Read Northern Rengma Naga 1 SAMUEL 28 Bible Online

1 SAMUEL 28 - Northern Rengma Naga bible

1 SAMUEL 28

¹Matsü pahan seng wi Filistinthu na mathu süpahithu saghuya nu gho Israel ssisale sa, nu Akhish na David wi khi, “No nu n-nyithu na wala hi wiwa sa nu kesaliben kesa chüyalo.”

²David na luneng, “Anle, hi nmaghawa, no ketanla hi khati saben khe no muyaben.” Akhish na khi, “Mantsadha! Hi no pi kahang chu ghena ighikehiewa sa thsüden.”

³ Khili tsüwi Samuel na shüdha, nu Israel nyi tsüdila ma keshü ghena anongü nu ma pi ma nyunutiwa Ramah wi vhüdha. Saul na tusenkekhi nu demathu tsüdila meten pi Israel teshi thsüa.

⁴Filistin süpahithu na saghu nu Shunem nyuti kete wi kemnanpen sa; Saul na Israel nyithu saghu pi Gilboa Yikha wi kemnanpen saben.

⁵Saul na Filistin süpahithu mukeya wi ma qhethiketen

⁶ nu ma khati sa nu kesa Apvüwa wi keü. Isala Apvüwa na aman wi nyelela Urim nu Thummim sen nu kesa wi nyelela atusenjüh-kechüthu wi lela ma nluneng la.

⁷Tsaseng wi Saul na ahza pi ma kekhu wi kedithu cü, “Wala ighena keshü ghamu keccüneng nza kesü bha chilo, nu hi wa ma wi kecenkinali chiden.” Mathu na luneng, “Endor wi meshu kesü benle.”

⁸Tsalina Saul na ma tsisa kemiliya; athsümeni kepa wi mphiya, nu atsankejang seng wi ma nyi meshu keni ssiya nu nzawa tsü metule wa. Ma nzawa wi khi, “Imiwi khati mangwa saten khe ighena aghamuthu ccüneng nan nu hi kizalo. Hi anyi khi chithu ma ghamu cichilo.”

⁹Nzawa na luneng, “No kadimiwa Saul na khati sa khe chübenla metsiben, ma atusenkekhi nu keshü ghamu keccüneng nyithu kesun pi Israel teshi thsüa. Isalethu, no khati kesa hi mechu nu hi pathi thsüale saben nu?”

¹⁰Tsaseng wi Saul na kemetha kekishen kesü sa. Ma nzawa kiza, “Hang kebenwa Apvüwa nyan wina hi khishiben, no ha kesa ghena kemeten pi cü nben.”

¹¹Nzawa na keü, “Hi no ghena thowa cichi nu?” Ma luneng, “Ighena Samuel cichilo.”

¹²Nzawa na Samuel mukeya wi magha nu Saul wi khi, “No mangkesa na hi mechuten nu? No Kadimiwa Saul hana!”

¹³Kadimiwa na ma wi khi, “Nmessi lalo! No mangwa muya nu?” Nzawa na luneng, “Hi aghamu kesü ayyi wina shhugho keten mule!”

¹⁴Ma keü, “Ma tsi khati kesa nu?” Nzawa na luneng, “Anyi keqhai kesü na shhughoden. Ma agwomejuwa kaghazu pvü tenle!” Tsaseng wi Saul na tsüna Samuel le kesa chüya, nu ma nyuwakü wina ayyi wi nkhwendu.

¹⁵Samuel na Saul wi khi, “No mangkesa na hi pakivvü ten nu? No mangwa sale hi ci neng chi nu?” Saul na luneng, “Hi agüccü ntsa saben! Filistinthu na hi ssinu aghisaben, nu Anyiza na hi teshidha. Ma atusenjüh kechüthu wi nyelela aman wina lela hi nlunengchi ladha. Tsalina hi mangwa nsathu yishü khe hi kizalo kesa ghena no cichile.”

¹⁶Samuel na khi, “Mangkesa na Apvüwa na no teshi nu nghinyi sa wa lethu no hi citen nu?

¹⁷ Apvüwa na hi wina mangwale no kiza khe nmiwi tsü sachidha; ma no wi kadiyyi tsü khuya nu pi David cüdha.

¹⁸ No Apvüwa yenkhukechi tsü n-niela nu Amalek nyithu nu mathu kebenthu tsüdi yasatha nsala. Tsalina khili Apvüwa na nmiwi ha saben.

¹⁹Ma no nu Israel pi Filistinthu cüaben. Dhitsü wi no nu ntsathu na hi gweghe yaben, nu Apvüwa na Israel süpahi la pi Filistinthu cüaben.”

²⁰Saul na Samuel kekhi tsü ghena qhethiketen sa nu zuli ayyi wi qancadu kechusügü ben wa. Ma tsü ghaja nu ghanan thangthang mangla nkedsajjü ghena ma nkhang laben.

²¹Nzawa na ma wi wa nu ma qhethiketen keben muya, tsalina ma Saul wi khi, “Kediwa, hi kahang khuchi nu no hi wi mangwa keü khe tsü sadha.

²²Tsalina no nchala khili hi kekhi ha sa cülo. Hi ya kedsakejjü pi ntuwi chi thsülo. No kijünyi kewa ghena dsajjü nu züyalo.”

²³Saul na hhaghe nu mangla dsajjü ntenle khi. Isala ma kekhu wi kedithu na ma dsajjülo khvu sa. Ma asakhen wi mathu jühkina, nu ayyi wina shagha awe miwi donkiya.

²⁴Nzawa na kaghajila wa ma jjen wi amesü zza kekunon kesü keben tsü pathia. Tsaseng wi ma awhengsu pahan khuya nu pi kidenya, nu azimi pi nchila amesa pahan güya.

²⁵Ma kedsakejjü sen wa Saul nu ma kekhu wi kedithu tuwi chicüa, nu mathu na tsü dsaya. Nu mathu na shagha nu tsü ghaja bvüa.