Read Northern Rengma Naga 1 SAMUEL 14 Bible Online

1 SAMUEL 14 - Northern Rengma Naga bible

1 SAMUEL 14

¹Ghanan kesü wi Jonathan na ma ghighe pvüketen pvüzawa wi khi, “Ghalo, ishinyi Filistinthu kemnanpen wi wa na.” Isala Jonathan na ma ba Saul wi nkiza;

²Saul na anyi meza tugho ssinu Gibea na kesie nkesa Migron wi ahhibvü ton kesü cakhu wi mnanben.

³(Shilo wi Apvüwa keqhaikedi Eli tsawa Fineha tsa Ahitub cünyuwa Ikhabod tsa Ahijah na keqhaikediwa depfü kewhengthsü mphiden). Anyithu na Jonathan bvü kesa tsü nchü.

⁴Mikhmash Pass wi Jonathan na pvüdhi sen nu Filistinthu kemnanpen wi du kesa witsü alonshi keti keni na ghapeli ben: kesü pi Bozez nu kepawa pi Seneh khiden.

⁵Kesü na yyikaghagu na aghawa Mikhmash kepeghewa nu kepawa na acülawa Geba kepeghewa.

⁶Jonathan na pvüzawa wi khi, “Ishinyi Anyiza nkechüthu Filistinthu kemnanpen witsü du na. Apvüwa na ishinyi kiqa cüla mechü; ishinyi ketan lela ma mangla khangkeya pi ishinyi nkecü sa nben.”

⁷Pvüzawa na luneng, “No mangwa sa mvuben khe salo, hi no gweghe benle.”

⁸Jonathan na khi, “Ishinyi tsü pvüdhi wa nu Filistinthu ya ishinyi muya thsü na.

⁹Keujüla mathu na ishinyi ngan nu mathu hieben lalo khi lethu, ishinyi na khiewa nganben khe ciwi ngan benden.

¹⁰Isala keujüla mathu na ishinyi mathu wi gholo khi lethu, ishinyi na tsüti saden, kepaghenanye tsüna Apvüwa na mathu miwi khangkeya pi ishinyi cü kesa zensu saben.”

¹¹Tsalina manyi na Filistinthu ya manyi muya thsüa, nu Filistinthu na khi, “Ghangchilo, Ibri nyithu pahan na mathu kuthi keben yyiku wina shhugho tendha le!”

¹²Tsaseng wi mathu na Jonathan nu pvüzawa cichi nu khi, “Hewi shhugholo! Ikhang na pala pahan pi nshinyi kiza ten na!” Jonathan na pvüzawa wi khi, “Hi nie ghalo. Apvüwa na mathu miwi khangkeya pi Israel cüdha.”

¹³Jonathan na ma kwen pi when nu akhu tsüla ayyikaghagu wina megheki, nu pvüzawa na ma nieki. Jonathan na Filistinthu ssikaghashen nu mathu whengshia, nu pvüzawa na mathu pathia.

¹⁴Kepathi atuwa wi ha Jonathan nu pvüzawa manyi na apen ayyi amaha gishü mejü wi kesü pi kechi pen wi tsü anyi ngwe-u pathia.

¹⁵Diyyiwa wi Filistinthu tsüdila qhethiketen sa; kemnanpen wi yilakeshuthu nu süpahithu na messi pi kedheggü; ciwi ayyi na kuli nu kemessi keti sa.

¹⁶Saul nyithu na Benjamin yyi Gibea wi ben nu Filistinthu na chükivvü pi bvüzighe keben tsü ghangben.

¹⁷Tsalina Saul na ma nyithu wi khi, “Süpahithu si nan nu thowa nmi khe chüyalo.” Mathu na tsü si kewa wi Jonathan nu ma ghighe kepvüwa pvüzawa manyi nmila keben muya.

¹⁸Saul na keqhaikediwa Ahijah wi khi, “Adepfü kewhengthsü sen nu hewi gholo.” (Tsü tsüwi Ahijah na Israel nyithu tuwi tsü pvüden.)

