Read Northern Rengma Naga 1 SAMUEL 12 Bible Online

1 SAMUEL 12 - Northern Rengma Naga bible

1 SAMUEL 12

¹Tsaseng wi Samuel na Israel nyithu wi khi, “Nthu na hi wi kekhie ti hi tsü sacüdha. Hi kadimiwa kesü pi nthu miwi kekhang senlo khuchidha,

²nu nthu khili ma pi nthu ssi thsüben. Ighena tsü hi qhaiwa nu ilipondha, nu itsathu na nthu gweghe ben. Hi kepvüza tsüwi na nthu ccüli sagho khili cuben.

³Hi hewi benle. Keujüla hi kulizzi lethu, khili Apvüwa nu ma kessikeya kadimiwa tuwi na hi kimenni cülo. Hi anyi pahan mesü nyelela gada khuya kwe? Hi anyi pahan mechu nyelela pasha kwe? Hi anyi pahan wi alaa khuya kwe? Keujüla hi hathu ha kesüla satheng lethu, hi mangwa khuya theng khe pi ma cü neng shaben.”

⁴Anyithu na luneng, “Nyele, no ithu mechu nyelela pasha ntheng; no tho jila mangla khuya ntheng.”

⁵Samuel na khineng, “Apvüwa nu ma kessiyakesa kadimiwa manyi na nansü nthu na imiwi kesami mangla mu meyale kesa chüza saben.” Anyithu na luneng, “Anle, Apvüwa na ithu chüza saben.”

⁶ Samuel na anyithu wi khi, “Apvüwa hawa ha Mosa nu Aaron manyi kessiya nu Ejipt wina nthu bamyithu ssinu shhugho.

⁷Ciwi nthu keben pen wi nganben lalo, hi khili Apvüwa na nthu nu nthu bamyithu hangshayale kekuli keti sa kechithu tsüdi khipi nthu kiza neng nu Apvüwa tuwi na nthu kimenniden.

⁸ Jakob nu ma theghi na Ejipt wi wa nu Ejipt nyithu na mathu pasha nu nthu bamyithu na Apvüwa wi kekiqa khie. Apvüwa na Mosa nu Aaron manyi kesun chi nu Ejipt wina mathu ssi shhugho ayyi hewi hang thsüa.

⁹ Isala anyithu na Apvüwa mathu Nyiza tsü malia, tsalina ma Filistinthu nu Moab kadimiwa nu Huzor nyunutiwa wi süpahi benchüwa Sisera ya nthu bamyithu ssikaghashen thsü nu mathu miwi khangya.

¹⁰Tsaseng wi mathu na maghala Apvüwa wi kekiqa khie nu khi, ‘Apvüwa, ithu na no wina kheneng wa Baal nu Astart tsikezhüthu kinyi wa kesalina ithu na samidhale. Ithu ghinyithu kwen wina ithu kekasha cülo, nu ithu na no kinyi tenle!’

¹¹ Isanu Apvüwa na Gideon, Barak[7] Jeftha, nu asakhenwa wi hi kesunchi. Ikhang tsüdi nthu ghinyithu kwen wina nthu kekasha cü, nu nthu na yazishu hangya thsüle.

¹²Isala Ammon kadimiwa na nthu ssikaghashen kegho wi nthu na Apvüwa nthu kadimiwa tsü meya mvula nu hi wi ‘Ithu na kadimiwa kesü pi ithu miwi kekhangsen thsü mvu benle,’ khie.

¹³“Tsalina hawa ha kadimiwa nthu na kessikeyawa tsüle; nthu na ma wi khie, nu Apvüwa na ma pi nthu cüdha.

¹⁴Keujüla nthu na Apvüwa nthu Nyiza tsü kinyikü, ma kekuli sa, ma jüh kina, nu ma yenkhukechithu tsü nie, nu nthu le nthu kadimiwa lela ma nie lethu, pala tsüdi wila nthu ghena mehaiben.

¹⁵Isala nthu na Apvüwa jüh nkina nu ma yenkhukechithu tsü n-nie lethu, ma nthu nu nthu kadimiwa shunben.

¹⁶Tsalina nthu keben pen wi nganben lalo, nthu na Apvüwa na pala keti kuli chile keben tsü muyaden.

¹⁷Hajü pathsü wadha kwale? Isala hi kekhie sa chithu, Apvüwa na atsankeshigü nu atsankegho kesunchi cüaben. Khathansha wi tsüti sagho khe nthu na Apvüwa wi kadimiwa kesü kekhie ghena nthu na kesami keti kesü sapi ma shundhale kesa chüyaben.”

¹⁸Tsalina Samuel na kekhie sachi, nu Apvüwa na tsü ghanan atsankeshigü nu atsankegho kesunchia. Isanu anyi tsüdila Apvüwa nu Samuel manyi messi,

¹⁹nu mathu na Samuel wi khi, “Kediwa, ithu ya nshü thsüle kesalina Apvüwa n-Nyiza wi kekhie sa cülo. Ithu na khili ithu kesami kepa tsüdi miwila kadimiwa kesü kekhie ghena samidhale kesa chüyadha.”

²⁰Samuel na luneng, “Nthu na nkemehai hati kesa kesü sa lela nmessi lalo, nu Apvüwa wina khapeghe nbvüla, isala nthu leben tsüdi sen nu ma kekuli salo.

²¹Milikemesa cenpvüthu nie nwa lalo; tsüthu tsüna nthu kiqaya nyelela hangshaya nben, kepaghenanye tsüthu na atsentsawa nye.

²²Apvüwa na kekishen kesü satheng, nu ma nthu teshi nben, kepaghenanye ma nthu pi ma nyithu sayale südheyadha.

²³Ighena tsü hi nthu ghena kekhie nsala nu sami pi Apvüwa shun nbenle. Tsüti kesawa nye, hi mangwa mehai nu kesau khe pi nthu sansi cüden.

²⁴Apvüwa jüh kina nu nthu jühtsentsa sala lebenchi nu ma kekuli salo.

²⁵Isala keujüla nthu na kesami tsü sakiben lethu, nthu nu nthu kadimiwa lela yasa cüben.”