Read Northern Rengma Naga CCÜCAKECHI 18 Bible Online

CCÜCAKECHI 18 - Northern Rengma Naga bible

CCÜCAKECHI 18

¹Hi ha seng wi tangnyilo kesü na tang wina dugho keten mu. Ma kekhang di ntsa ben, nu ma nyankethang na ayyi maben wi wegüchi.

² Ma ahhai misikhhali jisha, “Babilon ketiwa na qancadha! Ma qancadha! Khili tsü Atsaghangthu nu nkemetha ghamuthu na ma pongdha; kenenkagha nu nankiqanan wathu na ciwi hang ben.

³ Kepaghenanye mizzatenti tsüdila ma keqheza kesa mvu kisengtssü kekhang tsü jjü pi adinadha. Ayyi wi kadimithu na ma ssinu keqheza nkemehai sa, nu asenkesa nyithu na ma kesa mvu kekheneng nkeya wi ben kayi wale sa.”

⁴ Tsaseng wi hi tang wi ahhai kesü hati kekhi zaya, “Inyithu, shhugholo! Ma wina shhugholo! Isanu nthu na ma kesami wi tsü ma ngweghe le kesalina. Nthu na ma kemeten wi tsü ma gweghe ben yishü!

⁵ Kepaghenanye ma kesamithu na kaghashun pi atssan ti misidha, nu Anyiza na ma gheshighena lenthu tsü meshen ben.

⁶ Ma nthu miwi khati sa theng khe tsüti sa neng pi ma cülo. Ma kuli ketheng miwi kishen keni sa pi ma cülo. Ma no kejjü ghena ketenchi kecü tsü miwi kishen keni pi ma hyi pongti chi cülo.

⁷Ma anyanthang nu anonkwen keya ju ketizenkesa nu ahathakina pi ma cülo. Kepaghenanye ma ketanla ma wi hati khiden: ‘Hi he wi kadijja kesü sa donkiben! Hi denyile nye, Hi khiela ahathakina chü nben!’

⁸Ha ghena, ghanan kesü jü adhagha pi ma miwi chiden— khuma-khujü, ahathakina, nu azeng. Nu anni pi ma mecangthiaben, kepaghenanye Apvüwa Anyiza ma jühkekaghatenwa tsüna kekhang ntsawa.”

⁹ Ayyi wi kadimithu ma ssinu keqheza nu kesamvu sa kesathu anni na ma kemecang nikhu tsü kemu wi mathu anyunutiwa tsü ghena magha nu qaiben.

¹⁰Mathu na temeja wi ngan ben, kepaghenanye mathu na ma gweghe ketizen kesa tsü messiben. Mathu khiben, “Qhethiketen le! Khatila amankesa nu! Babilon, keti nu kekhang nyunutiwa! Amighe kekihhe kesü jü ketan na no meten cüdha man!”

¹¹ Ayyi wi asenkesathu la ma ghena qai nu anongü, kepaghenanye thola mathu tsanqaithu tsü nsheiladha;

¹² thola mathu suna, rükatssü, alon menkedhu, nu mejüti; mathu linen nmiepheü thsü, silk, nu athsü kenmie; kemetseng chan tsüdi nu asayha nu achan menkedhu pi kesa tsanqaithu tsüdi, lezza, amighe, nu awegüsalon;

¹³nu achansa, cüdemvu, hankedemvu, mirr, nu frankinsen; kisengtssü nu adeli, awheng nu awhengsu, amesü nu aneni, goru nu goru akhhi pvü ketenthu, nssümaghathu, anyi kahangthu lela.

¹⁴Asenkesathu na nzawa wi khi, “No benya mvuthi keten tsanqai kemehai tsüdila bhataghadha, no keben nu anonkwen ketenthu tsüdila nmidha, nu no khiela tsüthu mu nengya nbendha le!”

¹⁵Asenkesathu, anyunuti tsüwa wi asensa nu benkeyathu na temeja wi nganben, kepaghenanye ma gweghe ketizenkesa tsü messiben. Mathu qai nu anongü,

¹⁶nu khi, “Qhethiketen le! Anyunuti ketiwa ghena khatila amankesa nu! Ma athsü linen, nmiepheü, nu kenmie mphi, nu suna, alon menkedhu, nu mejüti ghe pvü keten nan!

¹⁷ Ma amighe kekihhe kesü jü ketan na keben ha tsüdi nmiladha man!” Ahunjjen wi kedithu nu anyithu, keculathu nu anyi kepathu atssükedone wi mathu nmen mellidsa ketenthu tsüdila temeja wi ngan,

¹⁸ nu anni na nzawa kemecang nikhu tsü muya nu qai: “Ciwi khiela anyunuti ketiwa hati kesa npi ben le!”

¹⁹ Mathu na ayyi wha pi mathu li wi cühki, mathu qai nu anongüla khi, “Qhethiketen le! Anyunuti ketiwa ghena khatila amankesa nu! Ma anyunutiwa tsü, ciwi ahunjjen kebenthu tsüdila atssükedone wi wa nu ma keben-keyeng miwi na benya ten nan! Amighe kekihhe kesü jü ketan na ma keben tsüdila yasadha le!”

²⁰ O tang wi kebenthu, ma yasa kesa ghena anonghelo! Anonghelo, Anyiza nyithu, apostelthu, nu atusenjüh-kechüthu! Kepaghenanye ma nthu miwi kuli kechi tsü ghena Anyiza na ma meshensadha le!

²¹ Tsaseng wi tangnyilo kesü na kenyeggülon keti kesü piekiya nu pi atssükedone non wi khalachi nu khi, “Babilon ketiwa tsüna hati nu pi yasa-yala wi khalachiaben nu khiela nmu nengdha.

²² Anyithu akhwi kesa hhai, harp, lalali, nu tutuwa kekhou hhaithu khiela no wi nza nengdha! Asenlikesa kekuli nyi no wi nmu nengdha; nu kenyeggü hhai za neng nbendha!

²³ Khiela no wi ahula kewegü mu nbendha; no wi shanyiwa nu shanyili hhai la nzadha! Nsenkesathu na ayyi wi kekhang ntsathu sa nu no milikemesa kedema tsü sen nu ayyi nyi tsüdi mechu le!

²⁴ Anyiza nyithu, atusenjüh-kechüthu, nu ayyi wi anyi pathi kesathu tsüdi jjü anyunutiwa wi muya kesalina Babilon tsü metenmesha cüa.