¹⁹Saul na ajüh khipi keqhaikediwa ccünengtu keben na Filistin kemnanpen wi chükivvü kesa na nmehai pfü pfü shagha kesalina Saul na ma wi khi, “Apvüwa keccüneng tsü na nmidha!”

²⁰Tsalina ma nu ma nyithu na Filistinthu na chükivvü pi khokho kesali keben jawi dula mathu ssikaghashen.

²¹Ibri nyithu pahan tsütu wina Filistinthu gweghe kemanpen wi kewathu na khapeghe ghola Israel nyithu wiwa Saul nu Jonathan gwegheya.

²²Kepathu Efraim yyishiphon wi kebenthu na Filistinthu na bvüzighe bendha le kesa zaya. Tsalina mathu la gweghe wa Filistinthu ssisa,

²³wala Bethaven thenkeghe chia. Tsü ghanan Apvüwa na Israel hangsha cü.

²⁴Tsü ghanan Israel nyithu na ghamaya kesalina nkhangla, kepaghenanye Saul na kekishen kesü sa nu ahza khuchi theng; “Anyi kesü le kesü lela hi nansü aghinyithu miwi ajukhi npi yakeya chu kedsakejjü sen khe kishen-keshi kepvüwa salo.” Tsalina thola ghanan thangthang mangla npi dsajjü.

²⁵Mathu tsüdila achan jawi gho nan anikholi kebenla muya.

²⁶Achanton tsüdi wila anikholi na pong ben, isala thola tsü ndsa, kepaghenanye mathu tsüdila Saul kishen-keshi tsü messi.

²⁷Isala Jonathan na ma ba na kishen-keshi pi anyithu khiteqhe ketheng tsü npi zaya; tsalina ma akhhatssü kesü khusen keten tsüpi anikhotssü non wi shunchi nu khushi pi anikholi pahan dsa. Ma wan hanhashu shagha.

²⁸Isala anyi kesü na ma kiza, “Ithu tsüdi ghama kesalina nkhangla ben, isala nba na ithu khiteqhe nu khitheng, ‘Anyi kesü le kesü lela nansü kedsakejjü sen lethu kishen-keshi pvüben.’ ”

²⁹Jonathan na luneng, “Iba na ithu nyithu miwi khatila qhethiketen kesa satheng nu! Ghangchilo, hi anikholi tsü kedsa ghena khatila hanhashu sadha nu!

³⁰Ithu nyithu na nansü aghinyithu chakeya wi khukeya kedsakejjü tsü dsaya lethu khatila mehai kesa nu! Mathu na Filistinthu khaju pathiya kesa khe meshenchilo!”

³¹Tsü ghanan Israel nyithu na Mikhmash na wala Aijalon kecu Filistinthu ssisa nu mathu chaya. Khili tsüwi ha Israel nyithu na ghama pi nkhangladha,

³²tsalina mathu kejügüli wa aghinyithu wi ghankeya khaghaneni, amesüsi, tsüthu ghan pi pathi, nu ajjü na asa wi keben tsü dsa.

³³ Nyu na Saul kiza, “Ghangchilo, anyithu na ajjü asa wi keben tsü dsa nu sami pi Apvüwa shun bendha le!” Saul na khi, “Nthu nyu kematsathu! Alonketi kesü kullu sen nu he hi wi gholo.”

³⁴Tsaseng wi ma ahza kepa wi kesü khuchi, “Anyithu jawi wa mathu tsüdila mathu mesüsi nu khaghaneni sen he wi gholo kizalo. Mathu na he wi tsüthu pathi nu tsü dsaben, mathu na ajjü asa wi keben tsü dsa nu sami pi Apvüwa nshunla.” Tsalina tsü ghaja mathu tsüdila mathu mesüsi sengho ciwi pathi.

³⁵Saul na kekinyipen kesü sapi Apvüwa wi chi; tsüna ma kekinyipen kesa atuwa.

