Read Northern Rengma Naga CCÜCAKECHI 10 Bible Online

CCÜCAKECHI 10 - Northern Rengma Naga bible

CCÜCAKECHI 10

¹Tsaseng wi hi tangnyilo kekhang kesü tang wina shhugho keten mu. Ma akulukeshü pi meju pvü nu cünieqho pi ma li vü pvü, ma mmi na aghani ti, nu ma ccü na anni donbvü ti kesa.

²Ma kwen wi kezhüllu kizzakeu kesü llusha senben. Ma ccü ajewa pi atssükedone miwi, nu tavüwa pi ayyi miwi nni ben,

³nu ahhai misikhhali ssensitemi kaghamo hhai ti jisha. Ma jisha kechi seng wi atsankeshigü tagü na ghamo pi ma lunengchi.

⁴Tsüthu na ajühkhi shagha meyi hi tsü zhüyale sa. Isala hi tang wi ahhai kesü hi keccüneng zaya, “Atsankeshigü tagü kekhi jüh tsü pi kuthilo; tsü nzhü lalo!”

⁵Tsaseng wi hi kemuwa tangnyilo atssükedone nu ayyi miwi ngan kebenwa tsüna ma kwen ajewa zanki pi tang wi chi,

⁶nu anuphan nu anuphanla hangben ketenwa Anyiza, atssan, ayyi, atssükedone, nu tsüthu wi kebenthu tsüdila sahangkechiwa nyan wina kekishen kesü sa. Tangnyilowa na khi, “Matsü kijü meyadha le!

⁷ Isala tangnyilo tagüwa na ma tutuwa khouchi lethu, Anyiza na ma maghathu nu atusenjüh-kechüthu wi khichi ketheng ti ma kekuthi kemeshenwa tsü sacen yaben.

⁸ Tsaseng wi tang wina ahhai hi ccüneng kesawa tsüna kheneng hi kiza, “Wala tangnyilo atssükedone nu ayyi miwi ngan kebenwa kwen wi kezhüllu llusha pie keben tsü khuyalo.”

⁹Hi wala tangnyilo wi kezhüllu kizzawa tsü pi hi cülo khieya. Isanan ma hi kiza, “Tsü khuya nu pi dsalo; tsüna npang wi anikhotssü ti minnunte, isala npvü non wi khamugho saben.”

¹⁰Hi wa ma kwen wi kezhüllu tsü khu pi dsa, nu tsüna ipang wi anikhotssü ti minnunte sa. Isala hi tsü mejichi keya wi ipvü non wi khamugho sa.

¹¹Tsaseng hi wi kiza, “No kheneng kuti Anyiza ketsijüh wina mizzatenti, ashicü, ajühjja, nu kadimithu kejon cüki pi nkhichithu yishü.”