Read Northern Rengma Naga CCÜCAKECHI 11 Bible Online

CCÜCAKECHI 11 - Northern Rengma Naga bible

CCÜCAKECHI 11

¹ Tsaseng wi pala kitegüji kesü pi hi cü nu hi wi kiza, “Wala Anyiza kekinyijjen nu kekinyipen tsü kitegüya, nu kekinyijjen wi kinyi kebenthu si yalo.

² Isala kekinyijjen ameiwa tsü nkitegüla, kepaghenanye tsüthu pi Anyiza nkechüthu cüdha, nu mathu na asha jügha nu keni Anyunuti Kemethawa tsü cüten ben.

³Hi kekhang pi hi chüza keni cü nu kesun chiden, nu manyi adhulathsü mphi nu ghanan 1260 Anyiza ketsijüh khiben.”

⁴Chüza keni tsüna olivton keni nu ahula keni na ayyi Pvüwa tu wi ngan keben tsü.

⁵Keujüla anyi pahan na manyi meten-mesha lethu, manyi pang wi anni na shhugho manyi nankemeghüthu yasa ben; tsüti nu thowa na manyi meten-meshale sa khe pathiaben.

⁶Manyi Anyiza jüh khi keben chu atsan khen nu ngho thsülaya kemehai kekhang ben. Manyi na kebvütssü tsüdi pi ajjü ceng; manyi kemeshen wi adhagha katsüha la pi ayyi nyi cüya kemehai kekhang la ben.

⁷ Manyi na ketsijüh tsü khisha lethu, ayyiku kedhu wina keshhugho aghangsa tsüna manyi ssikaghashen ben.

⁸ Tsüna manyi chaya nu manyi pathiaben, nu manyi kamang pi anyunuti ketiwa len wi manyi Pvüwa pi kross miwi kejen pen wi chiaben. Anyunuti tsüwa nyan kaghape na Sodom nyelela Egipt.

⁹Mizzatenti, amizza, ajühjja, nu ashicü tsüdi wi anyithu na gho ghanan kecheng nu gishüpahan manyi kamang tsü pi nvhü thsüla ghang ben.

¹⁰Ha manyi keshü ghena ayyi nyithu na anonghe ben. Mathu na kemini sa nu anonkeghe sala aju pi kecüliben, kepaghenanye atusenjüh-kechü ha keni na ketizen kesa kejon sengho anyithu miwi chi.

¹¹ Ghanan kecheng nu gishüpahan seng wi Anyiza wina kahang khuchiketen hathakissa na manyi gwo wi du nu manyi shagha; nu manyi mukeyathu tsüdila qhethiketen sa.

¹²Tsaseng wi atusenjüh-kechü keni na tang wi ahhai misikhhali manyi wi khi keben zaya, “He wi kugholo!” Manyi ghinyithu na manyi ghang keben wi akulukeshü miwi na tang wi kia.

¹³ Tsü tsüwi ameghükuju ntsa sa; anyunutiwa tsü gishü tagha sa nu kesü yasa, nu anyi hazar tagü na shü. Anyi hang kebenthu na qhethiketen sa nu atssan Nyiza kekhangkedi tsü seng.

¹⁴Kemessi keni na cendha, isala kemessi kechengwa na wan ghoaben!

¹⁵ Tsaseng wi tangnyilo tagüwa na ma tutuwa khouchi, nu tang wi ahhai misikhhali nu khi, “Ayyi miwi kekhang sen keten kekhang tsüna khili ithu Pvüwa nu ma Messiya ji sadha, nu ma anuphan nu anuphanla kekhang senben!”

¹⁶Tsaseng wi keshenpfüthu ngwe nu mejü Anyiza tu wi mathu kadipen wi donki kebenthu na nkhwencadu Anyiza kinyi,

¹⁷nu khi, “Kekhangkediwa Apvüwa Anyiza, khili kebenwa nu kheni na kebenwa! No kekhangkedi khuya nu kekhang sen wa kesalina ithu na no nkesengcha saben!

¹⁸ Nlebenketsu tsüwa na gho kesalina Anyiza nkechüthu na lebenminu bendha, keshü jühkaghaten keten tsü la ghodha. Nmagha atusenjüh-kechüthu, n-nyithu tsüdi, nu no kinyikü ketenthu tsüdi, kedi nu kizza makesü akutimen sacü keten tsüwa na ghodha. Ayyi yasa ketenthu yasa keten tsüwa la ghodha!”

¹⁹Tang wi Anyiza kekinyijjenwa na sha theng, nu ciwi Cenkethenjüh Khitsonwa tsü muben. Tsaseng wi atsancwe, atsanshigü atsanphagha sa, ameghükuju, nu aghayica ntsa sa.