Read Northern Rengma Naga RUTH 4 Bible Online

RUTH 4 - Northern Rengma Naga bible

RUTH 4

¹Boaz na anyuti kaghapeng jenka wi keccünengli pen wi wa nu ciwi donki ben. Tsaseng wi Boaz na kekhiwa anyi Elimelek shili ghatsan ntsawa tsüna gho, nu Boaz na ma wi khi, “Ipvüshangwa, hewi ghola donkilo.” Tsalina ma wa ciwi donkiya.

²Boaz na anyuti wi ccülikesathu tagha la gho ciwi donkilo cichi. Mathu na gho donkikeya seng wi

³ma ma shiliwa wi khi, “Khili Naomi na Moab wina kheneng ghodha, ma Elimelek ji alli tsüpi jeü mvuben,

⁴nu hi kemeshen tsü no tsü cüki kechü-u le. Tsalina no tsü yamvu lethu anyi hewi donki kebenthu tuwi na tsü shüyalo. Isala no tsü meya mvu lethu tsü la khi, kepaghenanye tsü shükeya-u na atuwa no, nu tsü seng wi hi le.” Anyi tsüwa na khi, “Hi tsü shüya nben.”

⁵Boaz na khi, “Mehai ntsadha, keujüla no Naomi wi alli tsü shü lethu no Moab nyi denyilewa Ruth la shüyaben, isathu alliwa tsüna anyi shü kesawa theghi wi benben.”

⁶Anyi tsüwa na luneng, “Tsüti lethu, hi alliwa tsü shükeya-u tsü teshiaben, kepaghenanye tsü ma jjügi itsangathu na tsü ghonya nbendha. No tsü shüyalo; hi tsü ya ntendha.”

⁷Tsü tsüwi atsanqai pi jeü nyelela kemili lethu ayen hati saden; jeü kebenwa na ma ccüguwen khushi pi shü kebenwa cüden. Israel nyithu na hatinu ajjügi tsü südheden.

⁸Tsalina anyi tsüwa na Boaz wi “No tsü shüyalo” khichi nu ma ccüguwen khushi pi Boaz cüa.

⁹Tsaseng wi Boaz na ccülikesathu nu anyi ciwi kebenthu tsüdi wi khi, “Hi nansü Naomi wi Elimelek keben tsüdi nu ma tsa keni Malon nu Khilion manyi la shüya kesa tsüghena nthu tsüdila chüza saben.

¹⁰Tsü miwi, Moab nyiwa Ruth, Malon wubvü sa keghowa tsüna iwubvü sadha. Ha pi anyi shü kesawa theghi keben saden, nu ma theghi na ma nyithu jawi nu ma nyu wi benden. Nansü nthu na ha ghena chüza saben.”

¹¹Ccülikesathu nu anyi kepathu na khi, “Anle, ithu na chüzathu saben. Apvüwa na nwubvü sapi Rachel nu Leah manyi na atsanga kejon pvügha pi Jakob kecü ti salo. No Efrat gei wi keban sa nu Bethlehem wi anyi kemechan sa keyawa salo.

¹²Apvüwa na nza pvünyi ha wina atsanga pi no cü ketenthu ya Judah nu Tamar tsawa Perez theghi ti sa keyawa salo.”

¹³Tsalina Boaz na Ruth pi ma wubvü saya. Apvüwa na sawegü pi ma cü nu ma atsa-npvüya nu atsa kesü pvügha ya.

¹⁴Nzathu na Naomi wi khi, “Apvüwa senglo! No nonccaya thsüle kesalina ma nansü atsa kesü pi no cüdha. Pvüzawa ya Israel jawi anyi kemechan sa keyawa salo!

¹⁵Ncünyiewa na no tizen ntsa, nu ma atsa tagü miwi ji kayi nghena kulichi cüdha. Nu ma khili atsa kesü pvügha pi no cüdha; atsawa na kahang ketheü sengho no cü nu no keqhai seng wi la yazishu benyaben.”

¹⁶Naomi na atsawa tsü khün pieya nu ma tetsaki nu noncca.

¹⁷Ajenphon wi nzathu na atsawa nyan pi Obed cia. Mathu na anyi tsüdi wi “Atsa kesü pvügha pi Naomi cüdha le” isa khi. Obed na David bawa Jesse ba.

¹⁸Hawa ha Perez na wala David kecu atheghishi: Perez, Hezron, Ram, Amminadab, Nashon, Salmon, Boaz, Obed, Jesse, David.