Read Northern Rengma Naga RUTH 3 Bible Online

RUTH 3 - Northern Rengma Naga bible

RUTH 3

¹Matsü keu seng wi Naomi na Ruth wi khi, “Hi awuba kesü bha pi no cü nu no ketanla njjenlli saya thsü nsathu yishüben.

²No wa ma nyi nzathu gweghe kekuliwa Boaz ishinyi theghiwa tsü meshenchilo. Kinachilo, ma khili minulen wi ha achentha ghaceng benla ben.

³Tsalina atssükizüya, nthsümeni kemehai ntsawa pvüya, nu hankedemvu pahan pi chiyalo. Isanu ma asu ghaceng keben pen witsü wa, isala ma npi dsajjü cenkeya tsü no ciwi benle kesa ma ya nchü thsü lalo.

⁴Ma khiewi jenten khe chübenla metsilo, nu ma jenwa lethu wala ma thsü lekinu ma ccü wi khhali walo. No khati nsathu yishü khe ma no kizaben.”

⁵Ruth na luneng, “Hi no kekhi tsüdila saden.”

⁶Tsalina Ruth na aniegi wi wa nu ma nyiewa na ma kekiza tsüti sa.

⁷Boaz na dsajjükeya seng wi ma anonyengthi sa. Ma wala achentha kejjügho ketheng ccü wi jenwa. Ruth na nkhena wala athsü lekinu ma ccü wi khhaliben.

⁸Boaz na aghaja wi shagha khapeghe wa nan nza kesü na ma ccü wi jen keben mu pi ma mansa.

⁹Ma “No thowa nu?” keüchi. Nzawa na luneng, “Hi Ruth le, kediwa. No ishili ghatsan kesü ghena no hi noncca keya-u; tsalina no hi yayalo.”

¹⁰Ma khi, “Apvüwa na sawegü pi no kecüwa salo. No khili sakeben hana no n-nyiewa ghena sakechi miwi atheghi jühkeyali kedi pi ccücaben. No kepvüza nyi kesü keban le ketha-u wi lela n-nuwa kesa-u, isala no tsüti nsa.

¹¹Ruth, nmessi lalo. Anyuti wi anyi tsüdila no nza kemehai kesü le kesa chükeben tsüti hi no kekhie tsüdila sa cüaben.

¹² Hi ashili ghatsan kesü nu no noncca keya-u le kesa tsüna ntsakhiwa, isala imiwi ashili tetsaki kesa anyi kesü na benle.

¹³Shita hewi ben lalo, ishinyi ghanen wi wala ma no nonccaya benla nye khe chüya na. Tsüti sayaben lethu, mehaidha; isani tsüti saya nben lethu, hi hang kebenwa Anyiza nyan wina kishenben, hi no nonccaya ben. Tsalina ghanen wi kecu hewi jen ben lalo.”

¹⁴Tsalina nzawa na ma ccü wi jen wa, isala nyu ya ma nmu thsüle kesalina atsan npi thangtheghila shagha, kepaghenanye Boaz na anyi thola Ruth na ciwi jenle kesa tsü nchü thsü mvu.

¹⁵Boaz na ma wi khi, “Nthsü khushiya nu pi hewi shizighe chilo.” Ma tsüti saya, nu Boaz na achentha kilogram ngwe-u pi meyisha chi cü nu pieki pi ma depfü wi doncüa. Tsaseng wi ma tsü pvünu anyuti wi wha neng.

¹⁶Ma ajjen cukeya wi ma nyie na ma wi keü, “Icünyiewa, no khati saya nu?” Boaz na ma ghena mangwa sachi khe Ruth na tsüdila khipi ma nyiewa kiza.

¹⁷Ma khi, “Ma hi kemissü no wi nwha neng lalo khi, tsalina ma achentha ha tsüdi pi hi cüle.”

¹⁸Naomi na ma wi khi, “Ruth, ha tsüdila khati saten khe npi kemu chu nlebensie ben lalo. Boaz na ha jjügi npi südhekeya chu ma ceen benya nben.”