

⁴Nyilowa na ha khi kechi wi Israel nyithu tsüdila qaiwa,

⁵tsalina apen tsü pi Bokhim[2] cia. Ciwi mathu na ahhansha sapi Apvüwa cü.

⁶Joshua na Israel nyithu kesun pi bvü thsüa, nu mathu meshu kesüsü wa ma shei ayyi tsü yapi ma ji saya.

⁷Joshua na hang keben chu Israel nyithu na Apvüwa kekuli sa, nu ma keshü seng wi lela ccülikesathu mathu nyon pi Apvüwa na Israel ghena pala kedi sa kechi tsüdila muya kesathu na hang keben chu anyithu na tsüti sa.

⁸Apvüwa maghawa Nun tsa Joshua na ma kahang mapi meza nu tagha wi shüa.

⁹Ma pi ma yyi Gaash Yikha na aghawa Efraim yyishiphon diyyiwa wi Timnah Sera wi vhüa.

¹⁰Abvüye tsüwa mabenla shü, nu abvüye ketheüwa na shagha Apvüwa na ma Israel ghena mangwa sachi khe nchüla.

¹¹Tsaseng wi Israel nyithu na sami pi Apvüwa shun nu Baal kekuli sa wa.

¹²Mathu na Apvüwa, mathu bamyithu Nyiza Egipt wina mathu ssi keshuwa tsü nkinyila acenpvü kepathu mathu kevü wi keben nyi cenpvüthu tsü kinyi wa. Mathu na kukedu tsüthu kinyi nu Apvüwa sapi aghepvü thsüa.

¹³Mathu na Apvüwa nkinyila Baal nu Astaret kekuli sa wa.

¹⁴Tsalina Apvüwa na Israel miwi aghepvü nu shudsa ketenthu ya mathu ssikaghashen nu mathu ji shuya thsüa. Ma mathu ghinyithu yala mathu tsüdi miwi khangya thsüa, nu Israel nyithu na mathu ketanla mathu khwe meyala.

¹⁵Mathu na aghikewa tsüdi wi Apvüwa na ma sale kekhi ti ma mathu shun. Mathu na ahathana ntsa sa.

¹⁶Tsaseng wi Apvüwa na Israel nyi pendhethu pi cü nu shudsa ketenthu kwen wina mathu hangshaya thsüa.

¹⁷Isala Israel nyithu na mathu pendhethu jüh nkina. Israel na Apvüwa wi jühtsentsa nsa nu acenpvü kepathu kinyi wa. Mathu bamyithu na Apvüwa yenkhukechithu tsü nieya, isala abvüye ketheüwa ha na wan tsü malia.

¹⁸Khathansha wi Apvüwa na Israel pendhewa kesü kesunchi khe pendhewa tsüna hang keben chu Apvüwa na ma kiqa pi ghinyithu kwen wi anyithu hangshaya thsü thsü isa. Anyithu na ketizenkesa nu agükeccü ghena kiqai ghena Apvüwa na mathu nantizen chicü.

¹⁹Isala pendhewa tsüna shü lethu, anyithu na kheni kahang yencüki wi hang wa nu abvüye wa kesawa miwi nmehaikila isasa. Mathu na acenpvü kepathu kinyi nu kekuli sa, nu mathu nkemehai len wi leben dhula saki sa.

²⁰Tsalina Apvüwa na Israel miwi aghepvü nu khi, “Mizzatenti hawa ha na hi mathu bamyithu na nie yalo kekiza cenkethenjühwa tsü pakhhidha. Mathu na ijüh nkinala kesalina,

²¹hi Joshua keshü yyi wi mizzatentithu hang keben kesüla njügüshila tendha.

²²Hi tsüthu sen nu Israel nyi hathu na mathu bamyithu ti Apvüwa len wi bentenla nye khe chüyaden.”

²³Tsalina Apvüwa na mizzatenti hathu ya ayyi ciwi ben wa thsüa; ma Joshua yala tsüthu miwi khang meya thsü, nyelela ma Joshua na shü meyi tsüthu jügüshi nsa.