Read Northern Rengma Naga CCÜCAKECHI 7 Bible Online

CCÜCAKECHI 7 - Northern Rengma Naga bible

CCÜCAKECHI 7

¹Tsaseng wi tangnyilothu mejü na ayyi ccügwen mejü miwi ngan nu ameghü yala ayyi nu atssükedone miwi nsho thsü, nu achanton mangla nmo kuli thsüle kesalina ameghü zanten sen keben hi mu.

²Nu hi nyilo kepawa kesü la hangben keten Nyiza mechantsi sen nu nishuwa na gho keten mu. Ma jisha sen nu Anyiza na ayyi nu atssükedone yasalo kesa ghena kekhang pi cü ketheng tangnyilothu mejü tsü ci.

³ Tangnyilowa na khi, “Ikhang na mechantsi pi Anyiza maghathu tie wi npi jen keya chu ayyi, atssükedone, nyelela achanton mangla npasa lalo.”

⁴Nu hi chükeya na Anyiza mechantsi pi mathu tie wi jenya kesathu na Israel mizza taghakeni wi tsüdi saghula anyi 144,000.

⁵Amizza kesü wi hazar taghakenini: Judah, Reuben, Gad, Asher, Naftali, Manasseh, Simeon, Levi, Issakhar, Zebulun, Josef, nu Benjamin.

⁹Ha seng wi hi ghangchi nan ciwi anyitenti ji ntsa thola si mekeya khi kesü mu! Mathu na ashicü, amizza, mizzatenti, nu ajühjja tsüdi wina keshhugho, nu mathu na athsümeni kemiki pvü, mathu kwen wi agu cünathu khusen nu kadipen nu Khaghanenizzawa tu wi nganben.

¹⁰Mathu na ahhai misikhhali jisha, “Hangshakeya tsüna ithu Nyiza, nu kadipen miwi donki keben Khaghanenizzawa wina kegho!”

¹¹Tangnyilothu tsüdila ngan nu kadipen, keshenpfüthu, nu hangben keten ghangsathu mejü tsü vü senben. Mathu na kadipen tu wi kukedu nu Anyiza kinyi,

¹²nu khi, “Amen! Keseng, anyankethang, kemetsa, nkesengcha, kinyikü, kekhang, nu kezü tsüna anuphan nu anuphanla ithu Nyiza ji le! Amen!”

¹³Keshenpfüthu kesü na hi wi keü, “Athsümeni kemiki pvü ketenthu na thothu, nu mathu khiewa na gho nu?”

¹⁴ Hi ma luneng, “Hi nchüle, kediwa. No chüben.” Ma hi kiza, “Anyi hathu ha ketizenkesa qhethiketen kesa wina shhughoya nu ghoben. Mathu na Khaghanenizzawa jjü pi mathu thsümeni satemetha nu mikidha.

¹⁵Tsalina mathu na Anyiza kadipen tu wi ngan nu tsathang tsajang ma kekinyijjen wi ma kekuli sa benden. Kadipen miwi donki kebenwa na ma kekhang pi mathu khweyaben.

¹⁶ Mathu na khiela ghama nu dighe neng nbendha; aghani nyelela kisah na mangla mathu thsü tena nbendha.

¹⁷ Kepaghenanye kadipen mnon wi keben Khaghanenizzawa na mathu hieya, nu mathu ssi wa kahang khuchiketen tssü kebvüpen wi chicü ben. Nu ciwi Anyiza na mathu nyontssü tsüdi nyen cüben.