Read Northern Rengma Naga PENDHENYI 20 Bible Online

PENDHENYI 20 - Northern Rengma Naga bible

PENDHENYI 20

¹Israel nyi tsüdi aghawa Dan na wa acülawa Beersheba, nu nishuwa Gilead yyi kecu wi anyithu na ghola Apvüwa tuwi Mizpah wi akhang kesütan saya.

²Israel mizzathu tsüdi wi accülikesathu nu süpahi 400,000 na Anyiza nyithu na saghu keben hawi ben.

³Tsü tsüwi Benjamin nyithu na Israel nyithu tsüdi Mizpah wi saghuben le kesa zaya. Israel nyithu na keü, “Kesami khati kesa sa khe pi ithu kiza ma?”

⁴Levi nyi nyu ma wubvü meshibvüwa pathi kesawa na luneng, “Iwubvü meshibvüwa ishinyi na ghaja kesü Benjamin yyi Gibea wi benle wa.

⁵Gibea nyithu na aghaja wi gho hi ghanyale ajjen vüya. Mathu na hi pathiale sa; tsüti kesawa nyela mathu na iwubvü messameshü nu ma shüle.

⁶Hi ma kamang tsü khuya nu pi denthiya, nu tsü kesüsü pi Israel mizzathu taghakeni wi kesun chile. Anyi hathu na ithu jawi nkemehai nu nkemetha kekuli sadha.

⁷Hewi keben nthu tsüdila Israel nyithu. Ithu ha ghena mangwa khati saten nu?”

⁸Anyi tsüdila gweghe shagha khi, “Ithu kesüla, ma anithsüjjen nyelela ajjen wi hangten lela ajjen wi wha nten.

⁹Ithu na hati saden: Ithu na akezen wwi nu anyi pahan kessi pi Gibeas ssikaghashen thsüden.

¹⁰Israel mizzathu tsüdi wi anyi tagha wi kesü na kedsakejjü pvüpi süpahizi cü, nu kepathu na wa Gibeat metenmesha den, kepaghenanye mathu na Israel miwi nkemetha kekuli ha sadha.”

¹¹Tsalina Israel nyithu tsüdila ajjügi kesütan ghena anyunutiwa tsü ssikaghashenle kesa saghuya.

¹²Israel nyi mizzathu wi nyilothu kesun pi Benjamin mizza tsüdi wi chi nu khi, “Nthu na nkemehai kesami sa ketheng ha mangwa kesa ghena nu?

¹³Khili Gibea wi nkemehai kesathu tsü khuchilo, isanu ithu na mathu pathi nu Israel jawi nkemehai ha khushiale kesalina.” Isala Benjamin nyithu na Israel nyi kepathu jüh tsü nkinala.

¹⁴Benjamin nyi nyunuti tsüdi wi anyithu na gho Gibea wi saghuya nu Israel nyi kepathu ssisale sa.

¹⁵Tsü ghanan mathu na mathu nyunuti wi süpahi hazar ngwe nu tugho cichi. Ha miwi la, Gibea wi kahangthu tavüwa kepie nyi meza tagü kessi pi saghu theng. Mathu tsüdila alon pi alissen kesüla kecenzzi nketen nyi ketan.

¹⁶

¹⁷Benjamin mizza nyi nsila Israel nyi süpahi aghikemehai 400,000 saghuben.

¹⁸Israel nyithu na Bethel wi kekinyipen wi wa nu ciwi mathu na Anyiza wi keü, “Amizza khawa na atuwa sa Benjamin nyithu ssikaghashen nu?” Apvüwa na luneng, “Judah mizza le.”

¹⁹Tsalina Israel nyithu na dhitsü ghanenwa wi wala Gibea nyunuti kete wi kemnanpen sa.

²⁰Mathu na wa Benjamin nyi süpahizi ssikaghashen le nu süpahithu na anyunutiwa kejentan wi kiden senben.

²¹Benjamin nyi süpahizi na anyunutiwa wina shhugho nu tsü ghanan mathu na Israel nyi süpahizi hazar ngwe nu keni pathia.

²²Tsaseng wi Israel nyithu na wa kekinyipen wi minulen kecu Apvüwa tuwi anongü. Mathu na ma wi keü, “Ithu na kheneng wa aghisa pi ithu cünyu Benjamin nyithu shunla khati nu?” Apvüwa na luneng, “Anlo, wala mathu ssisalo.” Tsalina Israel nyi süpahizi na kempvüza sa nu mathu süpahithu pi ghanie keben pen wi kheneng kiden sen nu ben thsüa.

²³

²⁴Mathu na alentsen sen keni tughuwa Benjamin nyi süpahizi tsü shun wa.

²⁵Nu keni tughuwa Benjamin nyithu na Gibea wina shhugho, nu mathu na Israel nyi süpahithu hazar tagha nu tazen pathia.

