Read Northern Rengma Naga 1 SAMUEL 3 Bible Online

1 SAMUEL 3 - Northern Rengma Naga bible

1 SAMUEL 3

¹Tsü tsüwi pvüzanyiwa Samuel na Eli kekhu wi Apvüwa kekuli saden, ciwi Apvüwa wi ketsijüh na zeng ntsawa nu ma wi kemanthi kegho na mtseng ntsa sa.

²Eli na khilitsü mehaitsü pala nmuladha, ma ghaja kesü ma jjen wi jenben;

³Samuel na Cenkethenjüh Khitson pi chi ketheng kekinyipen wi jenben. Thangtheghi npi tuwi ahula na qhe keben wi,

⁴Apvüwa na Samuel cichi. Ma luneng, “Kediwa, hi hewi benle!”

⁵isanu bvü wa Eli wi khi, “No hi cikechi ti hi hewi benle!” Isala Eli na khineng, “Hi no ncile, kheneng wa awe wi jen walo.” Tsalina Samuel na wala awe wi jen neng wa.

⁶Apvüwa na kheneng Samuel cichi. Pvüzanyiwa na tsüna Apvüwa le kesa nchü, kepaghenanye Apvüwa na hatu wi khiela ma npi ccüneng. Tsalina ma shagha Eli wi wa nu khi, “No hi cikechi ti hi hewi benle!” Isala Eli na khineng, “Itsawa, hi no ncile kheneng wa awe wi jen walo.”

⁸Tsaseng wi la Apvüwa na kecheng tughuwa Samuel cichi; ma shagha Eli wi wa nu khi, “No hi cikechi ti hi hewi benle!” Tsaseng wi ccüna Eli na tsüna Apvüwa na pvüzanyiwa cibenle kesa chüya,

⁹tsalina ma Samuel wi khi, “Wala jen neng walo; nu keujüla ma no ci neng chi lethu, hati khilo, ‘Apvüwa, khilo, nmaghawa na kina benle.’” Tsalina Samuel na kheneng wala jen wa.

¹⁰Apvüwa na gho ciwi nganya nu kishi ma cikechi ti sala, “Samuel! Samuel!” isa. Samuel na khineng, “Apvüwa, khilo, nmaghawa na kina benle.”

¹¹Apvüwa na ma wi khi, “Hi Israel nyithu miwi pala qhethiketen kesa pahan kulichi tendha, nu tsü cüki za keyathu tsüdila akhuna ndhiben.

¹²Tsü tsathang wi hi Eli theghi keshun jüh khi ketheng tsüdi aghatsan na wa asakhen kecu saden.

¹³Hi anuphan ghena kemeten pi ma theghi cüten kesa ma kizadha, kepaghenanye ma tsathu na nkemehai kethenjüh khipi hi shun. Mathu na ha sa keben Eli na chüben, isala ma mathu nkhen.

¹⁴Tsalina hi Eli theghi wi kishendha; ma theghi kesami qhethiketen kesawa ha ahhansha kesa nu kekinyi ghena tsü sapi nmilaya thsü nbenle.”

¹⁵Samuel na ghanenwa kecu awe wi ben; tsaseng wi ma shaghala Apvüwa jjen jenka shah shhu. Ma kemanthi cüki tsü khipi Eli kiza messiben.

¹⁶Isala Eli na ma cichi, “Itsawa, Samuel!” Samuel na luneng, “Kediwa, hi hewi benle!”

¹⁷Eli na keü, “Apvüwa na mangwa le no kiza nu? Mangla pi hi nkuthi lalo. Keujüla no Anyiza na kekhi tsüdi pi hi nkizala lethu, ma kemeten kedhu pi no cübenle.”

¹⁸Tsalina Samuel na tsüdi khipi ma kiza; ma mangla pi nkuthi. “Eli na khi, Ma Apvüwa; ma ma tuwi kemeshonwa tsü saden.”

¹⁹Samuel na qhai keshagha ti Apvüwa na ma ssiden, nu Samuel na kekhi tsüdila sacenya thsüa.

²⁰Tsalina diyyiwa katen kesü na wa kesü kecu Israel nyi tsüdila Samuel na ntsakhiwa Apvüwa tusenjüh-kechü nyi kesü le kesa chü.

²¹Apvüwa na Shilo wi Samuel tuwi gho nu ma ccüneng kesa pen witsü ma ketanla ma sapi nyu ccücaca sa. Nu khathansha wi Samuel na ajühkhi khe Israel nyi na tsüdi tsü kina.