Read Northwest Gbaya KU̧U̧NAŊMƆ 20 Bible Online

KU̧U̧NAŊMƆ 20 - Northwest Gbaya bible

KU̧U̧NAŊMƆ 20

¹Sɛn hi̧i̧ Abraham kura yak si sɛn nú Nɛgɛb; a̧ ɔɔ mgbara Kadɛs in Sur, ɓɛɛ a̧ pii ɗoŋ tɛ́ɛ̀ ɔ Gerar.

²Abraham tɔ̧a̧ ndé, kóò kɔ‘i Sara nɛ́ boko-nya-wi, ɓɛɛ Abimɛlɛk wannu Gerar tom ba Sara yaknɛ.

³Hegɔ mɛ zɛ, Sɔ̧ hɔɔ zu ha̧ Abimɛlɛk, ɓɛɛ tɔ̧ ha̧ a̧‘e ndé: «Mɛ́ tɛ́ fe wen zu kóò'ɛ nɛ mɛ baa’ɛ, wen a̧ a̧a̧ nɛ wíì kɔ̧-a̧.»

⁴Hee Abimɛlɛk tɛ duk in Sara hɔ̧ɔ̧ na ga, a̧ kifa nú: «Gasa Wan kɔ‘m, kóó dukbíí dee mɔ nɛ yuwar-a, ɛ́nɛ́ tɛ gbɛ kànà wa mbɛt nde?

⁵Nɛ́ a̧ á̧ tɔ̧ɔ̧ ha̧‘m nde, kóò'ɛ nɛ́ boko-nya-wi. Sara nɛ tɛ mbɛt tɔ̧a̧‘e wi’ɛ nɛ bu̧i̧-nya-wi. Mi dee mɔ‘i nɛ sa̧a̧-see, in nɛ yuwar-a mbɛt.»

⁶Sɔ̧ kifa nú ha̧ a̧ tɛ hɔɔ-zu: «Mi mbɛt, mi iŋa, mɛ dee mɔ‘i nɛ sa̧a̧-see, mɛ̀ nɛ́ mi'i dora mɛ wen ká mɛ tɛɛ de ɗaŋmɔ in am. Mɛ̀ nɛ́ wen hegɔ mbɛt, mi e war ha̧ mɛ mɛ duk in a̧ na.

⁷Kinii, mɛ̀ há̧ kóò ko wi’ɛ ha̧ a̧, wen a̧ nɛ wi-tɔ̧-wen oi nú‘m nɛ tɛ ye ɗoŋ-mɛ ha̧ mɛ mɛ duk kpasa. Kà mɛ nɛ́ ha̧a̧ a̧ siɗoŋ na, mɛ̀ íŋ nɛ mbetɛ nde, mɛ tɛ fe in o bíí kɔ-mɛ lɛŋ.»

⁸Abimɛlɛk kura mɛ tutuyɛ sut, ɓɛɛ a̧ sa o wi-de-tom kɔ̧-a̧ lɛŋ, a̧ wee ɗoŋ mɔ‘i ha̧ wa, ɓɛɛ gasa kíì ba wa.

⁹Abimɛlɛk saa Abraham ɓɛɛ tɔ̧ ha̧ a̧: «Nɛ́ ge a̧ mɛ dee in yɛɛ'ɛ ge? Nɛ́ ge ɗaŋmɔ ge a̧‘m dee in mɛɛ, sa mɛ kɔ̧ɔ̧ mɛ pi̧ gasa ɗaŋmɔ zu'm in zu nù kɔ‘m’ɛ ge? Mɛ dee ɗaŋmɔ nɛ‘i nyɛm mɛ de na in am.»

¹⁰Ɓɛɛ Abimɛlɛk tɔ̧ ha̧ a̧ woyo: «Nɛ́ ge a̧ mɛ taa de nɛ pɛrti mɔ hegɔ ge?»

¹¹Abraham kifa nú: «Mi taa so kɔ‘m ndé, yuu-kíí Sɔ̧ tikiɗi bo sɛn fara’ɛ na, wa tɛ gbɛ‘m, wen zu kóò kɔ‘m.

¹²Nɛ́ kpasawen, a̧ nɛ boko-nya'm; ɛɛ nɛ́ dáà kpɔk, nàá nɛtɛ, nɛ mɔ'ɔ n'am baa nɛ a̧ nɛ kóò.

¹³Hegɔ, ŋgimbi nɛ Sɔ̧ dee ha̧‘m mɛ yambali ɗoŋ-am nyɛi̧ nɛ o nam kɔ‘m, mi tɔ̧ɔ̧ ha̧ kóò kɔ‘m'e fara lɛŋ n’ɛɛ tɛ nɛ sɛnɛ, a̧ a̧ gbak am tɔ̧ nɛnɛ‘e, wi nɛ boko-nya'm.»

¹⁴Abimɛlɛk kaia o sami in o ndai, o wiwii-de-tom, in o okoo-a mbɛt, ɓɛɛ a̧ ha̧ ha̧ Abraham, ɓɛɛ a̧ ha̧ Sara siɗoŋ mbɛt ha̧ Abraham.

¹⁵Abimɛlɛk tɔ̧a̧ mbɛt: «Mɛ̀ zɔ́k nù kɔ‘m sɛn ti mɛ, mɛ̀ hók fara nɛ mɛ kɔ̧a̧, a̧ mɛ duk sɛnɛ.»

¹⁶Ɓɛɛ a̧ tɔ̧ ha̧ Sara: «Mi ha̧a̧ kɔya bu-mbɔi booro ha̧ bu̧i̧-nya-mɛ, nɛ tɛ duk nɛ mɔɔ-usi-mɔ yí o wi nɛ ya in mɛɛ lɛŋ ha̧ wa mɛ iŋ‘e, mɛ de ŋma ɗaŋmɔ na.»

¹⁷Abraham aia nú ha̧ Sɔ̧, ɓɛɛ Sɔ̧ kpasi Abimɛlɛk in kóò kɔ̧-a̧, ká bá nɛ̀ o kó-de-tom kɔ̧-a̧, ɓɛɛ wa ko bem.

¹⁸Wen GASA WAN dee so ha̧ o okoo nutua ko Abimɛlɛk lɛŋ mɛ yar ndɔra wen zu Sara kóò ko Abraham.