Read Northwest Gbaya KU̧U̧NAŊMƆ 27 Bible Online

KU̧U̧NAŊMƆ 27 - Northwest Gbaya bible

KU̧U̧NAŊMƆ 27

¹Izak sɔka so kaɗi ɓɛɛ yí-a zɔk mɔ nɛ sa̧a̧-a̧ ɓɔna. A̧ saa kaya-bem kɔ̧-a̧ Esau hee mɔ'ɔ ga: «Bem kɔ‘m!» Ɓɛɛ a̧ kifi nú: «Mi nɛ mɔ'ɔ baaba!»

²Izak tɔ̧ɔ̧ woyo: «Mɛ zɔk, mi sɔka kaɗi, ɓɛɛ mi iŋ wese nɛ fio tɛ ba nɛ‘m na.

³Kinii'i, mɛ̀ káí o boi kɔ-mɛ, ɓaro-góò in kusaa kɔ-mɛ, a̧ mɛ̀ nɛ́ gia wen gbɛɛ saɗi ha̧‘m.

⁴Mɛ̀ dé nyɔŋmɔ tɛnɛ ha̧‘m hee wan n'am kɔ̧ɔ̧ ga, ha̧‘m nyɔŋ, ha̧‘m mɛ tok de yoŋgo zu mɛ sɛka'm fea.»

⁵Rebeka duka zii nɛ mɔ nɛ Izak tɔ̧ ha̧ bem kɔ̧-a̧ Esau, ɓɛɛ Esau yak kɔ‘i zaŋbɛɛ wen gbɛɛ saɗi tɛnɛ ha̧ dáà kɔ‘i.

⁶Rebeka saa bem kɔ‘i Jakob, ɓɛɛ tɔ̧ ha̧ a̧: «Mi zia wen nɛ dáà kɔ-mɛ tɔ̧ɔ̧ ha̧ Esau baka kɔ-mɛ.

⁷A̧ tɔ̧a̧‘e Esau a̧ ba kpoo-zaŋbɛɛ tɛnɛ gi ha'i; kà‘i nɛ nyɔŋa kaɗi, ɓɛɛ wi toka de yoŋgo zu a̧ sɛn ti GASA WAN nɛti sɛka'i fea.

⁸Bem kɔ‘m, mɛ̀ zíí wen n'am tɛ tɔ̧ ha̧ mɛ‘i, ɓɛɛ mɛ̀ dé mɔ n'am tɛ tɔ̧ ha̧ mɛ mɛ de.

⁹Mɛ̀ nɛ́ sɛn mgbara o mɔ-dai, ɓɛɛ mɛ̀ káí o be gbadua yiitoo tɛnɛ ha̧‘m gi ha̧ dáà kɔ-mɛ hee wan n'aa kɔ̧a̧ ga.

¹⁰Mɛ̀ bá nɛnɛ ha̧ dáà kɔ-mɛ nyɔŋ, ha̧ a̧ tok de yoŋgo zu mɛ nɛti sɛka a̧ tɛɛ fe.»

¹¹Jakob tɔ̧ɔ̧ ha̧ nàà kɔ‘i: «Ɛ̀nɛ̀ zɔ́k baka kɔ‘m Esau a̧a̧ nɛ bumu nyɛmna, ɓɛɛ kɔ‘m, mi bo nɛ̀ bumu na.

¹²Ŋmafara dáà kɔ‘m tɛ tam tɛ‘m, ɓɛɛ a̧ zɔka'e mi nɛ wi-ndela; mɔ‘i tɛ de ha̧ a̧ mɛ fom am, bó nɛ́ ha̧ a̧ mɛ tok nɛ de yoŋgo zu'm na.»

¹³Ɓɛɛ nàà kɔ̧-a̧ tɔ̧ ha̧ a̧: «Fom kɔ-mɛ a̧ tik nɛ zu'm, bem kɔ‘m! Mɛ̀ zíí wen nú‘m a̧ mɛ̀ nɛ́ɛ̀ kai nɛ o be gbadua tɛnɛ ɓɛɛ.»

