Read Northern Rengma Naga CCÜCAKECHI 9 Bible Online

CCÜCAKECHI 9 - Northern Rengma Naga bible

CCÜCAKECHI 9

¹Tsaseng wi tangnyilo mangawa na ma tutuwa khouchi. Hi ghotsi kesü na tang wina ayyi miwi qancadu kesa mu, nu ayyiku kedhu[1] shakhen pi tsü cü theng.

² Ghotsiwa tsüna ayyiku kedhu tsü lishüchi, nu ciwi anni kekhu anni kejon mecang ntsa kesa nikhu ti shhugho; ayyiku kedhuwa wi anni kekhu na shhugho aghani nu atssan shübhon.

³ anni kekhu wina ashiqathu na ayyi miwi dugho, nu ajjüssi kekhang makesü kesa pi mathu cü theng.

⁴Mathu na aghangwa nyelela achantonthu nyelela aghanglani mangla meyasala, isani anyi thothu na Anyiza mechantsi pi mathu tie wi jen pvü nten khe tsüthu ketan meten-meshalo kiza theng.

⁵Ashiqathu na anyi hathu pathiya nben, isala asha manga ketan mathu meten- mesha ben. Kemeten-kemesha wi kinaa tsüna ajjüssi kemti kinaa ti.

⁶ Asha manga jüwi tsü mathu na keshü bhaben, isala muya nben; mathu na shü mvu saben, isala keshü na mathu ghü bvüaben.

⁷ Ashiqathu tsüna goruthu na aghi wi wale keben ti; mathu li wi suna kadiliwen ti kesa na ben, nu mathu mmi na anyi mmi ti kesa.

⁸ Mathu lissen na nza lissen ti, nu mathu yha na ssensitemi yha ti kesa.

⁹ Amighe deshikeqhan ti kesa pi mathu deshi qhan pvü, nu mathu gisha hhai na goruthu na gorugarithu zanpvü nu aghi wi wa keten hhai ti.

¹⁰Mathu ghanu nu ahasi na ajjüssi ti kesa ben, nu mathu ghanu wi mathu na asha manga anyithu meten-mesha keya kekhang ben.

¹¹Ayyiku kedhu wi kediwa nyilo tsüna mathu kadimiwa sa nu kekhang senben. Ma nyan na Ibri jüh wi Abaddon; Grik jüh wi Apollion (majjügi “Keyasawa”).

¹²Kemessi atuwa na cendha; ha seng wi la kemessi keni na ghoben.

¹³ Tsaseng wi tangnyilo tughowa na ma tutuwa khouchi. Ciwi suna pi kesa kekinyipen Anyiza tu wi kebenwa ccügwen mejü wi ahhai kesü keshhugho hi zaya.

¹⁴Ahhai tsüna tangnyilo tughowa wi khi, “Nyilothu mejü bhen pi Eufrat Ghaku ketiwa wi chi ketheng tsü lishachilo!”

¹⁵Nyilothu mejü tsü lisha chia; kepaghenanye tsüthu na amapi, asha, aghanan, nu matsü hawa wi anyi tsüdi gishü pi kecheng sa nu kesü pathilo kesa ghena pi theng.

¹⁶Süpahithu kiden keben tsüna khalatsi meza keni le hi kiza.

¹⁷Hi kemanthi wina goruthu nu tsüthu miwi kebenthu mu; mathu na deshi-keqhan nmi pi anni ti, atsena sa pi safir ti, nu hichu pi anni lon ti kesa pvüden. Goruthu li na ssensitemithu li ti, nu tsüthu pang wina anni, anni kekhu, nu anni lon shhugho.

¹⁸Goruthu pang wina keshhugho adhagha kecheng anni, anni kekhu, nu anni lon tsüna anyithu gishü pi kecheng sa nu kesü pathia.

¹⁹Kepaghenanye goruthu kekhang na mathu pang nu mathu ghanu wi la ben. Mathu ghanu na amaghangthu ti ma li ben, nu mathu na tsüthu pi anyithu meten-meshaden.

²⁰ Adhagha hathu na nkepathi anyi kebenthu tsüdila mathu kuli ketheng wi tsü leben khapeghe meyala. Mathu na atsaghangthu nyelela suna, rükatssü, lezza, alon, achan pi atsikezhüthu na mu meya, za meya, nu ajühkhiya nketen kekinyi tsü teshi meyala.

²¹Nyelela mathu na nyu kepathi, kedema, keqheza, nu kaghanfü teshi meyala.