Read Northern Rengma Naga 1 SAMUEL 27 Bible Online

1 SAMUEL 27 - Northern Rengma Naga bible

1 SAMUEL 27

¹David na ma ketanla ma wi khi, “Ghanan kesü wi Saul na hi pathiaben. Kemehai ntsawa lethu, hi Filistia wi bvü wa kesawa mehaiben. Isalethu Saul na Israel wi hi ghangtagha nu teshiaben, nu hi apvü-nsala benyaben.”

²Tsalina David na wan ma nyi meza tugho ssinu Gath kadimiwa Maok tsa Akhish wi wa.

³David nu ma nyithu na mathu theghithu ssi wa Gath wi hang wa. David nu ma wubvü keni Jezreel wina keghowa Ahinoam, nu Karmel wi kheni Nabal wubvü kesawa Abigail manyi ssinu ma gweghe ben.

⁴Khathansha wi Saul na David na Gath wi bvü wadhale kesa zaya khe ma David nbhala.

⁵David na Akhish wi khi, “Keujüla hi npvüshang lethu, hi ya anyuti kizza kesü wi hang wa thsülo. Kediwa, hi no gweghe ghazen nyunuti wi hang nbenla mehaile.”

⁶Tsalina Akhish na Ziklag nyutiwa pi ma cüa, nu ha jjügi ghena Ziklag na anuphanla Judah kadimithu ji sadha.

⁷David na Filistia wi asha tagha nu tugho ben wa.

⁸Tsü tsüwi David nu ma nyithu na matsü kesie ayegu ciwi hang wa kesathu Geshur, Gurzi, nu Amalek nyithu ssikaghashen. Ma mathu yyi yilashu sen wa Ejipt kewalen wi Shur kecu chia,

⁹nu npvüza nu nzathu tsüdi pathia, nu khaghaneni, amesüsi, gada, sunsiesathu, nu athsümenithu lela khuya. Tsaseng wi ma Akhish wi gho neng,

¹⁰nu Akhish na ma keü, “No hajü thowa ssisa wa nu?” David na ma Judah yyi acülawa nyelela Jerameel mizza yyi wi nyelela Ken nyithu na hang keten yyi wi tsü wale kesa Akhish kizaden.

¹¹David na anyi tsüdi nza le npvüza lela pathi, nu thola Gath wi wha neng nu ma nu ma nyithu na khati sa khe tsüpi nkhi thsüle kesalina. David na ma Filistin wi hang keben chuli hati sa.

¹²Isala Akhish na David nondi nu ma ketanla ma wi khi, “Ma Israel nyithu na ma nanmeghü ntsawa kesalina ma kahang chu hi kekuli saben.”