¹⁴Ɓɛɛ a̧ kur yak nɛ́ɛ̀ kai o be gbadua tɛnɛ ha̧ nàà kɔ̧-a̧, ɓɛɛ nàà kɔ̧-a̧ gi nyɔŋmɔ ha̧ dáà kɔ̧-a̧ hee wan nɛ dáà kɔ̧-a̧ kɔ̧ɔ̧ ga.

¹⁵Rebeka kaia o de laa ko kaya-bem nɛ ɓɔna kɔ̧ tua a tɛ Jakob be-ɗoŋ.

¹⁶Rebeka baa ndàrá gbadua gu ɓaa Jakob in gun ger-a,

¹⁷ɓɛɛ a̧ ba brɛt in nyɔŋmɔ n'aa ɗafa e er bem kɔ̧-a̧ Jakob.

¹⁸Jakob yee mɔ sitɛ dáà kɔ‘i, ɓɛɛ tɔ̧: «Baaba!» Izak kɔ̧ɔ̧ sara: «Mi nɛ mɔ'ɔ!» A̧ aka a̧: «Mɛ́ nɛ́ ge bem ge?»

¹⁹Ɓɛɛ Jakob tɔ̧ ha̧ dáà kɔ‘i: «Nɛ mi Esau kaya-bem k’ɛ́nɛ́, mi dee mɔ n’ɛnɛ tɔ̧ɔ̧ ha̧‘m mɛ de kaɗi. Mi kɔfi'nɛ́, ɛ̀nɛ̀ dúk nù, ɛ̀nɛ̀ nyɔ́ŋ mɔɔ-gia kɔ‘m, h’ɛ́nɛ́ mɛ tok de yoŋgo zu'm.»

²⁰Izak tɔ̧ɔ̧ ha̧ Jakob: «Ho, bem kɔ‘m; mɛ kpaa mɔ nɛ haya-a gɔ!» Jakob kifa nú ha̧ a̧: «Nɛ́ GASA WAN Sɔ̧ k’ɛ́nɛ́ a̧ ha̧a̧ de sɔnti ha̧‘m.»

²¹Ɓɛɛ Izak tɔ̧ ha̧ Jakob: «Mɛ̀ ɗɔ́ŋ pii ti ha̧‘m tam tɛ-mɛ bem kɔ‘m, ha̧‘m iŋ nɛ de-a ka nɛ́ bòò nɛ́ kaya-bem kɔ‘m Esau nɛ mbetɛ.»

²²Hegɔ Jakob ɗɔŋa pii katɛ dáà kɔ‘i Izak nɛ tama tɛ-a, ɓɛɛ tɔ̧: «Tiger nɛ́ tiger Jakob, ɓɛɛ te-er, nɛ́ ko Esau.»

²³Ɓɛɛ a̧ iŋ yí-a na, wen te-er Jakob duka nɛ bumu nyɛmna hee te-er baka kɔ̧-a̧ ga. Hegɔ, ɓɛɛ Izak ak a̧ tɔ̧ nɛnɛ‘e:

²⁴«Mɛ́ nɛ́ bem kɔ‘m Esau nɛ mbetɛ?» Ɓɛɛ Jakob kɔ̧ ɗɔaa.

²⁵Izak tɔ̧ɔ̧ woyo: «Mɛ̀ há̧ nyɔŋmɔ ha̧‘m nyɔŋ, ha̧‘m nyɔŋ kpoo saɗi ko bem kɔ‘m, ha̧‘m tok de yoŋgo nɛ tɛ‘m.» Jakob baa nyɔŋmɔ tɛnɛ ha̧ a̧, ɓɛɛ a̧ nyɔŋ. A̧ baa dɔ̧ɔ̧ tɛnɛ, ɓɛɛ a̧ nɔ mbɛt.

