Read Northern Rengma Naga 1 SAMUEL 26 Bible Online

1 SAMUEL 26 - Northern Rengma Naga bible

1 SAMUEL 26

¹ Zif wina anyi pahan ghola Gibea wi Saul kizala David na Judah ghansha katen wi Hakhila Yikha wi kuthi benle khi.

²Saul na wan Israel wi süpahi kemehai ntsathu hazar kecheng ssiya nu Zif ghansha wi David bha wa,

³nu Hakhila Yikha miwi alen kete wi kemnanpen saben. David na khilila aghansha wi ben, nu Saul na ma bha ghobenle kesa chükeya wi

⁴ma wahhaithu kesun pi ntsakhiwa Saul na ciwi benla nmi khe wa thsü.

⁵Ma wan wala Saul nu ma süpahizi benchüwa Ner tsa Abner manyi na apen khiewa jen ben khe chüya. Saul na kemnanpen non wi jen, nu ma nyithu na ma vüla kemnanpen saben.

⁶Tsaseng wi David na Hitti nyiwa Ahimelek nu Joab cünyuwa Abishai (manyi jja na Zeruiya) manyi wi keü, “Nshinyi thowa na hi gweghe Saul kemnanpen wi wa nu?” Abishai na luneng, “Hi wa tenle.”

⁷Tsalina tsü ghaja David nu Abishai manyi na Saul kemnanpen non wi du Saul na ma pie pi ma li kete ayyi wi shon nu kemnanpen non wi jen keben muya. Abner nu ma süpahithu na ma vüla jenben.

⁸Abishai na David wi khi, “Anyiza na shita nghinyiwa pi nkwen wi chicüdha. Hi yala khili ma pie chen pi kutitan na ma pi ayyi wi mejenten thsülo — Hi keni tughu pi ghon nbenle!”

⁹Isala David na khi, “No ma patena yishüle! Apvüwa na kemeten pi anyi thowa na ma kessiya kesa kadimiwa patena khe tsü cü metsiben.”

¹⁰David na khi, “Apvüwa na hang keben ti hi chütiben. Apvüwa na Saul pathiaben; tsüna ma ketanla keshü tsathang na kegho wi nyelela ma aghi wi wa nu shüaben.

¹¹ Hi Apvüwa na kessi pi kadimiwa sa thsü kesawa tsü patena kesa tsüna Apvüwa na khenben! Ishinyi wa ma pie nu ma tssü lakhü tsü khuya nu bvüa na.”

¹²Tsalina David na Saul li kete wi apie nu atssü lakhü tsü khuya, nu Abishai manyi na bvüa. Anyi thola tsü nmu nyelela khati sa khe nchü nyelela nshagha — mathu tsüdila jenchi ntsa wa, kepaghenanye Apvüwa na kejen kedhu kesun pi mathu tsüdi miwi chia.

¹³Tsaseng wi David na yyiketijü pvüdhi sen nu khhakawa apvü-nkesa pen yyishiphon shoni kesü wi kiya,

¹⁴nu Saul süpahithu nu Abner wi jishachi, “Abner! No ihhai zaben ma?” Abner na keü, “Thowa na katsüti jisha pi kadimiwa pamchü ben nu?”

¹⁵David na luneng, “Abner, no Israel wi anyi kekhang ntsawa nye kwe? Isalethu, no npvüwa kadimiwa khwe meya kwe? Khili anyi pahan na npvüwa pathiale kemnanpen wi dughole!

¹⁶Abner, no kesau sa meya ladha! Hi hang kebenwa Apvüwa nyan wina kishenben, nthu tsüdi pi shü thsü qodha, kepaghenanye nthu na Apvüwa na pi kadimiwa sa thsü ketheng nthu pvüwa tsü khwe meya ladha. Ghangchilo! Kadimiwa pie na khiewi ben nu? Ma tssü lakhü ma li kete wi kebenwa tsüna khiewi ben nu?”

¹⁷Saul na David hhai chüya nu keü, “David, itsawa, tsüna no kwe?” David na luneng, “Anle, kadimiwa, hi le.”

¹⁸Nu ma khi, “Kediwa, no mangkesa na khilila nmaghawa hi jügüten nu? Hi mangwa satheng nu? Hi kesazzi mangwa ben nu?

¹⁹Njenkeben Kadimiwa, hi khili mangwa khile ben khe kinachilo. Keujüla Apvüwa na no sapi hi shun thsü ben lethu, kekinyi kesü sapi ma kecü tsüna ma kemeshen kemili cüben; isala tsüna anyithu na sa lethu, Apvüwa kishen-keshi na mathu miwi benben. Kepaghenanye mathu Apvüwa yyi wina hi jügüshi pi hi asang cenpvüthu ketan kinyiya kemehai diyyi kesü wi chi kesalina.

²⁰Apvüwa ketenpen wi nyela asang yyi wi hi npathi thsü lalo. Mangsale Israel kadimiwa na gho hi ayie kesü ti kesa ha pathile ben nu? Mangsale ma hi pi awa kesü ti sala jügüten nu?”

²¹Saul na luneng, “Hi sazzidha. Itsawa David, kheneng gholo! Hi khiela no npatena nengdha, kepaghenanye no shita hi kahangli heisha cüdha. Hi kejüphon kesü sadha! Hi qhethiketen kekuli kesü sadha!”

²²David na khineng, “Njenkeben Kadimiwa, npie hewi benle. N-nyithu kesü ya hewi gho nu tsü khuya thsülo.

²³Apvüwa na akutimen sapi anyi jühtsentsa sa nu ketsatanthu cüden. Nansü ma na no pi ikwen wi chicüle, isala hi Apvüwa na pi kadimiwa sa thsü kesawa no npathi lale.

²⁴Hi nansü no kahangli heisha kecü tsüti Apvüwa ya imiwi tsü makesü sa nu agükeccü tsüdi wi hi khushi keyawa salo!”

²⁵Saul na David wi khi, “Itsa, Anyiza na sawegü pi no kecüwa sa! No kekuli tsüdi wi haicen yaben.!” Tsalina David na ma len wi wa, nu Saul na ajjen wi wha neng.