Read Northwest Gbaya KU̧U̧NAŊMƆ 19 Bible Online

KU̧U̧NAŊMƆ 19 - Northwest Gbaya bible

KU̧U̧NAŊMƆ 19

¹O betom ko GASA WAN yiitoo hɔɔ sɛn Sɔdɔm mɛ ga̧a̧mɔ, ká Lot duk nɛ́ nù sɛn ká̧ nú garo. Ŋgimbi nɛ Lot zɔka wa, a̧ kura ŋgɔn we ti wa, nɛ́ɛ̀ gu nu sɛn ti wa.

²A̧ tɔ̧a̧: «Nyaa, mi ai nú h’ɛ́nɛ́, ɛ̀nɛ̀ ɓír nɛ tɛ ko wi-de-tom k’ɛ́nɛ́ wen ɔa-a in fɔra naŋ‘nɛ́, ɓɛɛ sa̧a̧mɔ mɛ tutuyɛ ɛ́nɛ́ yaka.» Wa kifa nú ha̧ a̧: «Weyaa, ɛɛ tɛ ɔ k’ɛɛ zan hɛ̧ɛ̧ ɓɛɛ.»

³A̧ aia nú ha̧ wa hegɔ, ɓɛɛ wa si ɗoŋ in a̧ si tɛ kɔ̧-a̧. A̧ gii nyɔŋmɔ ha̧ wa, a̧ gii brɛt nɛ hao bo sɛnɛ na ha̧ wa, ɓɛɛ wa nyɔŋ.

⁴Nɛ̀ wa tɛ ɔ nù hɔ̧ɔ̧ na, ɓɛɛ o bíí saaye Sɔdɔm, mɔ nɛ‘i sa'e obem si kpa nɛ sɔkawi, o bíí saaye lɛŋ zika tua ko Lot kpa nú ŋmaa.

⁵Wa saa Lot ɓɛɛ wa ak a̧: «O gɛnɛ nɛ hɔɔ tɛ-mɛ'ɛ, wa a̧a̧ sɛn dee? Mɛ̀ fó wa gbonɛ pii tɛ yɛ, h’ɛ́ɛ́ ɔ in wa.»

⁶Lot gboo nɛ haya-a sitɛ wa nú tua mɛ, ɓɛɛ kpe nú tua ɗoŋ.

⁷A̧ tɔ̧a̧: «Mi gɔma er ti'nɛ́, o nya'm, k’ɛ́nɛ́ de ɗaŋmɔ na!

⁸Mi a̧a̧ nɛ̀ be-zɔŋa yiitoo nɛ tɛ iŋ wiwii hɔ̧ɔ̧ na; mi tɛ kai wa tɛnɛ h’ɛ́nɛ́, ɓɛɛ ɛ́nɛ́ dee mɔ n’ɛnɛ kɔ̧ɔ̧ lɛŋ in wa, ɓɛɛ nɛ̀ ko o wi nɔ'ɔ, k’ɛ́nɛ́ de ŋma ɗaŋmɔ in wa na, wen wa a̧a̧ sɛn kɔ̧ tua kɔ‘m.»

⁹Ɓɛɛ wa kifi nú: «Mɛ̀ yák siɓi!» Wa tɔ̧ɔ̧ sitɛ ŋmaa: «Wi’ɛ nɛ́ gɛnɛ sɛn saaye k’ɛɛ, ɓɛɛ a̧ kɔ̧ɔ̧ mɛ duk nɛ́ wi-gɔn-kita? Ɔ dee nyɛmna, ɛ́ɛ́ tɛ́ de ɗaŋmɔ in a̧ gan mɔ n’ɛɛ tɛ de in wa.» Wa ira Lot nɛ ŋgai, ɓɛɛ wa nɛ siti wen gbina nú tua.

¹⁰Nɛ́ sɛn hi̧i̧ a̧ o wi nɔ‘i yiitoo'i pi̧i̧ nɛ er si zan, ɓɛɛ wa dak Lot pii ɗoŋ pii kɔ̧ tua; wa kpee nú tua,

¹¹ɓɛɛ wa bom yí o bíí nɛ yaa nu tua, ku̧u̧naŋ-a nɛ̀ tɛ o obem hegɔɔ kpa nɛ o gasawi, ɓɛɛ wa kpa ŋgai wen zɔka nú tua ɓɔna.

