Read Northwest Gbaya KU̧U̧NAŊMƆ 2 Bible Online

KU̧U̧NAŊMƆ 2 - Northwest Gbaya bible

KU̧U̧NAŊMƆ 2

¹Hegɔ dee yiwese in nù in o mɔ nɛ a̧a̧ sɛnɛ lɛŋ kaɗa.

²Sɔ̧ kaɗa tom sɛn tɛ mɔɔrɔ-ɗoŋ-yiitoo ɔɔ-zɛ; nɛ́ tɛ́ mɔɔrɔ-ɗoŋ-yiitoo ɔɔ-zɛ‘i a̧ Sɔ̧ ɔma nɛ̀ tɛ̀.

³Ɓɛɛ Sɔ̧ tok de yoŋgo zu mɔɔrɔ-ɗoŋ-yiitoo ɔɔ-zɛ‘i, ɓɛɛ a̧ e wese'i nɛtɛ; wen nɛ́ wese'i á̧ a̧ kaɗa nɛ tom lɛŋ n'aa dea.

⁴Ku̧u̧naŋ yiwese in nù, ŋgimbi nɛ Sɔ̧ dee nɛ wa nɛ́ mɔ‘i. Ŋgimbi nɛ GASA WAN dee nɛ nù in yiwese,

⁵ŋma be te kpɔk tɛ bo so sɛn zaŋnu na, kóó ŋma be bɔr-mɔ tɛ hɔ sɛn kpɛɛfɔ hɔ̧ɔ̧ na mbɛt, wen GASA WAN Sɔ̧ tɛ de ha̧ kórò mɛ hɔ zu nù hɔ̧ɔ̧ na, in bíí tɛ bo so wen waa fɔ hɔ̧ɔ̧ na mbɛt.

⁶Ŋgimbi'i dɔka yì gbo o nɛ ɗɔɔ nù pii zan, ɓɔ nɛ nù lɛŋ.

⁷GASA WAN Sɔ̧ ɓoo nɛ fuunu de nɛ bíí. A̧ ɔma si kɔ̧ zɔ̧ɔ̧-a̧a̧ ha̧ nɛ̀ ɔmi duka-kpasa ha̧ a̧, ɓɛɛ bíí ku̧ naŋ duka kpasa.

⁸Nɛ́ mɔ'ɔ nɛ GASA WAN Sɔ̧ dee fɔ sɛn Edɛn, nɛ war daŋa-wese; ɓɛɛ a̧ e bíí n'aa dea sɛnɛ.

⁹GASA WAN Sɔ̧ dee ha̧ o te nɛtɛ nɛtɛ lɛŋ nɛ ɔ dee wen zɔka-a in wen nyɔŋa-a mbɛt mɛ dɛm sɛn kpɛɛfɔ‘i; te duka-kpasa a̧a̧ sɛn see fɔ, in te iŋa mgbara demɔ in ɗaŋmɔ a̧a̧ sɛnɛ mbɛt.

¹⁰Ŋma nana-yì gboa nɛ Edɛn wen ha̧ nù mɛ́ mɔk, ɓɛɛ gba er naar.

¹¹Nin kuti yì nɛ́ Pisɔŋ; mɛ̀ nɛ́ a̧ á̧ zika nú Hawila nɛ a̧a̧ nɛ lɔr nyɛmna.

¹²Lɔr tɛ nù‘i ɔ dee nyɛmna, in sɔ̧ɔ̧-te nɛ‘i sa'e delium in o de tu̧ ta mbɛt.

¹³Nin yiitoo-aa nɛ́ Gihɔŋ; a̧ fok zik nɛ nù Kus lɛŋ.

¹⁴Nin taar yì nɛ́ Tigrɛ; a̧ fok ti Asur nɛ war daŋa-wese. Nin naar nana-yì nɛ́ Efrat.

¹⁵GASA WAN Sɔ̧ ee bíí sɛn kpɛɛfɔ Edɛn wen waa a̧ in pɛma a̧ mbɛt,

¹⁶ɓɛɛ GASA WAN Sɔ̧ mbo nú wi’ɛi hee mɔ'ɔ ga: «O waya-te kpɛɛfɔ lɛŋ, mɛ́ nyɛma nyɔŋa-a,

¹⁷ɓɛɛ mɛ́ beka nyɔŋ waya-te iŋa mgbara demɔ in ɗaŋmɔ na; wen wese nɛ mɛ tɛ́ nyɔŋ, mɛ́ tɛ́ fe.»

¹⁸Ɓɛɛ GASA WAN Sɔ̧ tɔ̧: «Bó nɛ́ ɔ dee ha̧ wiwii mɛ duk ɛ̀nɛ̀-a na. Mi tɛ́ de ŋma bíí nɛ tɛ gbam in a̧ in nɛ tɛ gbak a̧.»

¹⁹GASA WAN Sɔ̧ ɓoo nù de nɛ saɗi in o nɔ̧́í̧ lɛŋ, ɓɛɛ kai tɛnɛ ha̧ wi’ɛi wen ha̧ a̧ mɛ zɔk hee mɔ'ɔ n'aa tɛ a nɛ nin-wa ga. Mɔ lɛŋ nɛ duk kpasa baa so kànà nɛ nin nɛ bíí aa ha̧ a̧.

²⁰A̧ aa nin ha̧ o gasa saɗi, o nɔ̧́í̧ lɛŋ in o saɗi-zaŋbɛɛ lɛŋ; ɓɛɛ war kɔ̧-a̧ nɛ tɛ-a, a̧ kpa ŋma bíí nɛ tɛ gbam in a̧ mɛ gbak a̧ na.

²¹Ɓɛɛ GASA WAN Sɔ̧ de ha̧ gasa ya mɛ ba wi’ɛi, ɓɛɛ a̧ ɔ ya. Sɔ̧ baa gba̧a̧ ŋgazi-a kpɔk, ɓɛɛ kpe oi-aa nɛ mur-tɛ-a.

²²GASA WAN Sɔ̧ baa gba̧a̧ ŋgazi wiwii,[2] de nɛ okoo, ɓɛɛ mgbɔ tɛnɛ ha̧ a̧.

²³Wiwii tɔ̧a̧: «Zɔ́k kinii gba̧a̧'ɛ nɛ́ gba̧a̧-tɛ‘m in mur’ɛ nɛ́ mur-tɛ‘m; wi’ɛ wi tɛ́ sa a̧‘e okoo, wen mɛ̀ nɛ́ sɛn tɛ wiwii a̧ wa dee nɛ a̧.»

²⁴Mɛ̀ nɛ́ wen hegɔ wiwii tɛ e dáà in nàà kɔ‘i duk, ha̧ a̧ mɛ́ ndaɗi in kóò kɔ̧-a̧ wen ha̧ wa mɛ́ duk nɛ́ kiitɛ kpɔk.

²⁵Wa yiitoo lɛŋ yaa so nɛ̀ mgbii, wíì in kóò de foe yí ŋmaa na.