Read Northern Rengma Naga 1 SAMUEL 13 Bible Online

1 SAMUEL 13 - Northern Rengma Naga bible

1 SAMUEL 13

¹Saul na kadimi saya, nu ma amapi keni Israel miwi kadimi sa.[8]

²Saul na anyi hazar kecheng kessiya. Ma mathu hazar keni pi Mikhmash nu Bethel yyishiphon diyyiwa wi ma gweghe thengya, nu mathu hazar kesü pi Benjamin mizza yyi Gibea wi ma tsa Jonathan gweghe kesun chia. Saul na anyi kepathu tsü kesun pi ajjen wi wha thsüa.

³Jonathan na Geba wi Filistin benchüwa pathia nu Filistinthu tsüdila tsü zaya. Tsaseng wi Saul na nyilothu kesun pi diyyiwa maben wi chi nu tutuwa khou pi Ibri nyithu cipi aghi wi chi.

⁴Saul na Filistin benchüwa pathia nu Filistinthu na mathu nanmeghü benle kesa pi Israel nyithu tsüdila kiza. Tsalina anyithu na mathu ci kechi tsü kina nu gho Gilgal wi Saul gwegheya.

⁵Filistinthu na Israel nyithu ssisale saghuya; mathu na aghi goru garithu hazar changha, anyi goru kessithu hazar tugho, nu süpahithu na atssükedone ghüsa wi ahachan ti ben. Mathu na Mikhmash, Bethaven na niduwa wa nu ciwi kemnanpen sa.

⁶Mathu na ciwi khang ntsa nu Israel nyithu ssisa, nu mathu pi agükeccü wi chia. Israel nyithu pahan na alonku nu ayyiku nyelela alonshi jawi nyelela ayyiku kechhü nu atssükhangthu wi kuthi wa;

⁷nu kepathu na Jordan Ghaku pvüdhi sen nu Gad nu Gilead yyi wi wa. Saul na khilila Gilgal wi ben, nu anyithu na ma gweghe nu messi pi kedheggüben.

⁸ Samuel na ma kiza ketheng ti ma ghanan tagü Samuel hie lela Samuel na khili kecu Gilgal wi npi gho. Anyithu na Saul teshi nu bvüshan tendha,

⁹tsalina ma anyithu wi khi, “Mecang pi kekinyi nu kecca ghena kekinyithu tsü sengholo.” Ma mecang pi kekinyiwa tsü sachi,

¹⁰nu ma tsü sacenya meyi Samuel na gho cuya. Saul na akhemi wi shhula ma metu nu ma ssiya,

¹¹isala Samuel na khi, “No khati sadha nu?” Saul na luneng, “Anyithu na hi teshi nu bvüshan tendha, nu no ghole khi nu ngho; tsüwi Filistinthu na Mikhmash wi saghuyale.

¹²Tsalina hi kemeshen tsü ‘Filistinthu na he Gilgal wi hi ssikaghashen le bendha, isala hi Apvüwa kenenwa tsü npi keü nan.’ Tsalina hi mecang pi kekinyiwa tsü sachidha le.”

¹³Samuel na luneng, “No kejüphon kekuli kesü sadha. No Apvüwa n-Nyiza na ayenkhukechiwa tsü nkinaladha. Keujüla no tsü kina lethu, ma no nu nshicübvüghathu ya anuphanla Israel miwi kekhang sen thsü kesale.

¹⁴Isala no khili kekhang senya nbendha; kepaghenanye no ma jüh nkinaladha. Apvüwa na anyi ma kenenwa bhaya nu ma pi ma nyithu miwi kekhang sen thsüaben.”

¹⁵Samuel na shagha Gilgal teshi nu wa. Kepa wi anyithu na Saul nie wa ma süpahithu gwegheya. Mathu na Gilgal wina Benjamin yyi wi Gibea wi wa. Saul na ma süpahithu meza tugho na ma gweghe ketenthu tsü mehai tsü si nan.

¹⁶Saul, ma tsawa Jonathan nu anyi manyi gweghe ketenthu na Benjamin yyi wi Geba wi kemnanpen sa; Filistinthu na Mikhmash wi kemnanpen saben.

¹⁷Filistin süpahithu na akhang kecheng sa sen nu mathu kemnanpen wina shu; akhang kesü na Shual yyi wi Ofra kepeghewa,

¹⁸akhang kepawa na Beth Horon kepeghewa, nu akhang kepawa na aggü wi ben nu Zeboim Yyiketijü nu aghansha ghapeya keten kepeghewa wi wa.

¹⁹Tsü tsüwi Israel wi amighe kecühnyi nmi; kepaghenanye Filistinthu na Ibri nyithu ya njünnu nu apiethu cüh thsü ntenle satheng.

²⁰(Israel nyithu na Filistinthu wi wa amkhu, kejügü, ampvü, nu kecükhhaghathu bhagha yaden;

²¹ampvü kebhagha nu matsa kesachi men na rükatssü kizzakeu kesü, nu amkhu nyelela kejügü kebhagha men na rükatssü keni tsüti saden.)

²²Tsalina aghikesa tsathang wi Saul nu ma tsawa manyi ketan khe Israel nyi süpahithu thola njünnu nyelela apie nmi.

²³Filistinthu na süpahithu akhang kesü kesun pi Mikhmash Pass tsü hie thsüa.