Read Northern Rengma Naga CCÜCAKECHI 8 Bible Online

CCÜCAKECHI 8 - Northern Rengma Naga bible

CCÜCAKECHI 8

¹Khaghanenizzawa na mechantsi tagüwa sha kechi wi tang wi amighe kekihhe gishüpahan jü ccen sa.

²Tsaseng wi hi tangnyilothu tagü na Anyiza tu wi ngan keben mu, nu tutuwa tagü pi mathu cü theng.

³Tangnyilo kepa wi kesü na hankedemvu kemecang suna hikhu sengho kekinyipen kete wi ngan. Pi Anyiza nyithu tsüdi kekhie tsü wwacü nu kadipenwa tu wi ngan keben suna pi kesa kekinyipen wi tsü kinyi thsüle kesalina hankedemvu kejon pi ma cü theng.

⁴Anyiza tu wi ngan keben nyilowa kwen wi hankedemvu kemecang nikhu tsüna Anyiza nyithu kekhie gweghe tang wi kia.

⁵ Tsaseng wi nyilowa na hankedemvu kemecang hikhu tsü khuya nu kekinyipen wi anni pi tsü pongya, nu pi ayyi wi khalachia. Isanu ciwi atsanshigü, atsanphagha, atsancwe, nu ameghükuju sa.

⁶Tsaseng wi tangnyilothu tagü na tutuwathu tagü pi khou chi le kiden sen nu shhugho.

⁷Tangnyilo atuwa na ma tutuwa khouchi. Ciwi aghayi, anni, ajjü pi kesaghu pi ayyi wi keshushachi. Ayyi, achantonthu, nu aghang kemejjü tsüdila gishü kecheng sa nu kesü mecang.

⁸Tangnyilo keniwa na ma tutuwa khouchi. Ciwi anni na ayikha keti mecang keben ti kesa na qanca sen atssükedone non wi du. Atssükedone gishü kecheng sa nu kesü na ajjü sa,

⁹atssükedone wi hang kebenthu gishü kecheng sa nu kesü na shü, nu ahunjjenthu gishü kecheng sa nu kesü na yasa.

¹⁰ Tsaseng wi tangnyilo kechengwa na ma tutuwa khouchi. Ciwi ghotsi keti anni keqhe ti kesa kesü na tang wina qanca sen aghakuthu nu atssü kebvüpenthu gishü kecheng sa nu kesü miwi du.

¹¹ (Ghotsi tsü nyan na “Kekha”.) Atssü gishü kecheng sa nu kesü na kha, nu atssü tsüna kha kesalina anyi kejon na tsü jjü pvünu shü.

¹² Tsaseng wi tangnyilo mejüwa na ma tutuwa khouchi. Aghani, asha, nu ghotsithu gishü kecheng sa nu kesü kihhe pia, tsalina tsüthu gishü kecheng sa nu kesü na nwegüla; aghanan gishü kecheng sa nu kesü wi kewegü, nmila, aghaja gishü kecheng sa nu kesü wi tsü makesü sa.

¹³Tsaseng wi hi ghangchi nan amumu kesü na atssan wi pighe nu hati kekhi hhai zaya, “O, kemessi! Kemessi ntsa le! Tangnyilothu kepawa kecheng tsüna mathu tutuwa khouchi lethu, ayyi miwi hang kebenthu tsüdi ghena khatila qhethiketen saten nu!”