Read Northwest Gbaya KU̧U̧NAŊMƆ 23 Bible Online

KU̧U̧NAŊMƆ 23 - Northwest Gbaya bible

KU̧U̧NAŊMƆ 23

¹Ŋgimbi nɛ Sara dee sɛn zu nù nɛ́ pɛ gɔŋmaa-nɛ-ɓu-yiitoo-zua-mɔɔrɔ-ɗoŋ-yiitoo.

²A̧ fea sɛn Kiriat-Arba, fara nɛ‘i sa'e Hebrɔŋ sɛn nú Kanaŋ. Abraham nɛɛ de gera hi̧i̧ nɛ fio mbɛt.

³Ɓɛɛ Abraham kur fara fio nɛ́ɛ̀ tɔ̧ ha̧ o bezaŋ Hɛt'e:

⁴«Mi nɛ́ gɛnɛ k’ɛ́nɛ́; ɛ̀nɛ̀ há̧ fara ha̧‘m sɛn nu k’ɛ́nɛ́ wen guna kóò kɔ‘m.»

⁵O bezaŋ Hɛt kifa nú hee mɔ'ɔ ga ha̧ Abraham:

⁶«Nyaa, ɛ̀nɛ̀ zíí wen k’ɛɛ! Sɔ̧ ee'nɛ́ nɛ̀ wan mgbara yɛ; ɛ̀nɛ̀ gún fio k’ɛ́nɛ́ sɛn tɛ de kɔ̧ fio n’ɛnɛ hoka; ŋma bíí kpɔk beka bɛ̧ ha̧a̧ kɔ̧ fio h’ɛ́nɛ́ wen guna kóò k’ɛ́nɛ́ na.»

⁷Abraham kura ŋgɔn ɓɛɛ gu nù ti o bezaŋ Hɛt,

⁸ɓɛɛ a̧ tɔ̧ ha̧ wa woyo: «K’ɛ̀nɛ̀ nɛ́ kɔ̧ɔ̧ ɗɔaa wen baa fio kɔ‘m in guna a̧, ɛ̀nɛ̀ zíí wen kɔ‘m; ɛ̀nɛ̀ áí nú ha̧ Efrɔŋ, bem ko Sɔhar wen am,

⁹ha̧ a̧ mɛ ha̧ di̧i̧ Makpɛla nɛ duk nɛ kɔ̧-a̧ sɛn ká̧ nú fɔ kɔ̧-a̧ ha̧‘m. A̧ a̧ ɗɔr ha̧‘m nɛ mgbák gɛnɛ, ha̧ mɛ duk nɛ fara-gun-fio kɔ‘m tɛ k’ɛ́nɛ́.»

¹⁰Efrɔŋ duka so nù mgbara o bezaŋ Hɛt mbɛt, ɓɛɛ kifi nú ha̧ Abraham nɛ yí o bezaŋ Hɛt in o bíí lɛŋ nɛ tɛa saaye kɔ̧-a̧; a̧ tɔ̧a̧:

¹¹«Nyaa, ɛ̀nɛ̀ zíí wen nú‘m nɛti sɛ! Fɔ in di̧i̧ nɛ a̧a̧ sɛn fara'i, mi ha̧a̧‘nɛ́ nɛ̀ yí o bíí kɔ‘m, ɛ̀nɛ̀ gún fio k’ɛ́nɛ́ sɛnɛ.»

¹²Ɓɛɛ Abraham gu nù ti o be-nù,

¹³a̧ tɔ̧ɔ̧ ha̧ Efrɔŋ nɛ yí o be-nù: «Mi ai nú ha̧ mɛ, mɛ̀ zíí wen kɔ‘m; mi tɛ ha̧ sede fɔ‘i ha̧ mɛ. Mɛ̀ bá er-am, ɓɛɛ nɛ́ hi̧i̧ a̧‘m tɛ gun fio kɔ‘m sɛnɛ.»

¹⁴Ɓɛɛ Efrɔŋ kifi nú ha̧ Abraham:

¹⁵«Nyaa, ɛ̀nɛ̀ zíí wen kɔ‘m nɛti sɛ. Kɔya sede gɔmŋmaa-naar mgbara ɛɛ in'nɛ̀ɛ́ nɛ ge? Ɛ̀nɛ̀ gún fio k’ɛ́nɛ́.»

¹⁶Abraham ee nú in Efrɔŋ, ɓɛɛ a̧ we dɔka sede nɛ Efrɔŋ tɔ̧ɔ̧ so nɛnɛ‘i ti o bezaŋ Hɛt. Duka nɛ kɔya sede gɔmŋmaa-naar nɛ̀ o wi-de-gɛnɛ lɛŋ iŋa.

¹⁷Hegɔ fɔ ko Efrɔŋ nɛ a̧a̧ sɛn Makpɛla nɛ zɔk ŋmaa in Mambre, nù, in di̧i̧ nɛ duk sɛnɛ‘i, in o te lɛŋ nɛ a̧a̧ sɛn bɛɛ-nù‘i hɔ sɛn ká̧ a̧ lɛŋ,

¹⁸duka nɛ ko Abraham, nɛ yí o bezaŋ Hɛt, in o bíí lɛŋ nɛ tɛa nú garo ye'i.

¹⁹Ɓɛɛ Abraham ba Sara gun sɛn gasa kɔ̧ di̧i̧ fɔ Makpɛla nɛ zɔk ŋmaa in Mambre, sɛn Hebrɔŋ nú Kanaŋ.

²⁰O bezaŋ Hɛt ee fara-gun-fio kpɛɛfɔ‘i in di̧i̧ nɛ a̧a̧ sɛnɛ‘i ha̧ Abraham.