Read Northern Rengma Naga PENDHENYI 21 Bible Online

PENDHENYI 21 - Northern Rengma Naga bible

PENDHENYI 21

¹Khathansha wi Israel nyithu na Mizpah wi saghuya khe, mathu na Apvüwa wi kekishen kesü sa, “Ithu thola Benjamin nyi yala ithu nga kesüla yathsü nten.”

²Tsalina Israel nyithu na Bethel wi wa minulen wi kecu Anyiza tuwi donki. Mathu na misikhhali qai ntsa nu anongü:

³“Apvüwa Israel Nyiza, mangkesa na hati sa nu? Mangkesa na Benjamin mizza na Israel wi nmila tendha nu?”

⁴Ghanenwa wi anyithu na mitu na shagha ciwi kekinyipen kesü saya. Mathu na kecca ghena kekinyi nu mecang pi kekinyi sachi.

⁵Mathu na keü, “Israel mizza tsüdi jawi akhang kesüla Mizpah wi Apvüwa tuwi kesaghu wi nkewa na ben kwe?” (Mathu na anyi thowa na Mizpah wi nwa khe ma pi shü thsüaden kesa kekishen kesü sa theng.)

⁶Israel nyithu na mathu cünyu Benjamin nyithu ghena leben güccü nu khi, “Nansü Israel na ma mizza kesü bhataghadha.

⁷Benjamin nyithu ghena awubvüthu bha pi cüle kesa ithu na khati sa nu? Ithu ngathu pi mathu kesüla cü nbenle kesa ithu na Apvüwa tuwi kekishen kesü sadha.”

⁸Khathansha wi mathu na Israel mizzathu jawi akhang pahan na Mizpah wi kesaghu wi nkewa na ben kwe keü kechi khe, mathu na Gilead yyi Jabesh wi kahangthu kesüla nwale kesa muya;

⁹süpahizi nyan ci kechi wi Jabesh wi kesüla nluneng la.

¹⁰Tsalina azitenti na anyi kempvüza ntsa hazar taghakeni wi ahza hati khi nu kesunchi, “Wala Jabesh wi anyi tsüdi, kinyibvü pi ghanyithu saghu pathilo.

¹¹Npvüzathu nu nza pvünyimetha nkenyethu tsüdila pathilo.”

¹²Mathu na Jabesh wi anyithu jawi nza pvünyimethathu meza mejü muya, tsalina mathu na tsüthu ssinu Kanaan yyi wi Shilo wi kemnanpen wi gho.

¹³Tsaseng wi azitenti na aghi zanthiale kesa ajüh kesun pi Rimmon Lonshi wi Israel nyithu wi chi.

¹⁴Benjamin nyithu na kheneng gho nu Israel nyi kepathu na mathu Jabesh wi npathila kesa nzathu tsüpi mathu cüa. Isala tsüthu na mathu ghena zeng metsü.

¹⁵Anyithu na Benjamin nyithu ghena leben güccü kepaghenanye Apvüwa na Israel mizzathu jühjja kemecewa tsü pakhidha.

¹⁶Tsalina saghukeben ccülikesathu na khi, “Ciwi Benjamin mizza wi nza nmidha. Ithu na npvüza awubvü npi keyathu ghena khati sa nu?

¹⁷Israel na ma mizza taghakeni wi kesü na bhatagha thsü yishü. Benjamin mizza ya hangya thsüle kesalina ithu na alen kesü bha meyathu yishüdha,

¹⁸isala mathu na ithu ngathu yaya thsü nben, kepaghenanye anyi thowa na Benjamin nyi kesü yala ithu nga kesü yaya thsü khe ithu na kishen-keshi kesü pi ma miwi chidha.”

¹⁹Isanu mathu kemeshen na, “Amapi keshu Shilo wi Apvüwa khowa sa ketenwa tsüna wan gho tendhale sa.” (Shilo hana Bethel na aghawa, Lebanon na acülawa, nu Bethel nu Shekhem manyi jüwi alen na nishuwa.)

²⁰Mathu na Benjamin nyithu kiza, “Wala kemeshentsse lli wi kuthi

²¹nu hieben lalo. Khathansha wi Shilo wi ghalathu na akho tsüwi nashüle shhugho khe, nthu na kemeshentsse llithu wina shhugholo. Nthu kesüsü tsüdila wa ghalathu jawi awubvü kesüsü zanya nu ma ssisen nthu gweghe Benjamin yyi wi wa nenglo.

²²Keujüla mathu bathu nyelela baghathu na nthu na mathu wi kizaya mehai, ‘Nchala, mathu pi ithu gweghe ben thsülo; kepaghenanye ithu na mathu pi ithu wubvüthu sale aghi wina mathu zan meya. Nu nthu na mathu pi ithu nkecü ghena nthu na nthu jüh khishiketheng tsü pakhhi nbenle.’ ”

²³Benjamin nyithu na hati sa; mathu kesüsü tsüdila ghalathu na Shilo wi nashü keben wi awubvü kesüsü kessiya nu mathu ssinu bvüa. Tsaseng wi mathu na mathu yyi wi wha neng, mathu nyunutithu sapfü nu ciwi hang wa.

²⁴Tsü tsüwi Israel nyi kepathu la apen tsü teshia, nu anyi tsüdila ma mizza, theghi, nu ma keben-keyeng wi wha neng.

²⁵Tsü tsüwi Israel jawi kadimi nmi. Anyi tsüdila ma kenenwa tsü saden.