³⁶Saul na ma nyithu wi khi, “Ithu aghaja na cü Filistinthu ssikaghashen, atsan npi kethang wina mathu ji shuya, nu mathu pathikhi cü na.” Mathu luneng, “No kemeshen sayalo.” Isala keqhaikediwa na khi, “Atuwa sa Anyiza ccüneng nan na.”

³⁷Tsalina Saul na Anyiza wi keü, “Hi wala Filistinthu ssikaghashenla? No khangkeya pi ithu cüben ma?” Isala Anyiza na tsü ghanan ma nluneng la.

³⁸Tsaseng wi Saul na anyi ccülikesathu wi khi, “Hewi gho nansü mangwa sami theng khe chüyalo.

³⁹Hi khangkeya pi Israel cü ketenwa hangkeben Apvüwa nyan wina khishiben, kesazziwa tsüna itsawa Jonathan sa benla lela pi shü thsüaben.” Isala anyi thola mangla nkhila.

⁴⁰Tsaseng wi Saul na mathu wi khi, “Nthu tsüdila ciwi nganlo, nu Jonathan ishinyi na hewi nganden.” Mathu na luneng, “No kemeshen sayalo.”

⁴¹ Saul na Apvüwa Israel Nyizawa wi khi, “Apvüwa, no nansü mangkesa na hi nlunengla nu? Apvüwa, Israel Nyizawa, alon kemethathu ha wina hi luneng chilo. Keujüla kesazziwa tsüna Jonathan nyelela hi lethu, Urim wina luneng chi; isala tsüna n-nyi Israel lethu, Thummim wina luneng chilo.” Luneng kechi wi Jonathan nu Saul manyi le kesa chüya; nu anyithu na meshonben.

⁴²Tsaseng wi Saul na khi, “Itsawa Jonathan nu ishinyi jüwi südhe chilo.” Nu Jonathan na le kesa chüya.

⁴³Isanu Saul na Jonathan wi keü, “No mangwa satheng nu?” Jonathan luneng, “Hi anikholi tsü keu dsadhale. Hi hewi ben — Hi shüle kidenyadha.”

⁴⁴Saul na ma wi khi, “Anyiza na no pi nshü thsü lethu, hi pi shü thsü kesawa salo!”

⁴⁵Isala anyithu na Saul wi khi, “Israel ghena khangkeya keti ha sen keghowa Jonathan pi shü thsüa ten kwe? Nyele! Ikhang na hangkebenwa Apvüwa nyan wina khishiben, ma li wi alissen kesüla bhataghaya nben. Ma nansü sa kechi tsüna Anyiza kekiqa sen nu sakeya le! Tsalina anyithu na Jonathan pi shü thsüale keben wi hangshaya.”

⁴⁶Tsaseng wi Saul na Filistinthu jügü nwala, nu mathu na mathu yyi wi kheneng wha.

⁴⁷Saul na Israel kadimiwa sakeya seng wi ma ghinyithu tsüdi ssisa: Moab, Ammon, Edom nyithu, Zoba kadimithu, nu Filistinthu. Ma kusi aghisa wa khe ma khangya.

⁴⁸Ma khang ntsawa sa nu Amalek nyi lela chaya. Ma nyu ji shu ketenthu tsüdi kwen wi Israel nyithu kekashaya.

⁴⁹Saul tsathu na Jonathan, Ishvi, nu Malkhishua. Ma nga keqhaiwa nyan na Merab, nu ghanyiwa na Mikhal.

⁵⁰Ma wubvü na Ahimaaz nga Ahinoam; ma süpahi miwi benchüwa na ma bizawa Ner tsa Abner.

⁵¹Saul ba Kish nu Abner ba manyi ba na Abiel.

⁵²Saul na ma hangkeben chu khang ntsa nu Filistinthu ssisa. Tsalina ma kusi wi anyi kekhang nu kempvüza muya khe pi ma süpahizi wi chiyaden.