¹²O wi nɔ‘i yiitoo'i tɔ̧ɔ̧ ha̧ Lot: «Mɛ a̧a̧ nɛ ŋma bíí woyo sɛn hɛ̧ɛ̧ nde? O be-for-mɛ, o be-wiwii, o be-okoo kɔ-mɛ, mɔ kɔ-mɛ lɛŋ nɛ a̧a̧ saaye’ɛ, mɛ̀ káí gbonɛ.

¹³Ɛɛ tɛ ɗaŋ ye’ɛ yinɛ, wen gasa ɗaŋmɔ nɛ a̧a̧ tɛ ye’ɛ aa zer Sɔ̧. Mɛ nɛ hegɔ sa GASA WAN tom yɛ tɛnɛ wen ɗaŋa a̧ yinɛ.»

¹⁴Lot gboo ɓɛɛ tɔ̧ ha̧ o be-for: «Ɛ̀nɛ̀ kúr nɛ haya-a, ɛ̀nɛ̀ yák saaye’ɛ, wen GASA WAN tɛ ɗaŋ ye’ɛ!» Ɓɛɛ o be-for-aa ba kɔ‘i wen kɔ̧-a̧ e tɛ zɛŋ.

¹⁵Mɛ́ gɔna-ndaa-zan, o betom ko Sɔ̧ tɔ̧ɔ̧ ha̧ Lot: «Mɛ̀ kúr nɛ haya-a wen mgbɔɔ kóò kɔ-mɛ in o boko-bem kɔ-mɛ, ɛ̀nɛ̀ gbó tɛ ye’ɛ, wen ká mɛ́ tɛɛ fe wen ɗaŋmɔ ko ye’ɛ.»

¹⁶Hee mɔ'ɔ nɛ Lot ɓɔna fara zika naŋ mɔ ga, o betom ko Sɔ̧ yiitoo tika er-a, er kóò kɔ̧-a̧ in o be-okoo kɔ̧-a̧ yiitoo'i, wen GASA WAN dee ko ha̧ a̧; o betom ko Sɔ̧ mgbɔɔ wa gbonɛ wen áá wa ɗoŋ ye.

¹⁷Hee mɔ'ɔ nɛ wa mgbɔ nɛ́ wa gbonɛ ga, wa tɔ̧ɔ̧ ha̧ Lot: «Mɛ̀ yú mɔ yak wen kpasa tɛ-mɛ, ká mɛ zɔk mɔ si ɗoŋ na, in ká mɛ yor nɛ yuwar na mbɛt; mɛ̀ yú mɔ yak si mgbara kaya mɛ, wen ká mɛ tɛɛ fe.»

¹⁸Lot kifa nú ha̧ wa: «Mɔ'ɔ dé hee GASA WAN kɔ̧a̧ ga.

¹⁹Ɛ́nɛ́ zɔka wi-de-tom k’ɛ́nɛ́ nɛ de yí; wen ɛ́nɛ́ dee gasa demɔ in am n’ɛ̀nɛ̀ dee ha̧‘m mɛ́ kpasi’ɛ, ɓɛɛ mi nyɛm mɛ yu mɔ si mgbara kaya mɛ‘i nɛti ha̧ ŋgamɔ‘i mɛ tik zu'm ha̧‘m mɛ fe na.

²⁰Ɛ̀nɛ̀ zɔ́k be geɗek ye mɛ‘i nyɛi̧ batɛ na; ɛ̀nɛ̀ é ha̧‘m nɛ́ɛ̀ hu̧si hi̧i̧. Nɛ́ be geɗek fara tikiɗi ɓɛɛ, ha̧‘m duk hi̧i̧ a̧‘m kpasi.»

²¹Betom kifa nú ha̧ a̧: «Mi tɛ de mɔ‘i nɛ mɛ aka'i, mi beka ɗaŋ ye nɛ mɛ tɔ̧ nɛnɛ ha̧‘m'i na.

²²Mɛ̀ yú mɔ si hi̧i̧ nɛ haya-a, wen mi nyɛm mɛ de mɔ nɛti sɛka mɛ hɔɔ hi̧i̧ na.» Mɛ̀ nɛ́ wen hegɔ nɛ‘i sa nin ye'i Sɔar.

²³Nɛ́ mɛ́ daŋa-wese a̧ Lot hɔɔ nɛnɛ sɛn Sɔar.

²⁴GASA WAN toma baraadu nɛ̀ wee pii sɛn Gɔmɔr in Sɔdɔm. Mɔ‘i tɛɛ nɛ yiwese nɛ tɛ GASA WAN.

