Read Northern Rengma Naga CCÜCAKECHI 14 Bible Online

CCÜCAKECHI 14 - Northern Rengma Naga bible

CCÜCAKECHI 14

¹ Tsaseng wi hi ghangchi nan Khaghanenizzawa na Zion Yikha miwi nganben; nu anyi 144,000 na ma nyan nu ma Ba nyan pi mathu tie wi zhüki pvü ketenthu na ma gweghe ben.

²Nu hi tang wi ahhai kesü atssüketi nu atsankeshigü hhai ti kesa tsüna akhwi kechüthu na harp sen nu akhwi sa keben hhai ti zaya.

³Anyi 144,000 tsüna kadipen tu wi, hangben keten ghangsathu mejü, nu keshenpfüthu tu wi ngan nu akhwi ketheü kesü saben, nu mathu ketan akhwi tsü chüben. Ayyi wi anyithu tsüdi ja wi mathu ketan hangshakeyathu.

⁴Mathu na nzathu ssinu keqheza kesami nsa; mathu na pvünyimethathu. Mathu na Khaghanenizzawa na khiewa wa khe ma seng nieden. Mathu na ayyi wi anyithu ja wi na hangshaya nu pi atuwa sa Anyiza nu Khaghanenizzawa kinyi ketenthu.

⁵ Mathu na khiela milikemesa kekhi tsü nchü; mathu na kesazzi nmi.

⁶Tsaseng wi hi tangnyilo kepa wi kesü na atssan wi pighe nu anuphan Jühtheü Kemehaiwa ketsijüh tsü pi ayyi wi anyithu, ashicü, amizza, ajühjja, nu mizzatenti tsüdi wi khi keben mu.

⁷Ma ahhai misikhhali jisha, “Anyiza kinyikü yalo, nu ma kekhangkedi senglo! Kepaghenanye ma ayyi nyithu jühkaghaten keten matsü na ghodha. Ma atssan, ayyi, atssükedone, nu atssü kebvüpenthu sa kechiwa, ma kinyilo!”

⁸ Tangnyilo keniwa na atuwa seng nie nu hati khi, “Babilon na qancadha, qancadha! Anyunuti ketiwa na qancadha! Kepaghenanye ma ma keqheza kesa mvu kisengtssü kekhang tsü pi ayyi nyithu mejithi le!”

⁹Tangnyilo kechengwa na atuwa keni tsü seng nie nu ahhai misikhhali khi, “Anyi kesü le kesü lela aghangsa nu ma tsikezhü tsü kinyi thsü number tsü pi ma tie nyelela ma kwen wi jen pvü ketenwa

¹⁰ na ma ketanla Anyiza leben kekha kisengtssü pi ma lebenketsu hyi pongti chi ketheng tsü jjü yaden! Tsüti kesathu tsüdila tangnyilo kemethathu nu Khaghanenizzawa tu wi na anni nu anni lon wi mecang ben.

¹¹ Mathu kemecang nni kekhu tsüna anuphan nu anuphanla benden. Aghangsa nu ma tsikezhü tsü kinyi ketenthu, nu thowa na ma nyan number tsü pvü ten khe tsüthu ghena ciwi aghaja le aghanan lela kecca nmi!”

¹²Hawa ha Anyiza nyithu, Anyiza yenkhukechithu nie nu Jisu wi jühtsentsa sa ketenthu na kethankehi yalo ciben.

¹³Tsaseng wi hi tang wi ahhai kesü hati kekhi zaya, “Ha zhü yalo: Khili nten na Apvüwa kekuli kesa wi keshüthu na kemihhi ntsa!” Aghamu na luneng, “Ntsakhiwa le! Mathu kekuli ghena ccaya tendha, kepaghenanye mathu kekuli kutimen na mathu nieden.”

¹⁴ Tsaseng wi hi ghangchi nan akulukeshü kemiki kesü na ben, nu tsü miwi Anyi Tsawa ti kesa na donki ben, ma li wi suna kadiliwen pvü nu ma kwen wi kecükhhagha kedighe kesü senden.

¹⁵ Tsaseng wi tangnyilo kepa kesü na kekinyijjen wina shhugho jisha pi akulukeshü miwi donki kebenwa kiza, “Nkecükhhagha sen nu alli wwiya yilo, kepaghenanye matsü na ghodha; ayyiwa na nyün pi wwi qodha!”

¹⁶Tsaseng wi akulukeshü miwi donki kebenwa na ma kecükhhagha pi ayyi wi chang chi nu ayyiwa tsü wwiya.

¹⁷Tsaseng wi hi tangnyilo kepawa na tang kekinyijjen wina shhugho nu ma la kecükhhagha kedighe kesü sen keten mu.

¹⁸Tsaseng wi la tangnyilo kepa anni miwi kediwa na kekinyipen wina shhugho. Ma ahhai misikhhali jisha nu tangnyilo kecükhhagha kedighe sen ketenwa wi kiza, “Nkecükhhagha sen nu ayyi wi kemeshentsse lli tsü wwiya yilo, kepaghenanye kemeshentsse bi na nyündha!”

¹⁹Tsalina tangnyilowa na ma kecükhhagha pi ayyi wi chang chi nu kemeshentsse lli wi ma bi tsü wwiya, nu tsüthu pi Anyiza lebenkekha kisengtssü kemisügü pen wi cüchia.

²⁰ Kemeshentsse bi tsü pi anyunuti na ameiwa kemisügü pen wi misügü, nu kemisügü pen wi ajjü na shhugho ma kedhu na meter keni-u sala kilometer meza kecheng cen lle wa.