Read Northern Rengma Naga CCÜCAKECHI 3 Bible Online

CCÜCAKECHI 3 - Northern Rengma Naga bible

CCÜCAKECHI 3

¹“Pi Sardi kemehu nyilowa kecü zhüya:” “Hawa ha Anyiza ghamuthu tagü nu ghotsithu tagü kebenwa ketsijüh. Hi no mangwa saben khe chüben. No shü lela hang keben cüki kemehai kekhi tsü hi chüben.

²Tsalina shagha, nu no khili kebenwa tsü shütha npi kesa wina satezü yalo. Kepaghenanye no kuli kechiwa tsüna Anyiza tu wi npi cencuya le kesa hi chüben.

³Tsalina mangwa pi no sansi cü, nu no mangwa zayadha khe tsü meshenya; tsü nieya nu no kesami wina khapeghe yalo. Keujüla no nshagha lethu, hi kaghanfü nyi kesü ti no wi ghoden, nu no hi gho keten tsüwa tsü nchü.

⁴Isala nthu Sardi wi kebenthu anyi keu ketan nthu thsümeni metha ben. Nthu na athsümeni mphi nu hi gweghe alentsenben, kepaghenanye nthu na tsüti sa qo.

⁵ Khangkeyathu na hati athsümeni kemiki mphi yaben, nu hi kahang lesüshen wi mathu nyan khupia nben. Hi iBa nu ma nyilothu tu wi na mathu na iji le kesa khishiaben .

⁶“Thowa na akhuna pvü ten khe Aghamu na kemehuthu wi khi keben tsü kinaya thsülo!

⁷ “Pi Filadelfia kemehu nyilowa kecü zhüya: “Hawa ha metha nu atsentsa saben ketenwa ketsijüh. Ma David ji shakhen pi ajenka sha lethu thola khenya nketen, nu khen lethu thola shaya nketen tsü ben.

⁸Hi no mangwa saben khe chüben. No kekhang keu ketan keben, nu hi wi ajühtsentsa sen kegho tsü hi chüben. Hi anyi kesütanla khen nkeya jenka sha pi no cüben.

⁹ Kinalo! Satan ji sa keben milikemesathu, Judah nyi nye lela Judah nyi le khi ketenthu ya ntu wi kukedu no kinyi thsüden. Isanu ciwi mathu tsüdila hi no ghali keten tsü chüyaben.

¹⁰No ijühkina nu kethan-kehikeya ghena anyi kemehai-keteshi ghan-nan le kesa ghena agükeccü ayyi tsüdi miwi gho keten tsü wi hi la no hangsha yaben.

¹¹Ae, hi wan ghoaben . Tsalina nyu yala no khangkeya liwen tsü khusen bvü thsü nsale kesalina no sen ketenwa tsü zükeqhe ghansen yalo.

¹² Thowa na khangya khe hi ma pi Anyiza kekinyijjen wi alon donbvü kesü sa thsüden, nu ma khiela tsü teshi nbendha. Hi iNyiza nyan nu iNyiza nyunutiwa, tang wi iNyiza wina dugho ketenwa Jerusalem ketheüwa nyan tsü pi ma miwi zhüki cüaden.

¹³“Thowa na akhuna pvü ten khe Aghamu na kemehuthu wi khi keben tsü kinaya thsülo!

¹⁴ “Pi Laodikea kemehu nyilowa kecü zhüya: “Hawa ha Amen, atsentsa chüzawa nu jühtsentsa kesawa ketsijüh. Ma Anyiza na sahangkechi tsüdi miwi kekhang kesenwa.

¹⁵Hi no kekulithu tsü chüben; nu no bacubana kesa la chüben. Hi no ya kicü nyethu yeng kesa tsü hi nenben!

¹⁶Isala no bacubana, nkicü nu n-yeng kesa ghena hi ipang wina no meshusha le bendha!

¹⁷No hati khiben ‘Hi keban nu kemehai nyi; hi hi nsenthu keyishü tsüdila ben.’ Isala no khatila agüccü nu ketizen sa ben khe no nchü le! No ketha-u, kimissü, nu anyon nkemu nyi.

¹⁸No yala benya thsüle hi no kizaben, hi wi suna kemetha ntsa tsü sheiyalo. Athsü kemikiwa la shei pi no kimissü kejüghe keyawa tsü mphi bhonyalo. N-nyon pala muya le kesalina dawa pahan la sheiyalo.

¹⁹ Hi hi kaghalithu tsüdi khah nu meten cüden. Tsalina lebentsentsa sa nu no kesami wina kheneng yalo.

²⁰Kinalo! Hi ajenka wi ngan nu kekha ben; anyi kesü le kesü lela ihhai za nu ajenka shachi ketenwa, hi ma jjen wi dugho ma ssinu dsajjü, nu ma la hi gweghe dsajjü ben.

²¹Hi khangya nu khili iBa kadipen wi ma kete wi donki keben ti khangkeyathu ya hi kadipen wi ikete wi donkiya kemehai pi cüden.

²²“Thowa na akhuna pvü ten khe Aghamu na kemehuthu wi khi keben tsü kinaya thsülo!