Read Northern Rengma Naga 3 JOHAN 1 Bible Online

3 JOHAN 1 - Northern Rengma Naga bible

3 JOHAN 1

¹ Keshenpfüwa wina pi— hi atsentsa wi ma tizen ketenwa Gaya kecü.

²Hi ketizenwa, no nghamu wi mehai ben kesa hi chü keben ti no ngwo sajjü wi nu pala tsüdi wi la mehai walo kesa hi kekhie saben.

³No keshüthangla atsentsa wi hang keten tsüti Khristanyi apvüshangthu pahan na gho no khatila ajühtsentsa sa nu atsentsa wi ben khe khi pi hi kekiza wi inonghe ntsa saya.

⁴Itsangathu na atsentsawa wi hang ben le kesa zakeya miwi mangla anonkeghe nmi.

⁵Hi ketizenwa, no ajühtsentsa sa nu npvüshang Khristanyithu na kijünyi thu sa keben wi lela mathu miwi kuli chiden.

⁶Mathu na kemehu tu wi no nyu ketizen cüki khichi. No Anyiza kenenwa sa nu mathu kijünyi kewa wi mathu kiqachi sa tenlo.

⁷Kepaghenanye mathu na nkenondithu wi mangla meyala Khrista kekuli tsü ghena alentsen chiden.

⁸Tsalina ithu Khristanyithu na mathu atsentsawa ghena kekuli wi mathu gweghe yale kesalina ithu na anyi hathu ha nkiqathu yishü.

⁹Hi lesü melute kesü zhü pi kemehu cü; isala Diotrefe mathu ccüli sa mvu kebenwa na hi mangwa khiben khe tsü nkina.

¹⁰Tsalina hi gho lethu, ma mangwa sa theng khe tsüdi kelishü; ma ikhang cüki qhethiketen kekhi nu ma milikemesa kekhi tsü pi kiza na! Isala ma tsüti kesa ketan nyela, ma Khristanyi apvüshangthu la ssiya nten, nu nyu mathu ssiya mvu kebenthu la khen nu kemehujjen wina mathu jügüshiale saden!

¹¹Hi ketizenwa, nkemehai nsala nu kemehaiwa salo. Anyi kesü le kesü lela kemehai sa ketenwa na Anyiza ji; isala thowa na nkemehai sa ten khe ma Anyiza npi muya.

¹²Anyi tsüdila Demetra kemehai cüki khiben; atsentsawa ketanla ma kemehai cüki khiben. Nu ithu sheikepi pi tsü wwaben, ithu na atsentsa khiben le kesa no chüben.

¹³Hi pala kejon pi nthu kekiza-u na ben, isani hi kezhüchan nu kezhütssü nsen mvu.

¹⁴Hi wan gho nthu metuya nu ithu ghangtan keccünengli yaben kesa nondi ben.

¹⁵Kecca ya nthu ssiben keyawa salo. Npvüshangthu tsüdila shalom saben. Ithu pvüshangthu tsüdi wi shalom sachilo.