Read Northern Rengma Naga PENDHENYI 8 Bible Online

PENDHENYI 8 - Northern Rengma Naga bible

PENDHENYI 8

¹Efraim nyithu na Gideon wi khi, “Mangkesa na nthu na Midia nyithu ssikesali kewa wi ithu la ncichila nu? Mangkesa na ithu tuwi hati saten nu?” Mathu na ha ghena leben-nkaghajüh khi ntsa sa.

²Isala ma mathu wi kiza, “Hi sakeya tsüna nthu na mangwa sachi khe tsü tuwi mangla nye. No Efraim nyithu na keu sakechi tsüna igei mabenla sakechi miwi ma men benle.

³Anyiza kekhang wina nthu na Midia nyi kedi keni Oreb nu Zeeb manyi pathiyadha. Tsü miwi hi mangwa saya nu?” Ma ha khikechi wi mathu na ma miwi aghekepvü nmila.

⁴Ha tsüwi Gideon nu ma nyithu meza kecheng tsüna Jordan Ghaku pvüdhiyadha. Mathu na nchaladha, isala ce aghinyi jügüden.

⁵Mathu na wa Sukkoth cukeya wi ma anyuti nyithu wi khi, “Nthu nchala amesa pahan pi inyithu cülo. Mathu nchaladha, hi Midia nyi kadimithu Zeba nu Zalmunna jügütenle.”

⁶Isala Sukkoth wi ccülikesathu na khi, “Mangsale ithu na atsse pi nsüpahizi cü nu? Nthu na Zeba nu Zalmunna npi ghankeya na.”

⁷Tsalina Gideon na khi, “Isalethu, Apvüwa na Zeba nu Zalmunna manyi pi ikwen wi kechi seng wi hi ayyikeshü wi aghazü nu ataqae pi nthu kihhe cüben na!”

⁸Gideon na Penuel wi wa nu anyithu wi tsü makesü khi, isala Penuel wi anyithu la Sukkoth nyithu kekhi makesü khia.

⁹Tsalina ma mathu wi khi, “Hi kemehai sala kheneng gho metsiben, hi kheneng gho lethu, aducü ha pasha cüben na!”

¹⁰Zeba nu Zalmunna manyi na Karkor wi manyi süpahizi ssinu ben. Yyikeshü wi mizza nyithu süpahizi maben jawi süpahi 120,000 pathi nu 15,000 ketan sa.

¹¹Gideon na ayyikeshü katen len Noba nu Jogbeha na nishuwa tsü ton wa nu aghani shhugho meyi süpahizi tsü ya nchü thsüla ssikaghashen.

¹²Midia nyi kadimi keni Zeba nu Zalmunna manyi na bvüa, isala ma manyi jügü wa ghanya nu manyi süpahizi maben jügü zighe.

¹³Gideon na aghi wina Here Pass len wi ghoneng keten,

¹⁴ma Sukkoth wina kegho anyi pvünyi kesü ghanya nu ma wi pala pahan keü. Anyi pvünyiwa na Sukkoth wi anyi ccülikesathu nyan achentagü nu tagü zhü pi Gideon cüa.

¹⁵Tsaseng wi Gideon na Sukkoth nyithu wi wa nu khi, “Nthu na hi nkiqa mvula hhaghe kesa tsü meshen ben ma? Nthu kekhi na ithu atsse pi nsüpahizi nchala kesathu cü nten, kepaghenanye nthu na Zeba nu Zalmunna manyi npi ghanya. Ghangchilo, manyi hewi benle!”

¹⁶Ma tsaseng wi ayyikeshü wi aghazü nu ataqae khuya nu tsü pi Sukkoth wi ccülikesathu metenmesha.

¹⁷Ma Penuel wi aducü la pasha nu anyunuti wi anyithu pathia.

¹⁸Tsaseng wi Gideon na Zeba nu Zalmunna manyi wi keü, “Nshinyi Tabor wi anyi kepathi cüki tsüna khati nu?” Manyi khineng, “Mathu tsüdila kadimitsathu ti nthu chen benle!”

¹⁹Gideon na khi, “Mathu na icünyuthu, ijja tsathu. Hi kishenben, keujüla nshinyi na mathu npathi lethu, hi nshinyi pathi nkesale.”

²⁰Tsaseng wi ma ma tsa keqhai ntsawa Jether wi khi, “Manyi ssi wa pathilo.” Isala pvüzanyiwa na ma njünnu nkhushila. Ma njünnu khushi kisütuwa, kepaghenanye ma khilila pvüzanyi kesü saben.

²¹Zeba nu Zalmunna manyi na Gideon wi khi, “No ketanla ghola ishinyi pathilo. Npvüza kesü na npvüza kekuli saben.” Tsalina Gideon na ghola manyi pathia nu manyi sunsiesa sun wi ayanthu tsü khuya.

²²Tsaseng wi Israel nyithu na Gideon wi khi, “No nu nseng wi nshicübvüghathu na ithu miwi kekhang kesenwa salo. No Midia nyithu kwen wina ithu hangsha yadha.”

²³Gideon na luneng, “Hi le itsa lela nthu miwi kekhang kesenwa sa nben. Apvüwa na nthu miwi kekhang kesenwa saben.”

²⁴Isala ma khi, “Hi ya nthu kesüsü wi keü thsülo. Nthu tsüdila akhuna thighi khukeya tsü pi hi cülo.” (Midia nyithu la ayyikeshü wi kahang nyithu ti suna khuna thighithu pvüden.)

²⁵Anyithu na khineng, “Ithu na tsüthu pi no cüaben.” Mathu na athsü pi shi nu tsüdila akhuna thighi khukeya tsü sengho ciwi chia.

²⁶Gideon na suna khuna thighi mukeya na saghu kilogram ngwe cenben, nu ha aghe, ayan, Midia nyi kadimithu na mphi keten athsü nmiepheü, nu mathu sunsiesa sun kiqhanthu pi tsü nsaghu.

²⁷Gideon na suna pi atsikezhü kesü saya nu tsü pi ma nyutiwa Ofra wi chia. Israel nyithu tsüdila Anyiza teshi theng nu ciwi atsikezhü tsü kinyi wa. Tsüna Gideon nu ma theghi ghena aca kesü sa.

²⁸Tsalina Israel nyithu na Midia nyithu chaya nu mathu ghena kemessi nmila. Gideon npi keshü chu ayyi tsüwa wi amapi jügha kecca na ben.

²⁹Gideon na ma jjen wi whaneng nu ciwi hang wa.

³⁰Ma awubvü kejon keben ghena atsathu achentagü na ben.

³¹Ma Shekhem wi ma wubvü meshibvüwa kesü na ben; ma atsa kesü pvügha pi ma cü, nu ma nyan pi Abimelek ciya.

³²Joash tsa Gideon na qhai nu shü nu pi Ofra wi Abiezer mizza nyutiwa wi ma ba Joash shüjjen wi vhüa.

³³Gideon keshü seng wi Israel nyithu na Anyiza wi jühtsentsa nsala kheneng wa Baalthu tsü kinyi. Mathu na Baal cenkethenjüh tsüpi mathu cenpvü sa,

³⁴nu mathu Nyiza Apvüwa na mathu kevü ghinyithu kwen wina mathu hangshawa kekuli tsü nsala.

³⁵Mathu na Gideon theghi na Israel ghena kemehai kulikechi tsüdila nküla.