Read Northwest Gbaya KU̧U̧NAŊMƆ 21 Bible Online

KU̧U̧NAŊMƆ 21 - Northwest Gbaya bible

KU̧U̧NAŊMƆ 21

¹GASA WAN dee demɔ in Sara hee mɔ'ɔ n'aa ha̧a̧ so nú-a wen dea-a ga.

²Sara sɔka so kaɗi, ɓɛɛ a̧ ba zaŋ ko nɛ̀ be-wiwii ha̧ Abraham, nyɛm nɛ ɗoŋ ŋgimbi nɛ Sɔ̧ baa gɔn.

³Abraham aa nin Izak ha̧ be-wiwii nɛ Sara koo ha̧ a̧‘i.

⁴Izak kpaa zɛ mɔɔrɔ-ɗoŋ-taar, ɓɛɛ Abraham gɔn bɔr-aa nyɛm nɛ ɗoŋ ha̧a̧nú ko Sɔ̧.

⁵Abraham koo Izak ká a̧ a̧a̧ nɛ pɛ gɔmŋmaa.

⁶Ɓɛɛ Sara tɔ̧: «Sɔ̧ dee ha̧ nú‘m mɛ gɔn mami. O bíí lɛŋ nɛ tɛ zii mɔ'ɔ tɛ mam mami nɛ desee in am.»

⁷Ɓɛɛ a̧ tɔ̧ mbɛt'e: «Mɛ̀ nɛ́ o'o tɛ̀ɛ́ tɔ̧ so ha̧ Abraham nde, Sara tɛ̀ɛ́ pi̧ so bere nú o bem o? Wen nɛ́ sɛn tɛ sɔki kɔ̧-a̧, a̧‘m koo nɛ bem ha̧ a̧.»

⁸Bem gasa, in a̧ bɛ̧ɛ̧ bere; hegɔ Abraham dee gasa gbaŋa wese nɛ wa baa nɛ bere sɛn nu Izak yinɛ.

⁹Sara zɔka be-wiwii nɛ Agar zɔŋa Egiptɛ koo ha̧ Abraham nɛ duk de nɛ saa in bem kɔ̧-a̧ Izak,

¹⁰ɓɛɛ a̧ tɔ̧ ha̧ Abraham: «Mɛ̀ ndák kó-de-tom’ɛ yinɛ in bem kɔ̧-a̧, wen bem ko kó-de-tom er yɛ beka kɛ̧ mɔɔ-oi in bem kɔ‘m Izak na.»

¹¹Wen'i ha̧a̧ ɗaŋsee ha̧ Abraham, wen nɛ́ bem kɔ̧-a̧.

¹²Ɓɛɛ Sɔ̧ tɔ̧ ha̧ a̧: «Ká mɛ́ kpa ɗaŋsee zu wen nɛ Sara tɔ̧ɔ̧ ha̧ mɛ wen bem nɛ mɛ koo in kó-de-tom kɔ-mɛ na. Mɔ nɛ Sara ak er-mɛ lɛŋ, mɛ̀ kɔ̧́ ɗɔaa, wen mɛ̀ nɛ́ nɛ̀ ɗoŋ Izak a̧ pɛ́r-nam kɔ-mɛ tɛ ba nin-mɛ ɓɔnsɛnɛ.

¹³Mɔ kpɔk, mi tɛ de ha̧ dukbíí mɛ gbo nɛ̀ tɛ bem ko kó-de-tom mbɛt, wen a̧ nɛ bem kɔ-mɛ mbɛt.»

¹⁴Abraham kura mɛ tutuyɛ sut, a̧ baa brɛt in yì há̧ há̧ Agar. Abraham baa bem’ɛi e gun ger nàà kɔ̧-a̧, ɓɛɛ a̧ fo wa yaknɛ. Agar yaka yambali nɛ ŋga-gbárà Bɛrseba nɛnɛ.

¹⁵Ŋgimbi nɛ yì kɔ̧ dak kaɗa kaɗi, a̧ baa bem e ti ŋma be te.

¹⁶A̧ nɛɛ duk kɔ̧-a̧ nɛ be nyɛi̧a-a hee naŋ gɔmŋmaa ga, ɓɛɛ a̧ tɔ̧: «Mi beka duk oi fio ko bem kɔ‘m na.» A̧ duka nù nɛ nyɛi̧a-a ɓɛɛ a̧ hi̧i̧ kɔ̧a̧ nɛ ŋgaya-a.

