Read Northern Rengma Naga 1 SAMUEL 21 Bible Online

1 SAMUEL 21 - Northern Rengma Naga bible

1 SAMUEL 21

¹ David na Nob wi keqhaikediwa Ahimelek wi wa. Ahimelek na kedheggü shhugho ma metu nu ma wi keü, “Mangkesa na no ketan he wi ghoben nu?”

²David na luneng, “Hi hewi kadimiwa kekuli sa ghoben. Ma hi kesunchi keben jjügi ha pi thola nchü thsü lalo kesa hi kizale. Inyithu ghena tsü hi mathu apen kesü wi hi metulo kizatheng.

³No khili ighena mangwa ben nu? Amesa abe manga nyelela no mangwa ben khe pi hi cülo.”

⁴Keqhaikediwa na khi, “Hi amesa jümu mangla nmi, isala amesa kemetha ketan benle; keujüla n-nyithu na hajü nza ngweghe lethu, nthu na tsü dsaya mehai.”

⁵David na luneng, “Mathu na hajü tsüti nsale. Inyithu na keshüthangla ajümu wi kijünyi kewa lela mathu na keccüna wi metha benden; isalethu nansü ajjügi kesü ghena kegha wi ha mathu khatila metha ben nu!”

⁶ Tsalina keqhaikediwa na amesa kemethawa tsüpi David cüa, kepaghenanye ma amesa pi Anyiza cü kesa miz kemethawa miwi ketheü pi ma mithon sa nu khuya kesa tsü ketan ben.

⁷(Saul sahang kenoncca jawi kediwa Edom wina keghowa Doeg na tsü ghanan ciwi ben, kepaghenanye ma keccüna kesü sacenle ben.)

⁸David na Ahimelek wi khi, “No apie nyelela njünnu kesü pi hi cüya mehai ma? Kadimiwa ahza khukechi ghena hi kaghaji ntsawa teshi nu hi njünnu nyelela aghighe mangla khukeya tsü nmilale.”

⁹ Ahimelek na luneng, “Hi, no Ela Yyiketijü wi pathi kesawa Filistin nyi Goliath njünnu tsü benle; tsüna athsü pi meju pi adepfü kewhengthsü seng wi tsü chitheng. No khuya mvuthu tsü khuyalo — hewi aghighe tsü ketan ben.” David na khi, “Tsü miwi njünnu kemehai khiela nmile! Tsüpi hi cülo.”

¹⁰Tsalina David na shagha nu Saul tubvü sen Gath wi kadimiwa Akhish wi wa.

¹¹ Kadimiwa kedithu na Akhish wi khi, “Hawa ha David ma diyyi wi kadimiwa tsü nye kwe? Anyi hawa ha nzathu na nashü nu akhwi pi sakila, ‘Saul na anyi hazar pathia, isala David na hazar tagha pathia’ kesawa tsüle.”

¹²David na mathu jüh tsüpi ma leben wi chiya, nu ma Kadimiwa Akhish messi ntsa wa.

¹³Tsalina khathansha wi David na mathu kete wi wa khe nkemetsa ghe sa nu mathu na ma khenthu ma kejüphon ti kuli; ma wala anyunutiwa kaghapeng jenka tsü qanan nu ma meceng na ma pang kenye miwi lle dugho thsü.

¹⁴Tsalina Akhish na ma kekhu wi kedithu wi khi, “Ghangchilo! Anyi ha deja benle! Isathu, nthu mangkesa na ma ssinu hewi ghoten nu?

¹⁵Hi hewi kedeja nyi kejon nmi kwe? Mangkesa na kepa wi la kesü ssigho ijjen wi ma kedeja kekuli sapi ilikesaghang sa thsü ben nu?”