Read Northern Rengma Naga CCÜCAKECHI 2 Bible Online

CCÜCAKECHI 2 - Northern Rengma Naga bible

CCÜCAKECHI 2

¹“Pi Efesa kemehu nyilowa kecü zhüya: “Hana ma kwen ajewa pi ghotsithu tagü khusen nu suna pi kesa ahula kedonpenthu tagü ja wi ketenwa ketsijüh.

²Hi no kuli kechithu; no khatila npiketsü sa kuli, nu khatila kethankehiya khe chüben. No nkemehai nyithu ghang pvü ben meya, nu no mathu na apostelthu nye lela apostelthu le khi ketenthu tsü ghan-nan nu mathu na milikemesathu le chüya kesa tsü hi chüben.

³No kethankehi nu ighena ketizen sa lela no tsü teshi nsa.

⁴Isala hi hawa ghena no shunben: no kheni hi kaghali tsü teshidha.

⁵No khati kesa wina khuli bvü khe, meshen yalo! No kesami wina khenengya nu no kheni kekuli tsüti salo. Keujüla no kesami wina kheneng meya lethu, hi no wi ghola nhula kedonpen tsü ma pen wina khuyaden.

⁶Isala hi Nikolait nyithu kekuli nanmeghü keten tsüti no la tsü nanmeghüden.”

⁷ “Thowa na akhuna pvü ten khe Aghamu na kemehuthu wi khi keben tsü kinaya thsülo!” “Hi khangkeyathu ya Anyiza sanku wi kahang chan bi tsü dsaya kemehai pi cüden.

⁸ “Pi Smirna kemehu nyilowa kecü zhüya: “Hawa ha atuwa nu asakhenwa, shü nu hangnengya kesawa ketsijüh.

⁹Hi n-gükeccüthu, nu no kahhatu la chüben, isala no ntsakhiwa keban le! Judah nyi nkenyethu, mathu na Satan nyithu, mathu ajüh nkemehai khi pi no kematang tsü hi chüben.

¹⁰No ketizen sa keten tsü katsüha mangla nmessila. Kinalo! Atsaghang na nthu pahan pi atssüzüjjen wi chi nu nthu ghan-nan ben, nu nthu gükeccü na ghanan tagha ketan saben. Keshü kecu wi lela hi wi jühtsentsa sa yalo, isathu hi kahang pi no khangkeya kutimen sa cüben.

¹¹ “Thowa na akhuna pvü ten khe Aghamu na kemehuthu wi khi keben tsü kinaya thsülo! “Khangkeyathu na keshü keniwa wi patena meyacha.

¹²“Pi Pergamum kemehu nyilowa kecü zhüya: “Hawa ha njünnu yiyha ghapeli qho keben sen ketenwa ketsijüh.

¹³No Satan kadipen keben pen wi hang keten tsü hi chüben. Satan kahang pen wi tsü isheikepi tsentsawa Antipa kepathi wi lela no no kenondi nteshila hi wi jühtsentsa sa.

¹⁴ Isala hi ciwi pala pahan ghena hi no matang ben: nthu ja wi anyi pahan na Balaam kesansijüh tsü nieden, ma Balak sansi pi Israel nyithu ssi wa atsse pi atsikezhüthu kekinyi tsü dsa nu nkemetha keqheza sa nu mathu ya sami thsüa.

¹⁵Tsüti nthu ja wi anyi pahan na Nikolait nyithu kesansijüh tsü la nieden.

¹⁶Tsalina no kesami wina kheneng yalo! Keujüla no na tsüti nsa lethu, hi wan no wi ghonu ipang wina keshhugho njünnu tsü sen nu anyi tsüti kesathu tsü matang den.

¹⁷ “Thowa na akhuna pvü ten khe Aghamu na kemehuthu wi khi keben tsü kinaya thsülo!” “Khangkeyathu wi hi kekuthi manna tsü pi cüden. Hi alon kemiki kesü miwi anyan ketheü zhüki ketheng tsü mu keyawa ketan chüya keten la pi mathu kesüsü cüden.

¹⁸“Pi Thiatira kemehu nyilowa kecü zhüya: “Hawa ha Anyiza Tsawa ma nyon na anni keqhe ti nu ma ccü na lezza misi ketheng ti wegü kebenwa ketsijüh.

¹⁹Hi no mangwa saben khe chüben. Hi no kaghali, jühtsentsa kesen, no kekuli, nu kethankehi kesa chüben. No kheni miwi nansüwa kuli kesa la hi chüben.

²⁰ Isala hawa ghena no matang ben: no nza Jezebel, ma ketanla ma pi Anyiza nyilo le ci ketenwa tsü matang nten. Ma imaghathu sansi pi nkemetha keqheza sa nu ssi wa atsse pi atsikezhüthu kekinyi tsse tsü dsa thsüden.

²¹Ma kesami wina khenengya thsüle kesalina hi matsü pi ma cü, isala ma keqheza kekuli wi nkheneng mvula.

²²Tsalina ma pi awe kesü wi khala chiaden nu ciwi ma nu ma ssinu keqheza kesathu na qhethiketen ketizen sa benden. Mathu na ma ssinu gheshighena kekuli wi tsü leben khapeghe meya lethu, hi khili ha saden.

²³ Hi ma tsangathu la pathi cüden, Tsaseng wi kemehuthu na hi anyi tsüdi kemeshen nu kenmvu kechüwa le kesa chüyaben. Hi nthu kesüsü kuli ketheng kenie wina akutimen pi cüden.

²⁴“Isala Thiatira wi keben nthu kepathu tsü kesansijüh nkemehaiwa tsü nie nten, nthu na pi ‘Satan jüh kedhu’ le khi keten tsü nchü. Hi nthu kizaben, hi akhhi kepa wi mangla pi nthu miwi chi nten.

²⁵Isala nthu na hi npi kegho chu nthu sen ketenwa tsü zükeqhe ghansen wa cuyalo.

²⁶ Khangya nu hi kekuli sa wa asakhen cukeyathu, hi iBa jjen wi mukeya kekhang tsü makesü kesa pi mathu cüden: hi mizzatenti tsüdi miwi kekhang pi mathu cüden, amighe khhatssü pi ayyipfü pacha keten ti mathu miwi kekhang senben. Hi aghanen ghotsiwa la pi mathu cüben.

²⁹“Thowa na akhuna pvü ten khe Aghamu na kemehuthu wi khi keben tsü kinaya thsülo!