Read Northern Rengma Naga RUTH 2 Bible Online

RUTH 2 - Northern Rengma Naga bible

RUTH 2

¹Naomi na ma shili kesü ma nyan Boaz na ben. Boaz na ma wuba Elimelek theghi wi keban nu anyi kemechan kesü.

² Ghanan kesü Ruth na Naomi wi khi, “Hi ya alli wi wala kewwithu seng wi amaseng mahan thsülo. Hi anyi pahan na hi ya ma gweghe kuli thsü keben muya metsiben” Naomi na luneng, “Icünyiewa, walo.”

³Tsalina Ruth na alli wi wala kewwithu seng wi mathu na teshi kesathu amaseng tsü bhaden. Ma alli kesü wi kuli kebenwa tsüna Boaz lli sabenla.

⁴Matsü keu seng wi Boaz na Bethlehem wina gho nu kewwithu wi “Apvüwa na nthu ssiben ketenwa salo” khi. Mathu la luneng, “Apvüwa na sawegü pi no kecüwa salo.”

⁵Boaz na kekulithu kaghangwa wi keü, “Nza kinyibvü tegüwa katsü thowa nu?”

⁶Anyi tsüwa na khineng, “Ma asang nza Moab wina Naomi gweghe keghowa tsüle.

⁷Ma hi wi ma ya kewwithu seng wi amaseng saghu thsülo hi keü. Ma ghanen mitu wina kuli wadha nu khili wa matsü keujü akekhwen wi mnan benle.”

⁸Tsaseng wi Boaz na Ruth wi khi, “Ijüh kinachilo; alli hawi ketan khe kepa wi amaseng bha nwa lalo. Hewi nzathu gweghe kulilo;

⁹mathu na khiewa wwi wa khe mathu seng wi walo. Hi inyi pvüzathu wi no metenmesha nsa lalo kizadha. Nu no digheya lethu wala mathu na pvügho ketheng atssü khüti wi tsü jjüyalo.”

¹⁰Ruth na ma mmi zan ncüggüya nu ayyi wi kukedu Boaz wi khi, “No mangkesa na icüki meshen ntsawa saben nu? No khiena asang kesü tuwi mehai ntsawa saben nu?”

¹¹Boaz na luneng, “Nwuba keshü seng wi no n-nyiewa miwi kulikechi cüki hi tsüdila zayadha. Hi no khatinu nba, njja, nu no diyyiwa teshia, nu ghola no kheni nkechü nyithu jawi hangwa khe hi chüben.

¹²No kulikechi kutimen tsü Apvüwa na pi no kecüwa salo. No ma wi khwekeya bha kewa wi Apvüwa Israel Nyiza ya nkutimen sacen pi no kecüwa salo!”

¹³Ruth na luneng, “Kediwa, no ituwi mehai mtsüle! Hi nmagha kesüla ncen lela no ajüh kecca khipi hi keccüneng ghena hi inonghe yadha le.”

¹⁴Dsajjü keben wi Boaz na Ruth wi khi, “Ghola amesa pi akhu wi tenchi nu dsayalo.” Tsalina Ruth na gho kewwithu gweghe donki nu Boaz na anün pahan pi ma cü. Ma tsü dsa pi ma nonkwenya nu hela kedsatu pahan na ben.

¹⁵Ruth na shagha amaseng bha kewa seng wi Boaz na kewwithu wi khi, “Ma yala wwi pi chi ketheng wi lela asu mahanya thsülo, ma ssi nkitaghala nu ma nkhenla. Tsü miwi wwi pi chi ketheng wi asutsang pahan khushi pi cü nu ma ya tsüthu mahanya thsülo.”

¹⁷Tsalina Ruth na minulen wi kecu amaseng bha, nu ma tsü menusha kewa wi tsüna kilogram tagha-u sa kebenla muya.

¹⁸Ma asu tsü pvünu anyuti wi wha nu ma khaju saghuya khe pi ma nyiewa ccüca. Ma ghananshu kedsatu tsü la pi ma nyiewa cü.

¹⁹Naomi na ma wi keü, “No nansü khiewa asu haju saghuya nu? No thowa lli wi wa nu? Anyiza na sawegü pi anyi no nantizenchi kecüwa tsü kecüwa salo!” Tsalina Ruth na ma anyi kesü ma nyan Boaz lli wi kuli wale kesa pi Naomi kiza.

²⁰Naomi na ma nonghe ntsawa nu khi, “Apvüwa na sawegü pi Boaz kecüwa salo! Apvüwa na keshüthangla keshü nu kahang tuwi ma jüh khishi kechithu tsü saden.” Naomi na Ruth wi khi, “Anyi tsüwa na ishinyi shili jawi atheghi ghatsan, ishinyi nanya kemehaiwa tsüle.”

²¹Tsaseng wi Ruth na khi, “Tsümiwi ma hi kizala kewwithu na alli npi kewwikhi chu hi mathu tetsaki nu amaseng bhayalo kizale.”

²²Naomi na Ruth wi khi, “Anle, icünyiewa, no Boaz lli wi nzathu gweghe kekuliwa nghena mehaiben. No nyu kepa lli wi wa lethu nyu no metenmesha kesa le.”

²³Tsalina awhengsu nu achentha tsüdi npi kewwikhi chu Ruth na mathu gweghe kuli, nu ma nyiewa gweghe hang.