Read Northern Rengma Naga CCÜCAKECHI 5 Bible Online

CCÜCAKECHI 5 - Northern Rengma Naga bible

CCÜCAKECHI 5

¹ Hi kadipen miwi donki kebenwa kwen ajewa wi kezhüllu kesü mu; tsüwa non wi ghapeli qho zhübhon nu mechantsithu tagü pi jen theng.

²Nu hi tangnyilo kesü na ahhai misi ntsa jisha keben zaya, “Thowa na mechantsiwa tsü pakhhi nu kezhülluwa tsü shiya mehai nu?”

³Isala tang wi, ayyi wi nyelela ayyi kekhu wi lela thola kezhülluwa tsü shi nu ma non wi ghangya kemehai nmi.

⁴Tsalina hi qai ntsa sa wa, kepaghenanye thola kezhülluwa tsü shi nyelela ma non wi ghangya kemehai nmi.

⁵ Tsaseng wi keshenpfüthu kesü na hi wi khi, “Ae, nqai lalo! Judah mizza Ssensitemi, David shicübvüghawa tsüna khangyadha, nu ma mechantsithu tagü tsü pakhhi nu kezhülluwa tsü shiya mehai le!”

⁶ Tsaseng wi hi Khaghanenizzawa na kadipen mnon wi ngan, hangben keten ghangsathu mejü nu keshenpfüthu na ma vü sen keben mu. Khaghanenizzawa tsüna pathi kesa ti. Tsüna ma ghacü tagü nu anyon tagü ben, tsüthu tsüna Anyiza ghamu tagü kesun pi ayyi maben wi chi kesathu.

⁷Khaghanenizzawa na wala kadipen miwi donki kebenwa kwen ajewa wi kezhüllu tsü khuya.

⁸ Ma tsüti saya nan, hangben keten ghangsathu mejü nu keshenpfüthu ngwe nu mejü na Khaghanenizzawa tu wi kukedu. Mathu kesüsü harp kesü nu suna khuzza wi hankedemvu pi pong senden, tsüna Anyiza nyithu na kekhie kesa.

⁹ Mathu na akhwi ketheü kesü sa: “No kezhülluwa tsü khuya nu mechantsithu tsü pakhhi qole! Kepaghenanye no pathia, nu no ahhansha sa keshü wina Anyiza ghena amizza, ajühjja, mizzatenti, nu ashicü tsüdi wi anyithu sheiyadha.

¹⁰ No mathu sa pi Anyiza kekuli sa thsüle kesalina keqhaikedithu kadiyyi sa thsüdha, nu mathu na ayyi miwi kekhang senben”

¹¹ Hi kheneng ghangchi nan nyilothu khalatsi nu khalatsitsi hhai zaya! Mathu na kadipenwa, hangben keten ghangsathu mejü, keshenpfüthu ngwe nu mejü tsü vü senben,

¹²nu ahhai misikhhali akhwi sa: “Khaghanenizza pathi kesawa tsüna kekhang, keben, kemetsa, nu kezü, kinyikü, anyankethang, nu keseng muya qo le!”

¹³Nu hi tang, ayyi, ayyi kekhu, nu atssükedone non wi — atssan ayyi wi kahangli keben tsüdila akhwi sa keben zaya: “Kadipen miwi donki kebenwa Khaghanenizzawa, anuphan nu anuphanla keseng nu kinyikü, anyankethang nu kekhang sa keyawa salo!”

¹⁴Hangben keten ghangsathu mejü na luneng, “Amen!” Isanu keshenpfüthu na kukedu kinyi.