¹⁷Sɔ̧ zia hiɗimɔ ko bem, ɓɛɛ betom ko Sɔ̧ sa Agar; a̧ tɔ̧ɔ̧ ha̧ a̧: «Agar, nɛ́ ge a̧ de mɛ ge? Ká mɛ́ de kíì na, wen Sɔ̧ zia hiɗimɔ ko bem sɛn fara n'aa duk'i.

¹⁸Mɛ̀ kúr, mɛ̀ bá bem nɛ ŋgɔn in mɛ̀ kás'a nɛ er, wen mi tɛ de ha̧ gasa dukbíí mɛ gbo nɛ̀ tɛ-a.»

¹⁹Sɔ̧ hu̧i̧a̧ yí Agar wen zɔka mɔ nɛ̀ de-a, ɓɛɛ a̧ zɔk gɔna-yì sɛn ti a̧. A̧ ɗuu yì‘i dun dak, ɓɛɛ a̧ ha̧ ha̧ bem mɛ nɔ.

²⁰Sɔ̧ duka in bem’ɛi, a̧ gasa, ɓɛɛ a̧ de ye sɛn ŋga-gbárà. A̧ duka nɛ gasa wi-pi̧-góò nyɛmna.

²¹A̧ dee ye sɛn ŋga-gbárà Paraŋ, ɓɛɛ nàà kɔ̧-a̧ ba nɛ zɔŋa Egiptɛ nɛ̀ kóò ha̧ a̧.

²²Tɛ ŋgimbi'i, Abimɛlɛk in Pikɔl, gasawi ko o wi-biro kɔ̧-a̧ tɔ̧ɔ̧ ha̧ Abraham: «Sɔ̧ a̧a̧ in mɛɛ sɛn tɛ mɔ lɛŋ nɛ mɛ de.

²³Mɛ̀ kán mɔ sɛn ti'm kinii nɛ nin Sɔ̧, mɛ beka e ɗɔra tɛ‘m, o bem kɔ‘m in o bezaŋ-am na, ɓɛɛ mɛ tɛ zɔk am nɛ de-a hɔ nɛnɛ tɛ ye nɛ mɛ tɛ duk sɛnɛ, hee mɔ'ɔ n'am zɔka nɛ̀ mɛ nɛ̀ de-a ga.»

²⁴Abraham kifa nú: «Nɛ́ kpasawen, mi tɛ de hegɔ.»

²⁵Ɓɛɛ Abraham wuli o ŋma wi-de-tom ko Abimɛlɛk wen zu gɔna-yí-nɔɔ nɛ o wi-de-tom ko Abimɛlɛk dora e nɛ kɔ‘i.

²⁶Abimɛlɛk kifa nú: «Mi iŋ wi nɛ dee mɔ‘i na. Mɛ́ tɔ̧ ha̧‘m nɛti na, zia-a kɔ‘m nɛ mɔ‘i sɔsɔɔ‘i ɓɛɛ.»

²⁷Abraham kaia o geɗek mɔ-dai in o ndai ha̧ Abimɛlɛk, ɓɛɛ wa yiitoo nɔ tɔk in ŋmaa.

²⁸Abraham kaia o zɔŋa sami mɔɔrɔ-ɗoŋ-yiitoo sɛn mgbara o dɔka-a e nɛtɛ.

²⁹Ɓɛɛ Abimɛlɛk ak Abraham: «O zɔŋa sami nɔ'ɔ mɔɔrɔ-ɗoŋ-yiitoo nɛ mɛ hoka a hɛ̧ɛ̧ nɛtɛ'ɛ nɛ́ wen ge?»

³⁰A̧ kifa nú: «Nɛ́ wen ha̧ mɛ mɛ kpa o zɔŋa sami mɔɔrɔ-ɗoŋ-yiitoo nɛ̀ mɔɔ-er-am. Mɔ'ɔ tɛ duk nɛ mɔɔ-sedaako, nɛ usi'e nɛ́ mi a̧ gɔna yì'ɛ.»

³¹Mɛ̀ nɛ́ wen hegɔ sa wa saa nin fara'i «Bɛrseba» wen wa yiitoo kànà so mɔ sɛn hi̧i̧.

³²Ɗoŋ nɛ wa nɔɔ tɔk sɛn Bɛrseba kaɗi, Abimɛlɛk kura in Pikɔl gasawi ko o wi-biro kɔ̧-a̧, ɓɛɛ wa si ɗɔŋ sitɛ nù ko o be Filistii.

³³Hegɔ Abraham guna ŋma be te[3] sɛn Bɛrseba, ɓɛɛ a̧ wor GASA WAN Sɔ̧ nɛ duk kpoo nɛ kpoo.

³⁴Abraham duka ɗoŋ-aa nyɛi̧ tɛ nù ko o be Filistii.