²⁵A̧ kuma o ye nɔ‘i gbuɗuk in o zika-nù in o bíí nù‘i lɛŋ gu nɛ o te lɛŋ.

²⁶Kóò ko Lot zɔka mɔ pii ɗoŋ, ɓɛɛ a̧ kifi ta-tɔŋ.

²⁷Mɛ tutuyɛ sut, Abraham nɛ̀ɛ́ sɛn oi fara n'aa yora so sɛnɛ ti GASA WAN.

²⁸Sɛn hi̧i̧, Abraham baa zu nɛ ŋgɔn zɔk mɔ si sɛn Sɔdɔm in Gɔmɔr in o zika-nù‘i lɛŋ, ɓɛɛ a̧ zɔk nɛ kura zi-wee ŋmák-ŋmák hee zi-wee gasa kɔ̧ lɔk ga.

²⁹Ŋgimbi nɛ Sɔ̧ ɗaŋa nɛ o gasa ye zika-nù‘i, tɛ-a mbaŋa ɗoŋ Abraham: nɛ́ hegɔ a̧ a̧ baa nɛ Lot yinɛ sɛn tɛ ŋgamɔ‘i, ŋgimbi n'aa ɗaŋa nɛ o ye nɛ Lot duka so sɛnɛ.

³⁰Lot daŋa nɛ Sɔar wen ɔa-a sɛn zu kaya, ɓɛɛ o be-okoo kɔ̧-a̧ yiitoo nɛ in a̧. A̧ dee kíì ɔa-a sɛn Sɔar, ɓɛɛ nɛ́ kɔ̧ di̧i̧ á̧ a̧ ɔɔ sɛnɛ in o be-okoo kɔ̧-a̧ yiitoo.

³¹Nɛ́ mɔ'ɔ nɛ kaya-bem tɔ̧ɔ̧ ha̧ be-ɗoŋ: «Zɔ́k kinii dáà k’ɛɛ sɔka kaɗi, ɓɛɛ ŋma wiwii nɛ tɛ duk in yɛɛ hee mɔ'ɔ nɛ wa de sɛn tɛ o nù lɛŋ ga bo na.

³²Ɛ̀ɛ̀ há̧ dɔ̧ɔ̧ ha̧ dáà k’ɛɛ, ɓɛɛ ɛ́ɛ́ ɔɔ in a̧, h’ɛ́ɛ́ mɛ kpa ŋma bezaŋ nɛ tɛ́ nɛ̀ tɛ-a.»

³³Wa ee dɔ̧ɔ̧ nú dáà kɔ-wa mɛ zɛ‘i, ɓɛɛ kaya-be-okoo tɛ́ɛ̀ ɔ in dáà kɔ‘i; a̧ iŋ ŋgimbi nɛ be-okoo'i ɔɔ nɛ nù in n'aa kura nɛnɛ na.

³⁴Nɛ́ mɔ sa̧a̧ kaɗi, ɓɛɛ kaya-a tɔ̧ ha̧ be-ɗoŋ: «Mɛ zɛ'ɛ mi ɔɔ in dáà kɔ‘m; ɛ̀ɛ̀ há̧ dɔ̧ɔ̧ ha̧ a̧ woyo sɔsɔɔ, wen ha̧ mɛ mɛ ɔ in a̧ wen h’ɛ́ɛ́ mɛ kpa ŋma bezaŋ nɛ̀ tɛ-a.»

³⁵Mɛ zɛ‘i woyo, wa ha̧a̧ dɔ̧ɔ̧ ha̧ dáà kɔ-wa, ɓɛɛ be-ɗoŋ si tua ɗoŋ dáà kɔ‘i. A̧ iŋ ŋgimbi nɛ be-okoo'i ɔɔ nɛ nù in n'aa kura nɛnɛ na.

³⁶Ɓɛɛ Lot e zaŋ tɛ o bem kɔ‘i yiitoo lɛŋ.

³⁷Kaya-bem koo nɛ̀ be-wiwii, ɓɛɛ a̧ a nin bem’ɛi nɛ Mɔab. Mɔab nɛ́ tugun o be Mɔab hɔ nɛnɛ sɔsɔɔ.

³⁸Be-ɗoŋ koo nɛ be-wiwii mbɛt, ɓɛɛ a̧ a nin-a nɛ Bɛn-Ami. A̧ nɛ tugun o be Amɔŋ hɔ nɛnɛ sɔsɔɔ.