²⁶Ɓɛɛ dáà kɔ̧-a̧ Izak tɔ̧ ha̧ a̧: «Mɛ̀ ɗɔ́ŋ pii ti a̧ mɛ̀ dúí nú‘m, bem kɔ‘m!»

²⁷A̧ ɗɔŋa pii ti, ɓɛɛ a̧ dui nú-a. A̧ kpaa pɛr laa ko bem kɔ̧-a̧, ɓɛɛ a̧ tok de yoŋgo zu a̧, a̧ tɔ̧a̧: «Pɛr-tɛ bem kɔ‘m duk hee pɛr fɔ nɛ GASA WAN toka de yoŋgo zu-a ga.

²⁸Sɔ̧ a̧ ha̧ mbɛŋ mɛ yiwese ha̧ nù kɔ-mɛ mɛ dɛm nyɔnɔ! A̧ a̧ ha̧ alkamaari in nyɔɔ dɔ̧ɔ̧ nɛ dɔka-a ha̧ mɛ.

²⁹O bíí a̧ mbo zu ha̧ mɛ, o dukbíí a̧ gu nù ti mɛ! Mɛ̀ ɔ́ wan zu o nya-mɛ, o nya-mɛ a̧ gu nù ti mɛ! Fom a̧ ba bíí nɛ tɛ fom mɛ, ɓɛɛ de yoŋgo a̧ duk zu bíí nɛ tɛ tok de yoŋgo zu mɛ!»

³⁰Ɗoŋ nɛ Izak toka de yoŋgo zu Jakob kaɗi, nɛ Jakob ee Izak duk, ɓɛɛ nya-a̧ Esau pii nɛ̀ tɛ gia.

³¹Ɓɛɛ a̧ ɗafi nyɔŋmɔ kɔ̧-a̧ mbɛt ba nɛnɛ ha̧ dáà kɔ̧-a̧; a̧ tɔ̧ɔ̧ ha̧ dáà kɔ̧-a̧: «Baaba, ɛ̀nɛ̀ kúr wen nyɔŋa mɔɔ-gia ko bem k’ɛ́nɛ́, wen h’ɛ́nɛ́ mɛ tok de yoŋgo zu'm.»

³²Dáà kɔ̧-a̧ Izak aka mɔ: «Mɛ́ nɛ́ o?» Esau kifa nú: «Mɛ̀ nɛ́ mi, kaya-bem k’ɛ́nɛ́.»

³³Ɗɛɗɛ Izak gɔna hɔ tɛ fio, ɓɛɛ a̧ tɔ̧: «Mɛ̀ nɛ́ o a̧ nɛ̀ɛ́ gia ká gi kpoo-zaŋbɛɛ tɛnɛ ha̧‘m’ɛ o? Mi nyɔŋa mɔ nɛti kaɗi sɛka mɛ biti hɔ. Mi toka de yoŋgo zu wi’ɛi. Ɓɛɛ a̧ tɛ duk nɛ wi nɛ toka-de-yoŋgo a̧a̧ zu a̧ hegɔ yaknɛ.»

³⁴Ŋgimbi nɛ Esau zia tiger wen ko dáà kɔ‘i, a̧ hiɗa mɔ nɛ ŋgaya-a nyɛmna in nɛ tu̧u̧-see, ɓɛɛ a̧ ai nú ha̧ dáà kɔ̧-a̧: «Baaba, ɛ̀nɛ̀ tók de yoŋgo zu'm mbɛt.»

³⁵Ɓɛɛ dáà kɔ̧-a̧ kifi nú ha̧ a̧: «Nya-mɛ tɛɛ nɛ̀ gɔn-ta, ɓɛɛ a̧ ba de sɔnti kɔ-mɛ kaɗi.»

