Read Northwest Gbaya KU̧U̧NAŊMƆ 1 Bible Online

KU̧U̧NAŊMƆ 1 - Northwest Gbaya bible

KU̧U̧NAŊMƆ 1

¹Ŋgimbi nɛ̀ Sɔ̧ ku̧u̧ nɛ̀ naŋ dee yiwese in nù,

²nù duka so gee, mɔ bo sɛnɛ na, tum kpee so zu ɗuka-fara. Ɔmi ko Sɔ̧ bui̧a so nɛ zu yì nɛnɛ.

³Sɔ̧ tɔ̧a̧: «Sa̧a̧mɔ a̧ de!» Ɓɛɛ sa̧a̧mɔ de.

⁴Sɔ̧ zɔka sa̧a̧mɔ duk nɛ de-a, ɓɛɛ Sɔ̧ kɛ̧ mgbara sa̧a̧mɔ in tum.

⁵Sɔ̧ saa sa̧a̧mɔ «wese», ɓɛɛ a̧ sa nin tum'e «zɛ». Hegɔ zɛ dea ɓɛɛ mɔ sa̧; duka nɛ́ kuti ɔɔ-zɛ.[1]

⁶Sɔ̧ tɔ̧a̧: «Gba̧a̧-yí-zan a̧ duk mgbara o yì mɛ kɛ̧ mgbara wa!» Ɓɛɛ mɔ de hegɔ.

⁷Sɔ̧ dee gba̧a̧-yí-zan, ɓɛɛ kɛ̧ mgbara yì mɛ ŋgɔn in yì mɛ ɗɔɔ.

⁸Sɔ̧ saa nin gba̧a̧-yí-zan «yiwese». Zɛ dea ɓɛɛ mɔ sa̧; duka nɛ́ yiitoo ɔɔ-zɛ.

⁹Sɔ̧ tɔ̧a̧: «O yì mɛ́ ɗɔɔ yiwese a̧ mɔi̧ ŋmaa duk kpɔk fara ha̧ kora fara mɛ gbo!» Ɓɛɛ mɔ de hegɔ.

¹⁰Sɔ̧ saa nin kora fara «nu», ɓɛɛ a̧ sa nin yì nɛ mɔi̧a ŋmaa'e «gba-tɔp». Sɔ̧ zɔka'e mɔ‘i ɔ dee.

¹¹Sɔ̧ tɔ̧a̧: «Nu a̧ dɛm o bɔr-mɔ, o nyɔnɔ nɛ a̧a̧ nɛ kpar-a in o te nɛ wai wai nyɛm nɛ ɗoŋ kpar-wa nɛ tɛ dɛm siti!» Ɓɛɛ mɔ de hegɔ.

¹²Ɓɛɛ nù de ha̧ o bɔr-mɔ mɛ dɛm in o nyɔnɔ nɛ a̧a̧ nɛ kpar-a, in o te nɛ wai wai nyɛm nɛ ɗoŋ kpar-wa. Ɓɛɛ Sɔ̧ zɔka duka nɛ de-a.

¹³Zɛ dea ɓɛɛ mɔ sa̧; duka nɛ́ taar ɔɔ-zɛ.

¹⁴Sɔ̧ tɔ̧a̧: «O sa̧a̧mɔ a̧ de sɛn yiwese wen kɛ̧ɛ̧ mgbara wese in zɛ, wa tɛ ya nɛ́ mɔɔ-usi-mɔ mgbara o gbaŋa, mgbara o wese in zɛ tɔra pɛ;

¹⁵wa tɛ́ ya nɛ́ sa̧a̧mɔ sɛn yiwese wen nyɛka-a zu nù.» Ɓɛɛ mɔ de hegɔ.

¹⁶Ɓɛɛ Sɔ̧ de gasa sa̧a̧mɔ yiitoo: gasa sa̧a̧mɔ wen nyɛka-a nɛ̀ wese, geɗek sa̧a̧mɔ wen nyɛka-a nɛ̀ zɛ.

¹⁷Sɔ̧ ee o sa̧a̧mɔ nɔ‘i sɛn yiwese wen nyɛka-a zu nù,

¹⁸wen ha̧ wa mɛ́ ɔ wan zu wese in zɛ, in ha̧ wa mɛ́ kɛ̧ mgbara sa̧a̧mɔ in tum; ɓɛɛ Sɔ̧ zɔka mɔɔ nɔ‘i ɔ dee.

¹⁹Zɛ dea ɓɛɛ mɔ sa̧; duka nɛ́ naar ɔɔ-zɛ.