²⁶Tsaseng wi Israel nyi tsüdi Bethel wi shula anongü. Mathu na ciwi ndsajjüla minulen wi kecu Apvüwa tuwi donki. Mathu na Apvüwa tuwi wa mecang pi kekinyi nu kecca ghena kekinyithu sachi.

²⁷Tsü tsüwi Anyiza wi Cenkethenjüh Khitson tsüna Bethel wi ben, nu Aaron tsawa Eleazar tsa Fineha na tsü kenonccawa saben. Anyithu na Apvüwa wi keü, “Ithu na kheneng wa ithu cünyu Benjamin nyithu ssisala teshia nu?” Apvüwa na luneng, “Wala ssisalo. Hi ghanen wi mathu miwi khangkeya pi nthu cüaden.”

²⁸

²⁹Tsalina Israel nyithu na süpahithu pahan pi Gibea kevü wi kuthi thsüa.

³⁰Tsaseng wi mathu na kecheng ghanan wi Benjamin nyi süpahizi ssisale wa nu mathu süpahithu pi hatuwi mathu na kesa ti Gibea kepeghewa aghi ghena kidenya thsüa.

³¹Benjamin nyithu na anyunuti wina shhugho anyithu ssisa. Mathu na hatuwi kesa ti shhugho ayela wina Bethel nu Gibea kewalen wi Israel nyithu meshu changha cen pathia.

³²Benjamin nyithu na khi, “Ithu na hatuwi ti mathu sa cüdhale!” Israel nyithu na aseng kheneng nu anyunuti wina mathu ssi shhula alenthu wi chile kiden theng.

³³Tsalina Israel nyi süpahizi ghontiwa na aseng khenneng wa Baatamar wi saghu neng keya wi anyithu na Gibea kevü alonshi jawi mathu kekuthi penthu wina wan shhugho anyunutiwa tsü vüya.

³⁴Israel nyi tsüdi jawi kessishi ketheng anyi hazar tagha na wa Gibea ssisa, nu kesali tsüna khang ntsa sa. Benjamin nyithu na mathu yasa tendha kesa tsü chü meyala.

³⁵Apvüwa na Benjamin nyi süpahizi miwi khangkeya pi Israel cüa. Tsü ghanan Israel nyithu na aghinyi 25,100 pathia,

³⁶nu Benjamin nyithu na mathu nyu nchala kesa chüya. Israel nyi süpahizi tentiwa na Benjamin nyithu wina aseng kheneng kepaghenanye mathu na anyithu pi Gibea vüla kuthi thsü kethengthu miwi kenondi ben kesalina.

³⁷Anyi hathu na kaghajila Gibea wi bvü wa, mathu na anyunutiwa witsü bvüzighe nu ciwi anyi tsüdila pathia.

³⁸Israel nyi süpahizi tentiwa nu anyi kuthi kebenthu na azensu kesü sapi kecüli theng. Khathansha wi mathu na anyu wi annikekhu kedi na keshhugho muya khe,

³⁹Israel nyithu na aghikesa pen wina aseng kheneng. Ha tsü wi ha Benjamin nyithu na Israel nyithu meshu changha pathidha. Mathu ketanla mathu wi khi, “Ithu na hatuwi ti mathu sacüdha le.”

⁴⁰Tsaseng wi azensuwa tsüna shhugho; annikekhu kedi kesü na anyutiwa wina shhugho. Benjamin nyithu na mathu seng wi ghangchi nu anni na anyutiwa mabenla mecang keben mu pi mathu mansa.

⁴¹Tsaseng wi Israel nyithu na aseng kheneng, nu Benjamin nyithu na leben güccü kepaghenanye mathu yasa tendha kesa mathu na chüyadha.

⁴²Mathu na Israel nyithu wina kheneng nu bvüsen aghansha kepeghewa wa, isala mathu na bvü meyala. Mathu na süpahi zitentiwa nu anyi anyunutiwa wina shhugho ketenthu manyi jüwi sadha, nu mathu yasa.

⁴³Israel nyithu na aghinyi ghanya, nu n-nganla mathu jügü sen nu Gibea na nishuwa kecu wi wa mathu pathia.

⁴⁴Benjamin nyi süpahi kemehai ntsathu hazar tagha nu tazen pathia.

⁴⁵Kepathu na bvüsen Rimmon Lonshi ghansha kepeghewa wa. Alenca wi mathu hazar manga pathia. Israel nyithu na kepathu jügü sen wa Gidom wi hazar keni pathia.

⁴⁶Tsü ghanan Benjamin nyithu tsüdi süpahi kempvüza ntsathu hazar ngwe nu manga pathia.

⁴⁷Isala anyi meza tugho na bvüya nu wa Rimmon Lonshi ghansha wi asha mejü ciwi ben.

⁴⁸Israel nyithu na kheneng wa Benjamin nyi kepathu ssisa nu mathu npvüza, nza, ghanyithu, nu asahangthu tsüdila pathia. Mathu na ciwi anyuti tsüdila mecang.