Read Northern Rengma Naga JUDE 1 Bible Online

JUDE 1 - Northern Rengma Naga bible

JUDE 1

¹ A maghawa, nu James cünyuwa Jude na pi Anyiza na ciya kesathu, Abawa Anyiza kaghali pvü nu Jisu Khrista na noncca keten wi hang ketenthu kecü:

²Nanketizen, kecca, nu ketizen ya nthu pongkemeni sa keyawa salo.

³Hi ketizenthu, hi ithu tsüdi kesagho ji hangshakeya cüki ha zhü pi nthu cü mvu ntsa kesa wi hi zhü pi nthu kechü-kenong chi nu nthu yala Anyiza na anuphan ghena kutitan kenondi pi ma nyithu cü kesa tsü aghechen saya thsüle kesa meshenya.

⁴Kepaghenanye Anyiza nkechü nyi pahan na kuthi sen nu ithu ja wi dughodha. Mathu na mathu hang nketsatan cüki tsü meyenbhon le kesalina ithu Nyiza nanketizen ketsijüh tsü khisa, nu ithu Kesansiwa nu Apvüwa Jisu Khrista tsü meya mvu saden. Ntsawajüh na kheni wina mathu muya kesa kemeshensa cüki ha khitheng.

⁵ Nthu na ha tsüdi chüben lela hi nthu kiza neng chi mvuben: Apvüwa na khati nu Ejipt wi Israel nyithu khushiya, isala asakhen wi n-nondila kesathu yasa cü khe tsü cüki.

⁶Tangnyilothu na mathu cü ketheng pen wi nbenla, isala mathu penwa tsü teshi kesa tsü meshen chilo: amighe ssüli pi mathu bhen pvü nu anuphan kejang wi ben, ciwi Anyiza na mathu meshensa keten tsathang ketiwa tsü ghena theng.

⁷Tsüti Sodom nu Gommorah, nu manyi kevü wi anyuthu cüki la meshen chilo, mathu na tsüthu nyi ti kahang nmetha nu qheza-qhena kekuli sa: mathu na anuphan anni wi kemeten-kemesha tsüna tsüdi ghena kekitsan sachi.

⁸Tsü makesü anyi hathu la mathu kemeshen kemanthi nkemetha tsüna mathu ya sami pi mathu gwo kenenkagha sa; mathu Anyiza kekhang tsü nkhichi nu tang wi nyankethang tsü kimenni den.

⁹Tangnyilo kediwa Mikhael lela hati nsa. Ma atsaghang ssinu thowa na Mosa gwowa tsü yanu kesa kicennali wi lela Mikhael na atsaghang kekimenni jüh nkhi, isala “Apvüwa na no khah ben le” khi!

¹⁰Isala anyi hathu na mathu mangwa chüshi meya khe tsü shun nu kimenni den; nu mathu na mathu gwo wi aghangsathu ti pala chü keyathu tsüna mathu yasa den.

¹¹ Mathu ghena khatila qhethiketen saben nu! Mathu na Kain len tsü nie wadha. Apisa ghena mathu ketanla mathu pi Balaam kesazzi tsüti sadha. Mathu na Kora na nyu jüh kehhaghe tsüti hhaghe nu mathu yasadha.

¹²Mathu nkemejüghe kekuli na nthu ashukesa kedsakejjü wi kenenkagha kekaki ti sadha. Mathu na mathu ghena ketan saden. Mathu na ameghü na akulukeshü mo pi ghoten lela atsankegho nkemi ti, nu vvüthimeyi wi lela achanton mabi nkebün ma ghazan pfüshi pi shütha sa thsü kesa tsüti.

¹³Mathu na atssükedone tssükuli nu menugha keshhugho tsüti mathu nkemejüghe kekuli pi nyu ccücaden. Mathu na ghotsithu ma len cühzzi ketenthu tsüti, Anyiza na anuphanla kejang ntsa pen wi tsüthu ghena apen kiden theng.

¹⁴Hathu cüki ha Adam wina hang kegho abvüye tagüwa [1] Enok na kheni hathu cüki khitheng: “Apvüwa ma tangnyilo kemethathu hazar kejon ssigho,

¹⁵tsüdi jühkaghaten nu mathu Anyiza nkechü kekuli sa kethengthu nu kesami nyithu ajüh qhethiketen kesa khi pi ma keshunthu tsüdi meshensa den!”

¹⁶Anyi hathu na keshüthangla nkulila nyu nkemehai khi nu nyu meshensa benden. Mathu na mathu sajjü kenen wi ketan hangden. Mathu ketanla mathu ghena kapvü isala nyu kejiki jühkhi nu mathu ghena kekiyi bhaden.

¹⁷Isala ipvüshangthu, ithu Pvüwa Jisu Khrista apostelthu na mangwa pi nthu kiza khe tsü meshen yalo.

¹⁸Mathu na nthu wi khi, “Asakhen tsathangthu kegho wi anyi nyu nankeqhe nu mathu sajjü kenen sa ketenthu na shhugho ben.”

¹⁹Anyi hathu na nyu pvükhhi-pvüsa saben, mathu sajjü kenen sa nu Aghamu na mathu miwi nmi.

²⁰Isala ipvüshangthu, nthu tsü kenondi kemetha ntsawa tsü satezü kayiya, nu Kemetha Ghamu kekhang wi kekhie saben,

²¹nu nthu ketanla nthu pi Anyiza nanketizen wi chi nu Apvüwa Jisu Khrista na ma nanketizen wina anuphan kahang pi nthu cüle keben tsü hie benlo.

²²Anyi kesütu kebenthu tsü nantizenchi;

²³kepathu tsü anni wina zanshiya nu hangsha yalo; nu kepathu tsü kemessi ben nu mathu nantizenchi, isala mathu thsümeni wi kesami kesa mvuthu kaki keben tsü nanqanan yalo.

²⁴Nthu na qancawa keten wi lela nthu noncca sen benya kemehaiwa, nu ma nyankethang sa keten tu wi kesami nmila anonkeghe sala nthu ssi gho ketenwa,

²⁵ithu Pvüwa Jisu Khrista wina ithu Hangshawa Anyiza ketan ya kheni abvüye tsüdi, khili, nu anuphan nu anuphanla anyankethang, ajenkeben, kekhang, nu kekhangkedi kebenwa salo! Amen.