²⁰Sɔ̧ tɔ̧a̧: «Yì a̧ dun nɛ o be mɔ lɛŋ nɛ ɔm ɔm, ɓɛɛ o nɔ̧́í̧ a̧ bu̧i nɛ yiwese see zu nù.»

²¹Sɔ̧ dee o gasa ŋga saɗi-ɗɔɔ-yì, o mɔ lɛŋ nɛ ɔm ɔm in nɛ fo mɔ foo nyɛm nɛ ɗoŋ duk-wa nɛ duna ɗɔɔ yì, in o nɔ̧́í̧ lɛŋ nyɛm nɛ ɗoŋ duk-wa. Sɔ̧ zɔka mɔ‘i ɔ dee.

²²Sɔ̧ toka de yoŋgo zu wa, a̧ tɔ̧a̧: «Ɛ̀nɛ̀ dɛ́m, ɛ̀nɛ̀ nyɛ́ɓí, ɛ̀nɛ̀ dún ɗɔɔ gba-tɔp in o nɔ̧́í̧ a̧ dɔ́k sɛn zu nù mbɛt!»

²³Zɛ dea ɓɛɛ mɔ sa̧; duka nɛ́ mɔɔrɔ ɔɔ-zɛ.

²⁴Sɔ̧ tɔ̧a̧: «Nù a̧ dɛm o mɔ nɛ ɔm ɔm nyɛm nɛ ɗoŋ duk-wa; o gasa saɗi in o be saɗi, o saɗi-zaŋbɛɛ nyɛm nɛ ɗoŋ duk-wa!» Ɓɛɛ mɔ de hegɔ.

²⁵Sɔ̧ dee o saɗi-zaŋbɛɛ nyɛm nɛ ɗoŋ duk-wa, o mɔ-dai nyɛm nɛ ɗoŋ duk-wa, in o be saɗi zu nù lɛŋ nyɛm nɛ ɗoŋ duk-wa; ɓɛɛ Sɔ̧ zɔka o mɔɔ nɔ‘i ɔ dee.

²⁶Sɔ̧ tɔ̧a̧: «Ɛ̀ɛ̀ dé bíí hee ɛ́ɛ́ ga, nɛ hɔɔ ŋmaa in yɛɛ ɓɛɛ a̧ tɛ́ kpa ŋgai zu o zoro ɗɔɔ gba-tɔp, o nɔ̧́í̧, o gasa mɔ-dai, o saɗi-zaŋbɛɛ, in o be saɗi-gbur-zaŋ nɛ nù!»

²⁷Sɔ̧ dee bíí hɔ ŋmaa in a̧ sɛn tɛ gi̧ɔ̧-tɛ-a; a̧ dee bíí, a̧ dee wiwii in okoo.

²⁸Sɔ̧ toka de yoŋgo zu wa; a̧ tɔ̧ɔ̧ ha̧ wa: «Ɛ̀nɛ̀ kó, ɛ̀nɛ̀ dɔ́k siti, ɛ̀nɛ̀ dún nu, ɓɛɛ ɛ̀nɛ̀ ɔ́ wan zu a̧; ɛ̀nɛ̀ ɔ́ wan zu o zoro ɗɔɔ gba-tɔp, o nɔ̧́í̧ in o saɗi zu nù lɛŋ.»

²⁹Sɔ̧ tɔ̧a̧: «Mi ha̧a̧ nyɔnɔ nɛ̀ kpar-a a̧a̧ sɛnɛ sɛn zu nù lɛŋ in o te nɛ a̧a̧ nɛ waya-a nɛ̀ dɛm dɛm h’ɛ́nɛ́; wa lɛŋ tɛ ya nɛ́ mɔɔ-nyɔŋ k’ɛ́nɛ́.

³⁰O saɗi in o nɔ̧́í̧ yiwese lɛŋ in o mɔ nɛ gbur zaŋ gbur nɛ nù, mɔ lɛŋ nɛ a̧a̧ nɛ ɔmi tɛ, mi ha̧a̧ o te in o zɔ̧ ha̧ wa nɛ nyɔŋmɔ.» Ɓɛɛ mɔ de hegɔ.

³¹Sɔ̧ zɔka mɔ lɛŋ n'aa dea, mɔ lɛŋ duka nɛ de-a nyɛmna. Zɛ dea ɓɛɛ mɔ sa̧; duka nɛ́ mɔɔrɔ-ɗoŋ-kpɔk ɔɔ-zɛ.