Read Northern Rengma Naga 1 SAMUEL 30 Bible Online

1 SAMUEL 30 - Northern Rengma Naga bible

1 SAMUEL 30

¹Ghanan keni seng wi David nu ma nyithu na gho Ziklag cu nengya. Amalek nyithu na Judah cülawa yilashuya nu Ziklag ssikaghashen. Mathu na anyuti tsü mecang

²nu nzathu tsüdi ghanya; mathu na anyithu kesüla npathi, isala mathu na kebvü wi tsüthu tsüdi ssinu bvüa.

³David nu ma nyithu na gho cukeya wi anyutiwa tsü mecang nu mathu wubvüthu, tsangathu ssibvü kebenla muya.

⁴David nu ma nyithu na qai wa, nu mathu na nchatha npi kesa chu qai,

⁵ David wubvü keni Ahinoam nu Abigail manyi lela ssibvüa.

⁶David na khili leben güccü bendha, kepaghenanye ma nyithu na mathu tsangathu nmila kesalina mathu na alon pi ma kecenthiale pateqhe bendha; isala Apvüwa ma Nyiza na kempvüza pi ma cüa.

⁷ David na Ahimelek tsa Abiathar keqhaikediwa wi khi, “Adepfü kewhengthsü tsü sen nu hi wi gholo,” nu Abiathar na tsü sengho ma cüa.

⁸David na Apvüwa wi keü, “Hi ayelakeshuthu katsü jügü wala khati sa nu? Nu hi mathu ghanyala?” Apvüwa na luneng, “Mathu jügü walo; no mathu ghanya nu atssüzüthu tsü kekasha yaben na.”

⁹Tsalina David nu ma nyi meza tugho na lentsen shhu, nu mathu na wa Besor Kuza cukeya wi mathu pahan na ciwi ben wa.

¹⁰David na anyi meza mejü ssinu tsü miwi wa; anyi kepa wi meza keni tsüna akuza tsü npvüdhi chala kesalina ciwi ben wa.

¹¹Anyi David gweghe ketenthu na Ejipt pvüzanyi kesü na ayela wi keten muya nu ma ssisen David wi gho. Mathu na kedsakejjü nu atssü,

¹²khhaghabvü keqen pahan, nu kemeshentsse keqen aten keni pi ma cüa. Ma tsüthu dsakeya seng wi züya; ma ghanan kechengtha tsü mangla kedsakejjü nmila.

¹³David na ma keü, “Npvüwa na thowa nu? Nu no khiewa na gho nu?” Ma khineng, “Hi Ejipt nyi kesü Amalek nyi kesü maghawa le. Hi sanaa wa kesalina ipvüwa na hi teshi kesa ghanan kecheng sadha.

¹⁴Ikhang na Judah cülawa Khereth nyithu yyi nu Kaleb gei yyi tsü yilashu nu Ziklag mecang chile.”

¹⁵David na ma keü, “No hi ssi wa ayelakeshuthu wi tsü chicü ma?” Ma luneng, “Keujüla no Anyiza nyan wina hi npathi nyelela hi pi ipvüwa kwen wi chi neng nbenle kesa hi wi khishi lethu, hi no ssi wa ciwi chicüben.”

¹⁶Nu ma David ssi wa mathu wi chicüa. Yilakeshuthu na apen tsüdi wi bvüzighe nu dsajjü nu kemini saben, kepaghenanye mathu na Filistia nu Judah wi nyu ji sha ntsawa shuya kesalina.

¹⁷Dhitsüwa wi David na mitu na wa mathu ssikaghashen nu minulen kecu kesali. Anyi cahli meza mejü na sunsiesathu miwi ben nu bvü kesathu tsü ketan khe mathu kepa wi kesüla bvü meya.

¹⁸David na Amalek nyithu na khuya kesa atsanqaithu nu anyithu tsüdila pi ma wubvü keni tsü wwala kekashaya;

¹⁹Amalek nyithu na khuya kesathu tsü David na mangla nteshila ma nyi, atsangathu, nu atsanqaithu tsüdila khunengya.

²⁰Ma ma sahangthu la tsüdi mu nengya; ma nyithu na “Ha David ji le!” khila mathu tuwi na tsüdi kuya.

²¹Tsaseng wi David na kheneng sen anyi meza keni na nkhangla kesalina ma gweghe wa meyala teshi pi Besor Kuza wi chi kethengthu witsü wa. Ciwi mathu na gho David nu ma nyithu metu, nu David na anonkeghe sa mathu shalom sa.

²²Isala David gweghe kewa anyi kecügüthu nu nkemehaithu na khi, “Mathu na ikhang gweghe nwala, tsalina ikhang na atsanqai shukeyathu pi mathu cü ntenle. Mathu ya mathu wubvüthu nu atsangathu ssiya nu bvü thsülo.”

²³Isala David na luneng, “Icünyuthu, nthu na Apvüwa pi ithu kecü hapi tsüti saya nbenle! Ma ithu yala yazishu benya thsü, nu yilakeshuthu miwi khangkeya pi ithu cüdha.

²⁴Nthu na khi keben tsü anyi kesüla anlo khiya nben. Pila tsüdila makesü gishü meyathu yishü; aseng wi atsanqaithu hiewa kesawa lela aghi wi kewawa shei makesü muyaben.”

²⁵David na ayenwa ha sachi nu Israel na nansü la tsü nieben.

²⁶Khathansha wi David na Ziklag wi kheneng gho khe, ma atsanqai shukeyathu tsü pahan pi ketsijüh ha gweghe Judah wi ccülikesa ma pvüshangthu wi kesunchia, “Hawa ha ikhang na Apvüwa ghinyithu wi atsanqai shukeya aju pi nthu kecüle.”

²⁷Ma tsüthu tsü kesun pi Bethel wi anyithu, Judah cülawa Ramah wi anyithu, nu anyuti hathu wi anyithu, Jattir,

²⁸Aroer, Sifmoth, Eshtemoa,

²⁹nu Rakal; Jerameel gei, Ken nyithu,

³⁰nu Horma, Borashan, Athak,

³¹nu Hebron nyutithu anyithu wi chicüa. Ma tsü kesun pi ma nu ma nyithu na kekigoepen tsüdi wi chicüa.