Read Northwest Gbaya KU̧U̧NAŊMƆ 13 Bible Online

KU̧U̧NAŊMƆ 13 - Northwest Gbaya bible

KU̧U̧NAŊMƆ 13

¹Abram yaka nú Egiptɛ si sɛn nú Nɛgɛb in kóò kɔ̧-a̧ gu nɛ o mɔ kɔ̧-a̧ lɛŋ, ɓɛɛ Lot nɛ́ in a̧.

²Abram a̧a̧ so nɛ̀ o mɔ-dai, bu-mbɔi in lɔr nyɛmna.

³Abram ɔɔ nɛ̀ yuwar nɛnɛ, ku̧u̧naŋ-a nɛ Nɛgɛb hɔ Bɛtɛl, fara n'aa dee so gbagari kɔ̧-a̧ sɛnɛ mgbara Bɛtɛl in Ai.

⁴Abram kɔfa Sɔ̧ sa nɛ nin-a'e GASA WAN fara n'aa dee so fara-ɗafi-sɔ̧ sɛnɛ nɛti.

⁵Lot nɛ̀ nɛ̀ɛ́ so in Abram a̧a̧ so nɛ̀ o sami, o ndai in o tua-laa mbɛt.

⁶Nù nyɛm so wa lɛŋ na, wen wa a̧a̧ nɛ mbɔi nyɛmna, ɓɛɛ wa nyɛm mɛ ya kpɔk fara in ŋmaa na.

⁷Hegɔ ɓɛɛ kpɛri ye mgbara o wi-dai-mɔ-dai ko Abram in ko Lot. (O be Kanaŋ in o be Periz ɔɔ so tɛ nù‘i mbɛt.)

⁸Abram tɔ̧ɔ̧ ha̧ Lot: «Bó nɛ́ ɔ dee ha̧ kpɛri mɛ ye mgbara yɛ in mɛɛ na, mgbara o wi-dai-mɔ kɔ‘m in kɔ-mɛ na, wen ɛɛ nɛ nya-wi.

⁹Mɛ zɔk, bó nɛ́ nù nɛ̀ oi-aa a̧ duk ti mɛ'ɛ na nde? Ɛ̀ɛ̀ kɛ̧́ tɛ yɛ nɛ ŋmaa; kà mɛ á̧ nɛ̀ɛ́ kɔ-mɛ si gale, ɓɛɛ mi nɛɛ kɔ‘m si wiiko; kà mɛ á̧ nɛ̀ɛ́ kɔ-mɛ si wiiko ɓɛɛ mi nɛ̀ɛ́ kɔ‘m si gale.»

¹⁰Lot baa yí nɛ ŋgɔn, ɓɛɛ a̧ zɔk zika-nú Jurdɛn; duka nɛ́ de fara nɛ yì a̧a̧ sɛnɛ. Nɛti ha̧ GASA WAN mɛ ɗaŋ Sɔdɔm in Gɔmɔr, fara'i duka so hɔ Sɔar hee kpɛɛfɔ ko GASA WAN ga; de fara'i hɔɔ ŋmaa in nú Egiptɛ.

¹¹Lot hoka kɔ‘i nɛ bɔkɔ-nú Jurdɛn, ɓɛɛ a̧ kur yak si war daŋa-wese; nɛ́ hi̧i̧ a̧ wa ee nɛ ŋmaa duk.

¹²Abram dee kɔ‘i ye sɛn nú Kanaŋ, ɓɛɛ Lot ɔ kɔ‘i tɛ o ye ká̧ zika-nu'i. A̧ ɔɔ ye sɛn Sɔdɔm.

¹³O be Sɔdɔm yaa so nɛ́ o wi-ɗaŋ in o wi-de-ɗaŋmɔ ti GASA WAN.

¹⁴GASA WAN tɔ̧ɔ̧ ha̧ Abram ɗoŋ nɛ wa kɛ̧ɛ̧ tɛ nɛ ŋmaa in Lot kaɗi: «Mɛ̀ bá yí-mɛ nɛ ŋgɔn tɛ fara nɛ mɛ duk sɛnɛ‘i a̧ mɛ̀ zɔ́k mɔ si ká̧-zan-mɛ́-ŋgɔn in ká̧-zan-mɛ́-ɗɔɔ, si daŋa-wese in yee-wese.

¹⁵Nù'ɛ lɛŋ nɛ mɛ zɔk’ɛ, mi tɛ ha̧ ha̧ mɛ in o bezaŋ-mɛ hegɔ ɓɔnsɛnɛ.

¹⁶Mi tɛ de ha̧ bezaŋ-mɛ mɛ́ dɔk hee fuunu ga. Kà‘i nɛ́ nyɛma mɛ tɔr fuunu, ɓɛɛ wi nyɛma mɛ́ tɔr o bezaŋ-mɛ.

¹⁷Mɛ̀ kur! Mɛ̀ yár zɔk nɛ zi̧a̧ nù in pɛsa-a wen mi tɛ ha̧ nù‘i ha̧ mɛ.»

¹⁸Abram mɔi̧a tua-laa kɔ‘i kur si sɛn ti o gasa te sɛn Mambre ká̧ Hebrɔŋ, ɓɛɛ a̧ mbo fara-ɗafi-sɔ̧ ha̧ GASA WAN sɛn hi̧i̧.