³⁶Esau aka mɔ woyo: «Mɛ̀ nɛ́ wen nin Jakob'i nɛ mɔ'ɔ n'aa baa mɔɔ-oi kɔ‘m war yiitoo lɛŋ‘i nde? A̧ baa ŋgai ko kaya-bem yinɛ er-am; zɔk kinii, a̧ pia ɗoŋ tɛɛ ba de yoŋgo kɔ‘m mbɛt!» Ɓɛɛ Esau ai nú woyo: «Ŋma be yoŋgo h’ɛ́nɛ́ mɛ tok benaŋ zu'm tikiɗi bo na nde?»

³⁷Izak kifa nú ha̧ Esau: «Mi ee a̧ nɛ gasawi kɔ-mɛ kaɗi, mi ha̧a̧ o nya-a̧ mɛ ya o wi-de-tom kɔ̧-a̧. Mi ha̧a̧ alkamaari in dɔ̧ɔ̧ ha̧ a̧. Nɛ́ ge a̧‘m tɛ de wen mɛ ɓɔ ge, bem kɔ‘m?»

³⁸Esau aka dáà kɔ‘i woyo: «De yoŋgo nɛ kpɔk'i ɓɛɛ, baaba? Ɛ̀nɛ̀ tók de yoŋgo zu'm mbɛt, dáà kɔ‘m!» Esau hiɗa mɔ ɓɛɛ a̧ hi̧i̧ kɔ̧a̧.

³⁹Ɓɛɛ Izak dáà kɔ̧-a̧ kifi nú, ɓɛɛ tɔ̧ ha̧ a̧: «Fara kɔ-mɛ tɛ duk nɛ́ ŋga nù, mbɛŋ beka duk hi̧i̧ na.

⁴⁰Mɛ tɛ nyɔŋ mɔ nɛ gba-paa kɔ-mɛ, mɛ tɛ de tom ha̧ nya-mɛ, ɓɛɛ ŋgimbi nɛ mɛ tɛ ba zu-mɛ nɛ ŋgɔn, mɛ tɛ gbin kpáŋá kɔ̧-a̧ ger-mɛ yinɛ.»

⁴¹Esau ee kiri in Jakob wen de sɔnti kɔ̧-a̧ nɛ Jakob baa sɛn er dáà kɔ̧-a̧. Esau tɔ̧a̧: «Ɗoŋ fio ko dáà kɔ‘m nyɛi̧ ɓɔna. Nɛ́ sɛn tɛ ŋgimbi'i a̧‘m tɛ gbɛ nɛ nya'm Jakob yinɛ.»

⁴²Wa mbaŋa tɛ Rebeka wen mɔ nɛ Esau kaya-bem kɔ̧-a̧ tɔ̧a̧. Rebeka saa Jakob, ɓɛɛ tɔ̧ ha̧ a̧: «Nya kɔ-mɛ Esau kɔ̧ɔ̧ mɛ kifi er gbɛ nɛ mɛ.

⁴³Mɛ̀ zíí wen kɔ‘m, bem kɔ‘m; kinii mɛ̀ kúr, mɛ̀ yú mɔ yak si sɛn tɛ nya'm Labaŋ sɛn Haraŋ.

⁴⁴Mɛ́ tɛ duk in a̧ ɗoŋ-aa nyɛi̧ tikiɗi pɛm nɛ ŋgimbi nɛ see baka kɔ-mɛ tɛ ga̧.

⁴⁵Ŋgimbi nɛ see nya-mɛ tɛ bi ɗoŋ mɛ wen zu mɔ nɛ mɛ dee in a̧, mi tɛ pi̧ tom sa nɛ mɛ pii nɛ ɗoŋ, k’ɛ́nɛ́ tɛɛ yɔ yiitoo lɛŋ kpɔk kale wese ha̧‘m.»

⁴⁶Rebeka tɔ̧ɔ̧ ha̧ Izak: «Duka kpasa ɔ̧ nyɔɔ tɛ‘m ɓɔna wen zu o boko be Hɛt nɔ'ɔ. Kà Jakob á̧ baa ŋma kóò hee o ɛ̧ɛ̧ nɔ'ɔ ga, gana so a̧‘m fe.»