Read Northern Rengma Naga PENDHENYI 4 Bible Online

PENDHENYI 4 - Northern Rengma Naga bible

PENDHENYI 4

¹Ehud keshü seng wi Israel nyithu na kheneng sami pi Apvüwa shun.

²Tsalina Apvüwa na Kanaan nyi kadimi kesü Hazor nyunuti wi kekhang sen kebenwa Jabin yala mathu miwi khangya thsüa. Ma süpahizi wi benchüwa na Sisera, Anyiza nkechüthu nyu Harosheth wi hang ketenwa.

³Jabin na amighe gorugarithu meza tugu ben, nu ma daggü nu yasayala ntsa sala amapi ngwe Israel nyithu miwi kekhang sen. Tsalina Israel nyithu na qai nu Apvüwa wi kekiqa khie.

⁴Deborah, Lappidoth wubvü atusenjüh-kechü kesü sa, nu ma tsü tsüwi Israel ghena pendhenyi kesü saben.

⁵Ma wa Efraim yyishiphon diyyiwa wi Ramah nu Bethel manyi jüwi palm ton kesü ccü wi donki benden, nu Israel nyithu na ciwi ma ajüh südhe kecü tsü bha waden.

⁶Ghanan kesü wi ma Naftali wi Kedesh nyunutiwa wi Abinoam tsa Barak cichi nu ma wi khi, “Apvüwa Israel Nyizawa na ahza ha khuchi pi no cüben: ‘Naftali nu Zebulun mizza keni wi anyi hazar tagha ssiya nu mathu ssisen Tabor Yikha wi walo.

⁷Hi Jabin süpahizi benchüwa Sisera ssigho Kishon ghaku wi no ssisaden. Ma gorugari nu süpahithu ssighoben, isala hi ma miwi khangkeya pi no cüaben.’ ”

⁸Barak na khineng, “No hi gweghe wa lethu, hi waben; isala no hi gweghe nwa lethu, hi la wa ntenle.”

⁹Nzawa na luneng, “Hi no gweghe waben, isala khangkeya ghena n-nyan kemehai sa nben. Kepaghenanye Apvüwa na Sisera pi nza kesü kwen wi chicüaden.” Tsalina Deborah na Barak gweghe Kedesh wi wa.

¹⁰Barak na Naftali nu Zebulun mizza keni cipi Kedesh wi chi, nu anyi hazar tagha na ma nie wa. Deborah na ma gweghe wa.

¹¹Tsü tsüwi Ken nyi Heber na Kedesh ketsaki wi Zanannim wi ayangton kete wi ma nithsüjjen satheng. Ma Ken nyi kepathu Mosa myiwa Hoba shicübvüghathu wina bvü kesawa tsü.

¹²Sisera na Barak na Tabor Yikha wi kidhale kesa chükeya wi

¹³ma amighe gorugarithu meza tugu nu ma nyithu tsüdi cichi nu Anyiza nkechüthu nyu Harosheth wina mathu kesun pi Kishon ghaku wi wa thsüa.

¹⁴Tsaseng wi Deborah na Barak wi khi, “Walo, Apvüwa na ntu sa waden. Nansü ma Sisera miwi khangkeya pi no cüdha.” Tsalina Barak na Tabor Yikha wina ma nyithu hazar tagha ssinu cü.

¹⁵Barak na ma süpahizi ssinu kaghashen kewa wi Apvüwa na Sisera, gorugarithu, nu ma nyithu tsüdila chükivvü thsüa. Sisera na ma gorugari wina cadugho alentsen sen nu bvüa.

¹⁶Barak na gorugarithu nu süpahizi jügü sen Anyiza nkechüthu nyu Harosheth wi wa nu Sisera süpahizi mabenla pathia. Anyi kesüla nheila.

¹⁷Sisera na bvüsen Ken nyi Heber wubvü Jael nithsüjjen wi wa, kepaghenanye Hazor wi kadimi Jabin na Heber theghi ssinu kemehai wi ben.

¹⁸Jael na shhula Sisera metu nu ma wi khi, “Kediwa, dugholo; inithsüjjen non wi dugholo. Nmessi lalo.” Tsalina ma ciwi du, nu nzawa na ma pi athsükeshondhi seng wi kuthia.

¹⁹Sisera na nzawa wi khi, “Hi dighe benle; no nchala atssü pi hi jjüya thsülo.” Nzawa na asahyu khüti lishü nu tsenitssü pi ma jjüya thsü, nu ma pi kuthi neng.

²⁰Tsaseng wi ma nzawa kiza, “Nithsüjjen jenka witsü nganlo, nu anyi pahan na ghola thola hewi benla nmi nu no keü lethu, no nmile khilo.”

²¹Sisera na ma nchala kesalina jenchi ntsa wa. Tsaseng wi Jael na kejenji nu nithsüjjen kejentenji kesü khuyanu nkhena ma wi wa, nu kejentenji tsü pi ma latan wi jenkhamighe pi ayyi wi cüchi nu ma shü thsüa.

²²Barak na Sisera bha kegho wi Jael na wa ma metu nu ma wi khi, “Hewi gholo! Hi no anyi bha ketenwa tsü pi no ccüca na.” Tsalina ma nzawa gweghe wa nu Sisera na nithsüjjen kejentenji pi ma li jenkhamighe pvü nu ayyi wi shü keben muya.

²³Tsü ghanan Anyiza na Kanaan kadimiwa Jabin miwi khangkeya pi Israel nyithu cüa.

²⁴Mathu na ma npi keyasa chu khang pfüpfü sa ma shun.