Read Northern Rengma Naga CCÜCAKECHI 13 Bible Online

CCÜCAKECHI 13 - Northern Rengma Naga bible

CCÜCAKECHI 13

¹ Tsaseng wi hi aghangsa kesü atssükedone wina shhugho keten mu. Tsüna ma li tagü nu ma ghacü tagha ben; nu ma ghacü kesüsü miwi kadiliwen ben, nu ma li kesüsü miwi Anyiza kethen nyan na ben.

² Aghangsa tsüna shenkitemi ti kesa; ma ccü na aduweng ccü ti, nu ma pang na ssensitemi pang ti kesa. Kemanthisa na ma kekhang, kadipen, nu kekhang keben pi aghangsa tsü cü.

³Aghangsawa li kesü na ayisü sa ntsa sa kesa ti, isala ma yisü na madha. Ayyi mabenla amansa nu aghangsa tsü nie wa.

⁴Anyi tsüdila kemanthisa tsü kinyi kepaghenanye ma ma kekhang keben tsü pi aghangsa tsü cüdha. Mathu na aghangsa tsü la kinyi nu khi, “Thowa na aghangsawa ti kesa ben nu? Thowa na ma ssikaghashenya mehai nu?”

⁵Aghangsa yala kekapvü jühkhi nu Anyiza kimenni thsü, nu asha jügha nu keni kekhang keben saya kemehai pi cü theng.

⁶ Tsalina ma Anyiza, ma nyan, ma kahang ben, nu tang wi hang kebenthu tsüdi then shagha.

⁷ Tsü yala Anyiza nyithu ssikaghashen nu mathu chaya, nu amizza, mizzatenti, ajühjja, nu ashicü tsüdi miwi kekhang keben saya thsüa.

⁸ Ayyi npi sa kechi wina Khaghanenizza nyu ma pathi kesawa ji kahang lesüshen wi ma nyan zhü kethengthu ketan khe ayyi wi anyithu tsüdila tsü kinyiben.

⁹“Tsalina akhuna pvü ketenthu, kinalo!

¹⁰ Anyi kesü le kesü lela atssüzü kesa-u lethu, atssüzü sa wa metsiben; nu anyi kesü le kesü lela njünnu pang wi keshü-u lethu, njünnu pi süthi metsiben. Hawa ha wi Anyiza nyithu na kethankehi nu jühtsentsa sayalo ciben.

¹¹Tsaseng wi hi aghangsa kesü ayyi wina shhugho keten mu. Tsüna Khaghanenizza ghacü ti kesa keni na ben, nu tsüna kemanthisa ti ajühkhi.

¹²Tsüna aghangsa atuwa kekhang keben tsü sen nu ma tu wi ben. Tsüna ayyi nu ciwi hang kebenthu tsüdi meten pi aghangsa atuwa ma yisü maya kesawa tsü kinyi thsü.

¹³Aghangsa keniwa ha amankesa kejon kuli; anyi tsüdi tu wi na tang wi anni ya ayyi wi dugho thsü.

¹⁴Aghangsa atuwa tu wi na amankesa kekuli saya kemehai kekhang tsüwa ghena ayyi wi anyi hang kebenthu tsüdila mechuya. Tsüna anyithu kizala aghangsa nyu na njünnu pi ma mesa-mena lela hang kebenwa tsü kinyikü wina tsü tsizhü yalo khi.

¹⁵Aghangsa keniwa tsüna kahang hathakissa pi aghangsa atuwa tsikezhü miwi chi nu tsüna ajühkhi shagha nu anyi tsü nkekinyithu tsüdi pathi thsüa.

¹⁶Aghangsawa tsüna anyi kedi nu kizza, keban nu ketha-u, nssümagha nu ahvuthu tsüdi meten pi ma zensu tsü pi mathu kwen ajewa nyelela mathu tie wi jenya thsüa.

¹⁷Anyi thola azensu, tsüna aghangsa tsü nyan nyelela tsü nyan number tsü nkepvü tsü pala pi jeü nyelela shei meya.

¹⁸Hawa ha kemetsa ciben: anyi kesü le kesü lela kemetsa ben lethu, aghangsa number tsü jjügi bhashiya mehai, kepaghenanye tsüna anyi kesü nyan number. Nu number tsüna 666.