Read Northwest Gbaya KU̧U̧NAŊMƆ 11 Bible Online

KU̧U̧NAŊMƆ 11 - Northwest Gbaya bible

KU̧U̧NAŊMƆ 11

¹O bíí lɛŋ duka tɔ̧ nɛ́ nú kpɔk in saa nin mɔ kpɔk.

²Hee mɔ'ɔ nɛ̀ o bíí duka so yar yar si war daŋa-wese ga, wa kpaa ŋma de bɔkɔ-nu tɛ nú Sinɛar, ɓɛɛ wa de ye sɛnɛ.

³Wa tɔ̧ɔ̧ ha̧ o ŋmaa: «Ɛ̀ɛ̀ mbɛ́r brik ɛ̀ɛ̀ dɔ.» Brik duka hee ta ga, ɓɛɛ mɔɔ-dɔ̧i̧-mɔ dúk nɛ́ ɓɔtɛ.

⁴Hegɔ wa tɔ̧a̧: «Ɛ̀ɛ̀ mbó gasa ye in kusa tua nɛ zu-a tɛ fo nɛ́ yiwese! Ɛ̀ɛ̀ dé ha̧ nin dùk k’ɛɛ mɛ hur, wen k’ɛ́ɛ́ tɛɛ pɛsi dam zu nù lɛŋ.»

⁵GASA WAN zira tɛnɛ mɛ zɔk ye in kusa tua nɛ o bem ko Adam de'i,

⁶ɓɛɛ GASA WAN tɔ̧: «Kinii wa lɛŋ duk nɛ́ tugun kpɔk, in tɔ̧ɔ̧ nú kpɔk; mɔ‘i nɛ́ kuti tom kɔ-wa; ŋma mɔ nɛ tɛ dor wa tɛ́ mɔ nɛ wa tɛ kɔ̧ mɛ de beka bo na.

⁷Hegɔ laŋ, ɛ̀ɛ̀ zír ɛ̀ɛ̀ nɛ́ɛ̀ záŋ nú-wen kɔ-wa wen ká wa tɛ́ɛ̀ zii nú ko o ŋmaa.»

⁸GASA WAN pɛsa wa kpɔk kpɔk dam zaŋnu lɛŋ, ɓɛɛ wa kaɗi mboo gasa ye'i.

⁹Nɛ́ hegɔ a̧ wa saa nɛ̀ nin fara'i'e «Babɛl»; mɛ̀ nɛ́ sɛn hi̧i̧ a̧ GASA WAN zaŋa nɛ o nú-wen zu nù'ɛ lɛŋ, ɓɛɛ nɛ́ hi̧i̧ á̧ a̧ de nɛnɛ ha̧ o bíí mɛ́ pɛsi dam zu nù'ɛ.

¹⁰O bezaŋ Sɛm nɛ mɔ'ɔ. Ŋgimbi nɛ Sɛm kpaa pɛ gɔmŋmaa, a̧ koo Arpaksad pɛ yiitoo ɗoŋ gasa ha̧a̧-yì.

¹¹Ɗoŋ nɛ Sɛm koo Arpaksad kaɗi, a̧ duka zu nù pɛ gɔmŋmaa-mɔɔrɔ; a̧ koo o be-wiwii in o be-okoo.

¹²Arpaksad a̧a̧ so nɛ pɛ ɓu-taar-zua-mɔɔrɔ ŋgimbi n'aa koo nɛ Sela.

¹³Ɗoŋ nɛ Arpaksad koo Sela kaɗi, a̧ duka zu nù pɛ 403; a̧ koo o be-wiwii in o be-okoo.

¹⁴Sela a̧a̧ so nɛ pɛ ɓu-taar, ɓɛɛ a̧ ko nɛ Ebɛr.

¹⁵Ɗoŋ koo Ebɛr, Sela duka zu nù pɛ 403; a̧ koo o be-wiwii in o be-okoo.

¹⁶Ebɛr kpaa pɛ ɓu-taar-zua-naar, ɓɛɛ a̧ ko Pɛlɛg.

¹⁷Ɗoŋ koo Pɛlɛg, Ebɛr duka zu nù pɛ 430; a̧ koo o be-wiwii in o be-okoo.

¹⁸Pɛlɛg kpaa pɛ ɓu-taar, ɓɛɛ a̧ ko Rɛhu.

¹⁹Ɗoŋ koo Rɛhu, Pɛlɛg duka zu nù pɛ 29; a̧ koo o be-wiwii in o be-okoo.

²⁰Rɛhu kpaa pɛ ɓu-taar-zua-yiitoo, ɓɛɛ a̧ ko Serug.

²¹Ɗoŋ koo Serug, Rɛhu duka zu nù pɛ 207; a̧ koo o be-wiwii in o be-okoo.

²²Serug kpaa pɛ ɓu-taar, ɓɛɛ a̧ ko Nahɔr.

²³Ɗoŋ koo Nahɔr, Serug duka zu nù pɛ 200; a̧ koo o be-wiwii in o be-okoo.

²⁴Nahɔr kpaa pɛ ɓu-yiitoo-zua-mɔɔrɔ-ɗoŋ-naar, ɓɛɛ a̧ ko Tɛra.

²⁵Ɗoŋ koo Tɛra, Nahɔr duka zu nù pɛ 119; a̧ koo o be-wiwii in o be-okoo.

²⁶Tɛra kpaa pɛ ɓu-mɔɔrɔ-ɗoŋ-yiitoo, ɓɛɛ a̧ ko Abram, Nahɔr in Haraŋ.

²⁷O bezaŋ Tɛra nɛ́ mɔɔ nɔ'ɔ: Tɛra koo Abram, Nahɔr in Haraŋ.

²⁸Haraŋ koo Lot. Haraŋ fee nɛti ha̧ dáà kɔ̧-a̧ Tɛra tɛ nù ko o nam kɔ̧-a̧ sɛn Ur, nù ko o be Kaldee.

²⁹Hegɔ Abram in Nahɔr baa kóò: nin kóò ko Abram nɛ Sarai; ɓɛɛ nin kóò ko Nahɔr nɛ́ Milka, boko-bem ko Haraŋ, nɛ̀ duka nɛ́ dáà ko Milka in Yiska.

³⁰Sarai duka so nɛ́ ko-yar-ndɔra, a̧ duka hegɔ bem bo na.

³¹Nɛ́ mɔ'ɔ nɛ̀ Tɛra mgbɔɔ bem kɔ‘i Abram in be koo-aa Lot, bem ko Haraŋ. A̧ mgbɔɔ be for-aa Sarai kóò ko Abram mbɛt, ɓɛɛ a̧ kai wa kur sɛn ye Ur nú Kaldee wen nɛa-a si sɛn nú Kanaŋ. Wa hɔɔ sɛn Haraŋ, ɓɛɛ wa ɔ ye hi̧i̧.

³²Tɛra duka zaŋnu nɛ́ pɛ 205, ɓɛɛ a̧ fe sɛn Haraŋ.