Read Northern Rengma Naga CCÜCAKECHI 15 Bible Online

CCÜCAKECHI 15 - Northern Rengma Naga bible

CCÜCAKECHI 15

¹Tsaseng wi tang wi pala zensu nu amankesa keti mu. Tangnyilothu tagü na adhagha sakhen tagü senden, kepaghenanye tsüthu na Anyiza leben kekha pi ccüca kechi sakhendha.

²Tsaseng wi hi atssükedone anni pi ayena kesaghu ti kesa, nu tsü miwi aghangsa nu ma tsikezhü, nu ma number pvü ketenthu miwi khangkeyathu na Anyiza na harp pi mathu kecü tsü sen nu ngan keben mu.

³ Mathu na Anyiza maghawa Mosa, nu Khaghanenizzawa khwi saben: “Apvüwa Anyiza kekhangkedi ntsawa, no kekulithu tsü khatila di nu amansa nu! Mizzatentithu miwi Kadimiwa, nlen na khatila meshon nu tsatan nu!

⁴ Thowa na no nmessila benya mehai nu, Apvüwa? Thowa na no kedi cüki nkhila benya mehai nu? No ketan kemethawa. Mizzatenti tsüdila gho no kinyiben, kepaghenanye tsüdila no kekuli kemeshon tsü muyadha.”

⁵ Ha seng wi hi ghangchi nan tang wi kekinyijjenwa tsü sha nu Anyiza ketepen Nithsüjjenwa tsüna ma non wi keben mu.

⁶Tangnyilothu tagü adhagha tagü sen ketenthu na kekinyijjenwa wina shhugho, mathu na linen kemetha wegüthsü kesa pvü nu suna deshikeqhan pi mathu deshi qhan pvüden.

⁷Tsaseng wi hangben keten ghangsathu mejü ja wi kesü na anuphan nu anuphanla hangben ketenwa Anyiza leben kekha pi pongti chi ketheng suna hikhu tagü tsü pi tangnyilothu tagü cü.

⁸ Anyiza nyankethang nu kekhang nni kekhu na kekinyijjenwa tsü pong, nu tangnyilothu tagü na adhagha tagü sen keghothu tsü npi kesacen chu thola kekinyijjen tsü non wi du meyala.