Read Northern Rengma Naga RUTH 1 Bible Online

RUTH 1 - Northern Rengma Naga bible

RUTH 1

¹Matsü kesie wa kesa wi Israel na Kadimiwa kesüla npi keben wi ayyi ciwi azeng kesü sa. Tsalina Efrat gei wi anyi kesü ma nyan Elimelek, Judah yyi Bethlehem wi hang ketenwa tsüna ma wubvü Naomi nu ma tsa keni Malon nu Khilion ssinu matsü keujü Moab diyyiwa wi hangle wa. Mathu na ciwi hang keben jüwi

³Elimelek na shü, nu Naomi na ma tsa keni ssinu denyi.

⁴Ma tsa keni wubvü na Moab nyi nza Orpa nu Ruth yaya. Amapi tagha-u seng wi

⁵Malon nu Khilion manyi la shü, nu Naomi na ma wuba nu atsathu nmila ma ketan sa.

⁶Matsü pahan seng wi Naomi na Apvüwa na sawegü pi ma nyithu cü nu mathu na pvüya ntsa sale kesa zaya; tsalina ma ma cünyie keni ssinu Moab teshi bvüale kesa kidenya.

⁷Mathu gweghe Judah wi whaneng keten alenca wi

⁸ma ma cünyie keni wi khi, “Nshinyi ajjen wi kheneng whala nshinyi jja gweghe hang walo. Nshinyi na ituwi nu shü kesathu tuwi mehai kesa tsüti Apvüwa na nshinyi tuwi kemehaiwa salo.

⁹Nu Apvüwa na nshinyi qho sapi n-nuwa nengya thsü nu ajjenlli sa keyawa salo.” Tsalina Naomi na manyi kimang nu kemehaiwa sa whalo khi. Isala manyi na qai,

¹⁰nu ma wi khi, “Nyele, ishinyi na no gweghe nu n-nyithu wi wa tenle.”

¹¹Naomi na luneng, “Nshinyi na whaneng nsathu yishüle. Nshinyi mangkesa na hi gweghe wa mvu ben nu? Nshinyi na hi atsathu pvügha neng pi nshinyi ssiben thsüya mehaile meshen ben kwe?

¹²Ajjen wi whanenglo, kepaghenanye hi n-nuwa nengle kesa qhai mtsüdha. Keujüla hi tsüti saya kemehai na benle meshen, nu shita n-nuwa nu atsathu muya lela

¹³nshinyi na mathu pvüza keshagha hieya mehai kwe? Ha ghena nshinyi na nyu kepa wi n-nukewa khenya ben kwe? Nyele, icünyie keni nshinyi na tsüti saya nben kesa chüben. Apvüwa na hi shunben, nu hi nshinyi ghena ileben güccü ntsa saben.”

¹⁴Manyi na kheneng qai wa. Tsaseng wi Orpa na kemehai sabenlo kesa ma nyiewa kimang nu ajjen wi wha neng, isala Ruth na ma gweghe ben wa.”

¹⁵Tsalina Naomi na Ruth wi khi, “Ruth, n-nanwa Orpa na ajjen wi ma nyithu nu ma cenpvü wi wha nengdha le. Ma gweghe ajjen wi wha nenglo.”

¹⁶Isala Ruth na luneng, “Hi no teshilo nkhi lalo! Hi ya no gweghe wa thsülo. No khiewa wa khe hi la waden; no khiewa hang khe hi ciwi hangden. N-nyi pi inyi saden, nu n-Nyiza pi iNyiza saden.

¹⁷No khiewa shü khe hi la shüden, nu hi pi ciwi vhüaden. Keshü ketan nyela pala pahan ghena hi no teshi thsü lethu, Apvüwa kemeten nkemehai ntsawa na imiwi keghowa salo!”

¹⁸Naomi na Ruth na ma gweghe wale khvu sa keben mukeya wi ma mangla nkhi nengla.

¹⁹Tsalina manyi gweghe Bethlehem npi kecu chu wa. Manyi wa Bethlehem cukeya wi anyuti mabenla anonghe ntsa sa, nu nzathu na jisha, “Ha ntsakhiwa Naomi kwe?”

²⁰Ma luneng, “Hi pi Naomi le nkhila, hi pi Marah[1] le cilo. Kepaghenanye Anyiza Kekhang ntsawa na hi kahang sapi kekha sa thsüdha.

²¹Hi hewi keban sanu wa, isala Apvüwa na hi kemissü ssi neng ghodha. Apvüwa Kekhang ntsawa na hi meshensa nu hi kesun pi agükeccü wi chithu mangkesa na hi pi Naomi le citen nu?”

²²Hawa ha Naomi na Moab wina ma cünyie Moab nyiwa ssinu kheneng kegho cüki. Manyi gho Bethlehem cukeya wi achentha lli na wwi wadha.