Read Northern Rengma Naga CCÜCAKECHI 16 Bible Online

CCÜCAKECHI 16 - Northern Rengma Naga bible

CCÜCAKECHI 16

¹Tsaseng wi hi kekinyijjen wina ahhai misikhhali kesü tangnyilothu tagü wi khi keben zaya: “Wala Anyiza leben kekha hikhuthu tagü tsü pi ayyi miwi keshusha chilo!”

² Tangnyilo atuwa na wala ma hikhu tsü pi ayyi miwi keshusha chi. Aghangsa zensu tsü pvü nu ma tsikezhü tsü kinyi ketenthu miwi kekumathu naa pi qhethiketen kesa na shhughoa.

³Tsaseng wi tangnyilo keniwa na ma hikhu pi atssükedone miwi keshusha chi. Atssü na anyi keshü jjü ti ceng, nu atssükedone wi hang kebenthu tsüdila shü.

⁴ Tsaseng wi tangnyilo kechengwa na ma hikhu pi aghakuthu nu atssü- kebvüpenthu miwi keshusha chi, nu atssü na ajjü ceng.

⁵Hi atssü kenoncca nyilowa na khi keben zaya, “O Kemethawa, no khili kebenwa, kheni na kebenwa! No ajühkaghaten kechithu tsüna meshon le!

⁶Mathu na Anyiza nyithu nu atusenjüh-kechüthu jjü keji thsüa, tsalina no ajjü pi mathu jjü thsüdha. Mathu na mukeya-u wi muyaben!”

⁷Tsaseng wi kekinyipen wina ahhai kesü hati khi keben zaya, “Apvüwa Anyiza kekhangkedi ntsawa! No ajühkaghaten kechithu tsüna atsentsa nu kemeshon kekuli le!”

⁸Tsaseng wi tangnyilo mejüwa na ma hikhu pi aghani miwi keshusha chi, nu tsü ya ma kisah pi anyithu mecang thsü.

⁹Kisa na mathu mecang ntsa kesalina mathu na adhagha hathu miwi kekhang kebenwa Anyiza nyan kishencü. Isala mathu na mathu kesami wina khapeghe nu ma kekhangkedi tsü nseng.

¹⁰ Tsaseng wi tangnyilo mangawa na ma hikhu pi aghangsa kadipen miwi keshushachi. Kejang na aghangsa kadiyyi pong, nu anyithu na mathu kinaa ghena amili kechhendhi,

¹¹nu mathu kinaa nu kekhumathu ghena atssan Nyizawa tsü kishencü. Isala mathu na mathu nkemehai len wina nkhapeghe.

¹² Tsaseng wi tangnyilo tughowa na ma hikhu pi Eufrat Ghaku ketiwa miwi keshusha chi. Nishuwa na gho keten kadimithu len sa cüle kesalina aghakuwa tsüna qha.

¹³Tsaseng wi hi nkemetha ghamuthu aqanqae ti kesa kecheng mu. Tsüthu na kemanthisa, aghangsa, milikemesa tusenjüh-kechü pang wina shhugho den.

¹⁴Tsüthu na Atsaghang ghamuthu amankesathu kuliden. Aghamu ha kecheng na ayyi wi kadimithu tsüdi wi wa nu mathu ssighu sengho kekhangkedi ntsawa Anyiza tsathang wi aghisa thsüle kesalina.

¹⁵ “Ghangchilo! Hi kaghanfü nyi kesü ti ghoden! Anyi kesü le kesü lela ma kimissü kegoetenla nu nyu ma kemu wi kejüghe meyale kesalina kiden-kesha nu ma thsümeni noncca ketenthu na kemihhi ntsa.”

¹⁶ Tsaseng wi aghamuthu na kadimithu ssinu Ibri jüh wi Armegaddon kesa pen wi tsü gho.

¹⁷Tsaseng wi tangnyilo tagüwa na ma hikhu pi atssan miwi keshusha chi. Kekinyijjen wina ahhai misikhhali kesü shhugho nu khi, “Tsüna sa cendha!”

¹⁸Ciwi atsancwe, atsanphagha, atsanshigü nu ameghükuju ntsa sa. Kheni anyi sahangkechi wina khiela ameghükuju hati npi sa; ha ameghükuju tsüdi ja wi nmehai ntsawa kesa le!

¹⁹ Anyunuti ketiwa tsü zankhhi zighe pi kecheng sa, nu diyyithu tsüdi wi anyunutithu yasa. Anyiza na Babilon ketiwa yala ma hyi wi ma leben kekha kisengtssü jjü thsü kesa tsü meshenya.

²⁰ Ayyimangkehithu nu ayikhathu tsüdila nmila.

²¹ Tang wina aghayi, kesüsü kekiyan na kilogram deni kecen anyithu miwi qanca dugho, mathu na adhagha tsüghena Anyiza kishencü, kepaghenanye tsüna adhagha nmehai ntsa kesa kesü sa.